ഇറാന്റെ നെടുംതൂണായ കുഞ്ഞന്‍ ദ്വീപ്: തൊട്ടാല്‍ ലോകം തന്നെ മാറ്റിമറിക്കപ്പെടും

പശ്ചിമേഷ്യയില്‍ ഇറാന്‍-ഇസ്രായേല്‍ യുദ്ധം കടുക്കുന്ന സാഹചര്യത്തില്‍ പ്രതിരോധ വിദഗ്ധരും സാമ്പത്തിക ലോകവും ഒരുപോലെ ഉറ്റുനോക്കുന്നത് ഇറാനിലെ ഖാര്‍ഗ് എന്ന കൊച്ചു ദ്വീപിലേക്കാണ്. പേര്‍ഷ്യന്‍ ഗള്‍ഫില്‍ ഇറാന്‍ തീരത്തുനിന്ന് 25 കിലോമീറ്റര്‍ അകലെ സ്ഥിതി ചെയ്യുന്ന ഈ ചെറിയ പവിഴപ്പുറ്റ് ദ്വീപിന്മേല്‍ ഒരു ആക്രമണം ഉണ്ടായാല്‍ അത് ആഗോളതലത്തില്‍ വലിയ പ്രത്യാഘാതങ്ങള്‍ സൃഷ്ടിക്കുമെന്നാണ് മുന്നറിയിപ്പ്. ഇറാന്റെ സാമ്പത്തിക ഭദ്രതയുടെ നട്ടെല്ലായ ഈ ദ്വീപിലൂടെയാണ് ക്രൂഡ് ഓയില്‍ കയറ്റുമതിയുടെ 90 ശതമാനവും നടക്കുന്നത്. ഇതിനുനേരെയുള്ള ഏതൊരു നീക്കവും ആഗോള എണ്ണവിപണിയെയും യുദ്ധഗതിയെയും പൂര്‍ണ്ണമായും മാറ്റിമറിക്കും.

വെറും 8 കിലോമീറ്റര്‍ നീളവും 5 കിലോമീറ്റര്‍ വീതിയുമുള്ള ഈ ദ്വീപില്‍ പ്രതിദിനം 70 ലക്ഷം ബാരല്‍ എണ്ണ കൈകാര്യം ചെയ്യാനുള്ള അത്യാധുനിക സൗകര്യങ്ങളുണ്ട്. ഇറാന്‍-ഇറാഖ് യുദ്ധകാലത്ത് ഇറാഖ് ഇവിടെ കനത്ത ബോംബാക്രമണം നടത്തി എണ്ണ ടെര്‍മിനലുകള്‍ നശിപ്പിച്ചിരുന്നെങ്കിലും പിന്നീട് ഇറാന്‍ ഇത് അതിവേഗം പുനര്‍നിര്‍മ്മിക്കുകയായിരുന്നു. ഇറാന്റെ സാമ്പത്തിക സ്രോതസ്സ് തകര്‍ക്കാന്‍ ശത്രുക്കള്‍ ആദ്യം ലക്ഷ്യം വെക്കുക ഈ ദ്വീപിനെയാകുമെന്ന വിദഗ്ധരുടെ മുന്നറിയിപ്പാണ് നിലവിലെ ആശങ്കയ്ക്ക് കാരണം.

സാമ്പത്തിക പ്രാധാന്യത്തിന് പുറമെ വലിയൊരു പ്രകൃതി സമ്പത്തും ഈ ദ്വീപിനുണ്ട്. അപൂര്‍വ്വയിനം മാനുകള്‍, കടലാമകള്‍, ദേശാടനക്കിളികള്‍ എന്നിവയുടെ വാസസ്ഥലമായ ഖാര്‍ഗ് പണ്ട് മുത്തുഖനനത്തിനും പേരെടുത്ത ഇടമായിരുന്നു. എന്നാല്‍ വര്‍ദ്ധിച്ചുവരുന്ന എണ്ണക്കയറ്റുമതി പ്രവര്‍ത്തനങ്ങളും ഇപ്പോള്‍ നിലനില്‍ക്കുന്ന യുദ്ധഭീഷണിയും ഈ ദ്വീപിന്റെ സവിശേഷമായ ജൈവവൈവിധ്യത്തിന് വലിയ വെല്ലുവിളിയാണ് ഉയര്‍ത്തുന്നത്.