ലോകത്തെ മൂന്നിലൊന്ന് സ്ത്രീകളും പങ്കാളിയില്‍ നിന്നോ മറ്റുള്ളവരില്‍ നിന്നോ ലൈംഗികാതിക്രമം നേരിടുന്നു: ഞെട്ടിക്കുന്ന റിപ്പോര്‍ട്ടുമായി ഡബ്ല്യുഎച്ച്ഒ

ലോകത്തെ മൂന്നിലൊന്ന് സ്ത്രീകളും പങ്കാളിയില്‍ നിന്നോ മറ്റുള്ളവരില്‍ നിന്നോ ലൈംഗികാതിക്രമം നേരിടുന്നതായി ലോകാരോഗ്യസംഘടന(ഡബ്ല്യുഎച്ച്ഒ) യുടെ റിപ്പോര്‍ട്ട്. ജനസംഖ്യയുടെ പകുതിയോളംപേര്‍ ഭീതിയോടെ ജീവിക്കുമ്പോള്‍ അതിനെ ആരോഗ്യകരമായ സമൂഹമെന്നോ നീതിയുള്ള സമൂഹമെന്നോ വിളിക്കാന്‍ കഴിയില്ലെന്നും ലോകാരോഗ്യസംഘടന മുന്നറിയിപ്പ് നല്‍കുന്നു.

ലോകത്തെ 84 കോടി അഥവാ മൂന്നിലൊന്ന് സ്ത്രീകളും തങ്ങളുടെ ജീവിതകാലത്ത് പങ്കാളിയില്‍ നിന്നുള്ള പീഡനമോ അല്ലെങ്കില്‍ മറ്റുള്ളവരില്‍ നിന്നുള്ള ലൈംഗികാതിക്രമമോ നേരിട്ടിട്ടുണ്ടെന്നാണ് ഐക്യരാഷ്ട്രസംഘടനയുടെ ആരോഗ്യ ഏജന്‍സിയായ ലോകാരോഗ്യ സംഘടന പുറത്തുവിട്ട ഏറ്റവും പുതിയ റിപ്പോര്‍ട്ട് ചൂണ്ടിക്കാണിക്കുന്നത്. കഴിഞ്ഞവര്‍ഷം മാത്രം 31.6 കോടി സ്ത്രീകളാണ് ജീവിതപങ്കാളിയില്‍ നിന്ന് ശാരീരികമോ ലൈംഗികമോ ആയ അതിക്രമം നേരിട്ടത്. 15 വയസിന് മുകളില്‍ പ്രായമുള്ള ആകെ സ്ത്രീകളുടെ 11 ശതമാനമാണ് ഇതെന്നും ഡബ്ല്യുഎച്ച്ഒ പറയുന്നു.

സ്ത്രീകളോടുള്ള അതിക്രമത്തില്‍ മാറ്റമുണ്ടാകുന്നതിന്റെ നിരക്ക് വളരെ കുറവാണെന്നും ഡബ്ല്യുഎച്ച്ഒ കൂട്ടിച്ചേര്‍ത്തു. ജീവിതപങ്കാളിയില്‍ നിന്നുള്ള പീഡനങ്ങളില്‍ കഴിഞ്ഞ രണ്ട് പതിറ്റാണ്ടിനിടെ പ്രതിവര്‍ഷം 0.2 ശതമാനത്തിന്റെ കുറവ് മാത്രമേ രേഖപ്പെടുത്തിയിട്ടുള്ളൂ. പങ്കാളിയില്‍ നിന്നല്ലാതെയുള്ള ലൈംഗികാതിക്രമം ഇതാദ്യമായാണ് ഡബ്ല്യുഎച്ച്ഒ തങ്ങളുടെ റിപ്പോര്‍ട്ടില്‍ ഉള്‍പ്പെടുത്തുന്നത്. 15 വയസിന് മുകളില്‍ പ്രായമുള്ള 26.3 കോടി സ്ത്രീകളാണ് പങ്കാളികളല്ലാത്തവരില്‍ നിന്ന് ലൈംഗികാതിക്രമം നേരിട്ടതെന്നാണ് റിപ്പോര്‍ട്ടിലുള്ളത്. നാണക്കേടും ഭയവും കാരണം ഭൂരിഭാഗം കേസുകളും റിപ്പോര്‍ട്ട് ചെയ്യപ്പെടുന്നില്ലെന്ന് മാത്രം.