' ധുരന്ധര്‍ മുതിര്‍ന്നവര്‍ക്കുളള സിനിമയാണ്, ഭൂത് ബംഗ്ലാ കുട്ടികള്‍ക്കും കുടുംബങ്ങള്‍ക്കും വേണ്ടിയുളളതാണ്' ; അക്ഷയ് കുമാര്‍

നടന്‍ അക്ഷയ് കുമാര്‍ നായകനായി എത്തുന്ന പുതിയ ചിത്രമാണ് ' ഭൂത് ബംഗ്ലാ'. പ്രിയദര്‍ശന്‍ സംവിധാനം ചെയ്യുന്ന ചിത്രം ഒരു ഹൊറര്‍ കോമഡിയാണ്. ആദിത്യ ധര്‍ സംവിധാനം ചെയ്ത ' ധുരന്ധര്‍' പോലുളള ആക്ഷന്‍ ചിത്രങ്ങള്‍ തിയേറ്ററുകള്‍ ഭരിക്കുമ്പോഴാണ് അക്ഷയ് കുമാര്‍ വ്യത്യസ്തമായ ഈ ശൈലി പരീക്ഷിക്കുന്നത്.

ഇപ്പോള്‍ ഭൂത് ബംഗ്ലായേക്കുറിച്ചും ധുരന്ധറിനെകുറിച്ചും അക്ഷയ് കുമാര്‍ പറഞ്ഞ കാര്യങ്ങളാണ് ശ്രദ്ധേയമാകുന്നത്. പിടിഐക്ക് നല്‍കിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്. ' ധുരന്ധര്‍ പോലുളള ആക്ഷന്‍ സിനിമകള്‍ ബോക്‌സ് ഓഫീസില്‍ നിറഞ്ഞുനില്‍ക്കുന്ന സമയത്ത് ' ഭൂത് ബംഗ്ലാ' പോലുളള ഹൊറര്‍- കോമഡി ചിത്രം റിലീസ് ചെയ്യുന്നത് ബോധപൂര്‍വമായ തീരുമാനമായിരുന്നോ എന്നായിരുന്നു അക്ഷയ് കുമാറിനോടുളള ചോദ്യം. ' ധുരന്ധര്‍' ഒരു മികച്ച സിനിമയാണെന്നും എന്നാല്‍ അത് പ്രായപൂര്‍ത്തിയായാവര്‍ക്ക് മാത്രമുളളതാണെന്നും അദ്ദേഹം പറഞ്ഞു.

"വിവിധതരം സിനിമകളാണ് നിർമിക്കപ്പെടുന്നത്.'ധുരന്ധർ' ഒരു മികച്ച ചിത്രമാണ്, ഞാൻ അത് കണ്ടിട്ടുണ്ട്. 'ഭൂത് ബംഗ്ലാ' ഒരു വ്യത്യസ്ത ചിത്രമാണ്. 'ധുരന്ധർ' മുതിർന്നവർക്കുള്ള ചിത്രമാണ്. ഇത് 'ഭൂത് ബംഗ്ലാ' കുട്ടികൾക്കും കുടുംബങ്ങൾക്കും വേണ്ടിയുള്ളതാണ്. ഈ സിനിമ നിർമിക്കുമ്പോൾ, നിലവിലെ ട്രെൻഡ് എന്താണെന്ന് ഞങ്ങൾ നോക്കിയിരുന്നില്ല. പകരം കഥ നല്ലതാണോ അല്ലയോ എന്ന് ഞങ്ങൾ നോക്കി. അതിനനുസരിച്ച് ഞങ്ങൾ ഈ ചിത്രം നിർമിച്ചു.

ഞങ്ങൾ ഒരിക്കലും ട്രെൻഡിനെക്കുറിച്ച് ചിന്തിച്ചിരുന്നില്ല." അക്ഷയ് കുമാർ പറഞ്ഞു. സംവിധായകൻ പ്രിയദർശനൊപ്പം വീണ്ടും പ്രവർത്തിച്ചതിനെക്കുറിച്ചും അക്ഷയ് കുമാർ പ്രതികരിച്ചു. "ധുരന്ധർ, ബോർഡർ 2 പോലുള്ള സിനിമകൾ വളരെ നന്നായി പോകുന്നു. ധുരന്ധർ പോലുള്ള സിനിമകൾ കാണുന്നവർക്കും 'ഭൂത് ബംഗ്ലാ' ആസ്വദിക്കാൻ കഴിയും.

എന്റെ അഭിപ്രായത്തിൽ ഞങ്ങളുടെ വിപണന സാധ്യത വലുതാണ്. ആളുകൾ വ്യത്യസ്ത കാര്യങ്ങൾ കാണാൻ ഇഷ്ടപ്പെടുന്നു. അതാണ് 'ഭൂത് ബംഗ്ലാ' കൊണ്ട് ഞങ്ങൾക്കുള്ള ഏറ്റവും വലിയ ഗുണം. മാത്രമല്ല, ഇത് ശുദ്ധമായ വിനോദമാണ്, ഒരു രസകരമായ സിനിമയാണ്. ആളുകൾ എല്ലാത്തരം സിനിമകളും ആസ്വദിക്കുന്നു. ആളുകളുടെ ശ്രദ്ധയും താല്പര്യവും നിലനിർത്തുന്നിടത്തോളം കാലം, എല്ലാ സിനിമകളും വിജയിക്കുമെന്ന് ഞാൻ വിശ്വസിക്കുന്നു.

എന്റെ സിനിമ കാണിക്കാൻ ഏതൊരു മാതാപിതാക്കൾക്കും അഭിമാനത്തോടെ വരാൻ കഴിയും. കാരണം ഞാൻ എൻ്റെ സിനിമകളിൽ ദ്വയാർത്ഥങ്ങളോ അശ്ലീലമോ ഉപയോഗിക്കാറില്ല. ഞാൻ മാതാപിതാക്കളെ ഒരിക്കലും ലജ്ജിപ്പിക്കാറില്ല. കരിയർ ആരംഭിച്ച ദിവസം മുതൽ നിലനിർത്തിപ്പോരുന്ന കാര്യമാണിത്." അക്ഷയ് കുമാർ കൂട്ടിച്ചേർത്തു.

അക്ഷയ് കുമാറിനെ കൂടാതെ പരേഷ് റാവല്‍, രാജ്പല്‍ യാദവ്, തബു, വാമിഖ ഗബ്ബി എന്നിവരും ' ഭൂത് ബംഗ്ല' യില്‍ പ്രധാന വേഷങ്ങളില്‍ എത്തുന്നുണ്ട്.