ഒരാള്‍ എനിക്കൊപ്പം പാടുന്നു, മറ്റെയാള്‍ എന്റെ കണ്ണ് പരിശോധിക്കുന്നു; മക്കള്‍ക്കൊപ്പമുളള വീഡിയോയുമായി ചിന്മയി ശ്രീപദ

photo-www.instagram.com/chinmayisripaada/

ഗായിക ചിന്മയി സോഷ്യല്‍മീഡിയയില്‍ സജീവമാണ്. പങ്കിടുന്ന വിശേഷങ്ങളെല്ലാം പെട്ടെന്ന് തന്നെ വൈറലായി മാറാറുണ്ട്. ജീവിത വിശേഷങ്ങളെല്ലാം അവര്‍ ഇന്‍സ്റ്റഗ്രാമിലൂടെ പങ്കുവെക്കാറുണ്ട്. സംവിധായകനും അഭിനേതാവുമായ രാഹുല്‍ രവീന്ദ്രനാണ് ഗായികയുടെ ജീവിതപങ്കാളി. 2014 ല്‍ ആയിരുന്നു ഇവരുടെ വിവാഹം. വിവാഹ ശേഷമുള്ള വിശേഷങ്ങളെല്ലാം ഇരുവരും പങ്കുവെക്കാറുണ്ട്. നീണ്ട നാളത്തെ കാത്തിരിപ്പിനൊടുവിലായി മക്കളെത്തിയ വിശേഷം പങ്കുവെച്ചും ഇവരെത്തിയിരുന്നു.

2022 ജൂണിലായിരുന്നു ചിന്മയി അമ്മയായത്. ഒരു ആണ്‍കുട്ടിയും, പെണ്‍കുട്ടിയുമായിരുന്നു ജനിച്ചത്. ദ്രിപ്താഹ്, ഷര്‍വാസ് ഇങ്ങനെയാണ് മക്കള്‍ക്ക് പേരിട്ടത്. ഇനിയങ്ങോട്ടുള്ള ജീവിതം ഇവരോടൊപ്പമാണ്. ഇവരാണ് ഞങ്ങളുടെ ലോകം എന്നായിരുന്നു അന്ന് രാഹുല്‍ കുറിച്ചത്. മക്കളുടെ കുഞ്ഞു കൈകളുടെ ഫോട്ടോയും അദ്ദേഹം പങ്കുവെച്ചിരുന്നു. പ്രസവ ശേഷമായിരുന്നു ചിന്മയി ഗര്‍ഭകാലത്തെ ചിത്രങ്ങളും വീഡിയോകളും പങ്കുവെച്ചത്.

ജനന സമയത്ത് മക്കളുടെ ചിത്രങ്ങളും വീഡിയോകളുമൊന്നും ഇരുവരും പങ്കിട്ടിരുന്നില്ല. വലുതായിക്കഴിഞ്ഞപ്പോഴായിരുന്നു ഇതെല്ലാം പോസ്റ്റ് ചെയ്ത് തുടങ്ങിയത്. കുട്ടികളുടെ ചിത്രങ്ങള്‍ കുറച്ചുനാളത്തേക്ക് പോസ്റ്റ് ചെയ്യേണ്ട എന്നത് ഞങ്ങള്‍ ഒന്നിച്ചെടുത്ത തീരുമാനമാണ്. ഞാന്‍ ഗര്‍ഭിണിയാണെന്ന കാര്യം പോലും ആളുകള്‍ക്ക് അറിയില്ലായിരുന്നു. വളരെ അടുത്ത സുഹൃത്തുക്കള്‍ക്ക് മാത്രമേ ഇതേക്കുറിച്ച് അറിയുമായിരുന്നുള്ളൂ. സ്വയം സുരക്ഷിതയായിരിക്കുക എന്നതിന്റെ ഭാഗമായാണ് ഇങ്ങനെയൊരു തീരുമാനം എടുത്തത്. സത്യത്തില്‍ ഞാനൊരു ഭജന്‍ പാടിക്കൊണ്ടിരിക്കുന്ന സമയത്താണ് മക്കള്‍ പുറത്തേക്ക് വന്നത്. സിസേറിയനിലൂടെയായിരുന്നു മക്കളുടെ ജനനം എന്നും ഗായിക പറഞ്ഞിരുന്നു.

മക്കളോടൊപ്പമുള്ള മനോഹരമായൊരു വീഡിയോയാണ് ഒടുവിലായി ചിന്മയി പങ്കുവെച്ചിട്ടുള്ളത്. ഒരാള്‍ എന്നോടൊപ്പം പാട്ടുപാടുന്നു. മറ്റെയാള്‍ എന്റെ കണ്ണ് പരിശോധന നടത്തുന്നു എന്ന ക്യാപ്ഷനോടെയായിരുന്നു മക്കളുടെ വീഡിയോ പങ്കുവെച്ചത്. നിങ്ങളെപ്പോലെ തന്നെ പാടുന്നൊരാളെ കിട്ടി, അല്ലേ എന്നായിരുന്നു ഒരാള്‍ ചോദിച്ചത്. അവളും ഭാവിയില്‍ പാട്ടുകാരിയാവും, ഉറപ്പാണ്. പാട്ടുകാരിയും മെഡിക്കല്‍ പ്രൊഫഷനും, എന്തായാലും കൊള്ളാം എന്നായിരുന്നു കമന്റുകള്‍. സെലിബ്രിറ്റികളടക്കം നിരവധി പേരാണ് വീഡിയോ ലൈക്ക് ചെയ്തിട്ടുള്ളത്.