പറക്കാനുള്ള കഴിവ് പരിമിതം: മരുഭൂഏമിയില്‍ ഓടി നടന്ന് ഇരതേടും: കൗതുകമായി ഇറാനിലെ വിചിത്ര പക്ഷി

ഇറാനിലെ വരണ്ട മരുഭൂമികളിലും അര്‍ദ്ധവരണ്ട സമതലങ്ങളിലും മാത്രം കാണപ്പെടുന്ന അതിശയിപ്പിക്കുന്ന ഒരു പക്ഷിയാണ് ഇറാനിയന്‍ ഗ്രൗണ്ട് ജേ . കാക്ക കുടുംബത്തില്‍ (Corvidae) പെട്ടതാണെങ്കിലും, മരങ്ങളില്‍ വസിക്കുന്ന മറ്റ് അംഗങ്ങളില്‍ നിന്ന് വ്യത്യസ്തമായി ഇവ പ്രധാനമായും നിലത്താണ് ജീവിക്കുന്നത്. പറക്കാനുള്ള കഴിവ് പരിമിതമായ ഈ പക്ഷികള്‍, ശത്രുക്കളില്‍ നിന്ന് രക്ഷപെടാനും ഇര തേടാനും മണ്ണിലൂടെ അതിവേഗം ഓടാനാണ് ഇഷ്ടപ്പെടുന്നത്.

മരുഭൂമിയിലെ കഠിനമായ സാഹചര്യങ്ങളെ അതിജീവിക്കാന്‍ അനുയോജ്യമായ ശരീരഘടനയാണ് ഇവയ്ക്കുള്ളത്. മണല്‍നിറത്തോട് ചേന്നുനില്‍ക്കുന്ന തവിട്ടുനിറത്തിലുള്ള തൂവലുകള്‍ ഇവയെ ഇരപിടിയന്മാരുടെ കണ്ണില്‍പ്പെടാതെ സംരക്ഷിക്കുന്നു. ദൂരേക്ക് പറക്കുന്നതിന് പകരം മണ്ണിലൂടെ ഓടാന്‍ സഹായിക്കുന്ന നീണ്ട കാലുകളും ശക്തമായ പാദങ്ങളുമാണ് ഇവയുടെ പ്രത്യേകത. കൂടാതെ, മണ്ണില്‍ കുഴിച്ച് ഇര തേടാന്‍ പാകത്തിലുള്ള വളഞ്ഞ കൊക്കുകളും ഇവയ്ക്കുണ്ട്.

ഭക്ഷണത്തിന്റെ കാര്യത്തില്‍ യാതൊരു നിര്‍ബന്ധവുമില്ലാത്ത മിശ്രഭോജികളാണിവ. പ്രാണികള്‍, ചെറിയ ഇഴജന്തുക്കള്‍, വിത്തുകള്‍ എന്നിവയാണ് പ്രധാന ആഹാരം. ഭാവിയിലേക്ക് ആവശ്യമായ ഭക്ഷണം മണ്ണില്‍ കുഴിച്ചിട്ടു സൂക്ഷിക്കുന്ന ബുദ്ധിപരമായ ശീലം ഇവയ്ക്കുണ്ട്. മനുഷ്യരില്‍ നിന്ന് ഒഴിഞ്ഞുമാറി നടക്കാന്‍ ഇഷ്ടപ്പെടുന്ന ഈ പക്ഷികള്‍ മിക്കവാറും ചെറിയ കൂട്ടങ്ങളായോ ഇണകളായോ ആണ് കാണപ്പെടാറുള്ളത്. താഴ്ന്ന കുറ്റിച്ചെടികളിലാണ് ഇവ സാധാരണയായി കൂടുകൂട്ടുന്നത്.

അതിജീവനശേഷി കൂടുതലാണെങ്കിലും, മനുഷ്യന്റെ ഇടപെടലുകള്‍ മൂലം ഇന്ന് ഈ പക്ഷികള്‍ വലിയ ഭീഷണി നേരിടുന്നുണ്ട്. കൃഷിക്കായുള്ള ഭൂവിനിയോഗം, അമിതമായ കാലിമേയ്ക്കല്‍, കാലാവസ്ഥാ വ്യതിയാനം എന്നിവ ഇവയുടെ ആവാസവ്യവസ്ഥയെ സാരമായി ബാധിക്കുന്നു. നിലവില്‍ ഗുരുതരമായ വംശനാശഭീഷണി നേരിടുന്നില്ലെങ്കിലും, വരുംതലമുറയ്ക്കായി ഈ അപൂര്‍വ്വ പക്ഷി വര്‍ഗ്ഗത്തെ സംരക്ഷിക്കേണ്ടത് അനിവാര്യമാണെന്ന് പരിസ്ഥിതി പ്രവര്‍ത്തകര്‍ ചൂണ്ടിക്കാട്ടുന്നു.