പോക്‌സോ ജയിലിലേക്ക് കടക്കാനൊരുങ്ങി ലഹരി സംഘത്തിലെ കണ്ണിയായ പൂച്ച: 250 ഗ്രാം കഞ്ചാവുമായി കയ്യോടെ പിടികൂടി പോലീസ്

ഇന്ന് ലഹരി ഉപയോഗം വന്‍ തോതില്‍ വ്യാപകമായിക്കൊണ്ടിരിക്കുകയാണ്. ഓരോ ലഹരി ശൃംഖല തകര്‍ക്കപ്പെടുമ്പോഴും അതിനെക്കാള്‍ സങ്കീര്‍ണ്ണമായ മറ്റൊരു ശൃംഖലയിലൂടെ ലഹരിക്കച്ചവടം നിര്‍ബാധം തുടരുന്നു. അത്തരമൊരു ലഹരി ശൃംഖലയിലെ കണ്ണിയെ കഴിഞ്ഞ ആഴ്ചയാണ് കോസ്റ്റാ റിക്ക പോലീസ് പിടികൂടിയത്. പക്ഷേ. പിടികൂടിയ ആള്‍ ഒരു പൂച്ചയാണ്. 250 ഗ്രാം കഞ്ചാവും 67.76 ഗ്രാം ക്രാക്ക് പേസ്റ്റുമായി രാത്രിയുടെ മറവില്‍ കോസ്റ്റാ റിക്കയിലെ പോകോസി ജയിലിലേക്ക് കടക്കാനുള്ള ശ്രമത്തിനിടെയാണ് പോലീസ് പൂച്ചയെ പിടികൂടിയതെന്ന് റിപ്പോര്‍ട്ടുകള്‍ പറയുന്നു.

കോസ്റ്റാ റിക്ക പോലീസ്, രാത്രിയില്‍ അതിസാഹസികമായി പൂച്ചയെ പിടികൂടുന്ന ദൃശ്യങ്ങള്‍ സമൂഹ മാധ്യമങ്ങളില്‍ വൈറലായി. 2025 മെയ് 6-ന് രാത്രി കൂരാകൂരിരട്ടത്ത് ടോര്‍ച്ച് വെളിച്ചത്തില്‍ മരത്തിന് മുകളിലൂടെ നടന്ന് നീങ്ങുന്ന പൂച്ചയെ പിടിക്കാന്‍ ഒരാള്‍ ശ്രമിക്കുന്ന ദൃശ്യങ്ങളില്‍ നിന്നാണ് വീഡിയോ തുടങ്ങുന്നത്. പിന്നാലെ പിടികൂടിയ പൂച്ചയുടെ ശരീരത്ത് കെട്ടിവച്ച വെളുത്ത തുണി കത്രിക ഉപയോഗിച്ച് നീക്കം ചെയ്യുന്നു. കറുപ്പും വെളുപ്പും നിറത്തിലുള്ള പൂച്ചയുടെ ദേഹത്ത് വെള്ളത്തുണി പൊതിഞ്ഞിരിക്കുന്നതിനാല്‍ പെട്ടെന്ന് ശ്രദ്ധയില്‍പ്പെടില്ല. ഈ കെട്ടിയ തുണിക്കുള്ളില്‍ നിന്നും പോലീസ് 250 ഗ്രാം കഞ്ചാവും 67.76 ഗ്രാം ക്രാക്ക് പേസ്റ്റും കണ്ടെത്തിയെന്നും റിപ്പോര്‍ട്ടില്‍ പറയുന്നു.

പൂച്ചയെ പിന്നീട് നാഷണല്‍ ആനിമല്‍ ഹെല്‍ത്ത് സര്‍വീസിന് കൈമാറി. വീഡിയോ വൈറലായതിന് പിന്നാലെ സമൂഹ മാധ്യമ ഉപയോക്താക്കള്‍ പൂച്ചയെ 'നാര്‍ക്കോമിച്ചി' എന്നാണ് വിശേഷിപ്പിച്ചത്. നിരവധി പേരാണ് വീഡിയോയ്ക്ക് താഴെ കുറിപ്പെഴുതാനെത്തിയത്. ചിലര്‍ മൃഗങ്ങളോട് മനുഷ്യന്‍ കാണിക്കുന്ന ക്രൂരതയാണ് ഇതെന്ന് അഭിപ്രായപ്പെട്ടു. പൂച്ചയുടെ മേല്‍ തുണി ചുറ്റിയാല്‍, അതിന് സ്വയം അത് അഴിച്ച് കളയാന്‍ പോലും കഴിയില്ല. തങ്ങളുടെ അല്പ നേരത്തെ സന്തോഷത്തിന് വേണ്ടി മനുഷ്യന്‍ മൃഗങ്ങളോട് കാണിക്കുന്ന ക്രൂരതയാണ് ഇത്. ഇതിനെ വെറുമൊരു തമാശയായി കാണാന്‍ കഴിയില്ലെന്ന് ഒരു കാഴ്ചക്കാരി എഴുതി.