യാത്രാപ്രതിസന്ധി പരിഹരിക്കാന്‍ അടിയന്തര നടപടികളുമായി കുവൈത്ത് ഇന്ത്യന്‍ എംബസ്സി

കുവൈത്ത്സിറ്റി: കുവൈത്തിലെ വ്യോമപാത അടച്ചതിനെത്തുടര്‍ന്ന് പ്രവാസി ഇന്ത്യക്കാര്‍ നേരിടുന്ന യാത്രാക്ലേശങ്ങള്‍ പരിഹരിക്കാന്‍ ഇന്ത്യന്‍ എംബസി സജീവമായ ഇടപെടലുകള്‍ നടത്തിവരികയാണെന്ന് അംബാസഡര്‍ പരമിത ത്രിപതി വാര്‍ത്താസമ്മേളനത്തില്‍ പറഞ്ഞു.
അടിയന്തര സാഹചര്യത്തില്‍ നാട്ടിലേക്ക് പോകേണ്ട ഇന്ത്യന്‍ പൗരന്മാരുടെ യാത്ര സുഗമമാക്കുന്നതിനാണ് മുന്‍ഗണന നല്‍കുന്നുണ്ട്.ഇത്തരക്കാര്‍ക്കായി സൗദി അറേബ്യ വഴി എംബസി വിസ നല്‍കുന്നുണ്ട്.കൂടാതെ, ജസീറ എയര്‍വേഴ്‌സ് വിമാനം സൗദി വഴി ഇന്ത്യയിലെ കൊച്ചി അടക്കം 6 കേന്ദ്രങ്ങളിലേക്ക് സര്‍വീസ് നടത്തുന്നുള്ളതായും അറിയിച്ചു.
പ്രതിസന്ധി ഘട്ടത്തില്‍ കുവൈത്തിലെ ഇന്ത്യന്‍ സമൂഹം പുലര്‍ത്തുന്ന സംയമനത്തെയും ഉത്തരവാദിത്തബോധത്തെയും അംബാസഡര്‍ പ്രശംസിച്ചു. പ്രവാസികളുടെ സുരക്ഷയും ക്ഷേമവും ഉറപ്പാക്കുന്നതില്‍ കുവൈത്ത് സര്‍ക്കാര്‍ നല്‍കുന്ന പിന്തുണയ്ക്ക് അംബാസഡര്‍ പ്രത്യേക നന്ദി രേഖപ്പെടുത്തി.പ്രവാസി സമൂഹത്തിന്റെ സുരക്ഷ ഉറപ്പാക്കുന്നതില്‍ കുവൈറ്റ് ഭരണകൂടം മാതൃകാപരമായ പ്രവര്‍ത്തനമാണ് കാഴ്ചവെക്കുന്നതെന്നും അവര്‍ കൂട്ടിച്ചേര്‍ത്തു.

സാമൂഹിക മാധ്യമങ്ങള്‍ വഴി പ്രചരിക്കുന്ന തെറ്റായ വിവരങ്ങളില്‍ പൗരന്മാര്‍ വീഴരുതെന്ന് അംബാസഡര്‍ പ്രത്യേകം ഓര്‍മ്മിപ്പിച്ചു. ഔദ്യോഗിക സ്രോതസ്സുകളില്‍ നിന്നുള്ള സ്ഥിരീകരിച്ച വിവരങ്ങള്‍ മാത്രം പിന്തുടരണം. കൃത്യമായ വിവരങ്ങള്‍ ജനങ്ങളിലെത്തിക്കുന്നതില്‍ മാധ്യമങ്ങള്‍ നല്‍കുന്ന പിന്തുണയെ അവര്‍ അഭിനന്ദിച്ചു. പൗരന്മാര്‍ക്ക് ആവശ്യമായ എല്ലാ സഹായങ്ങളും നല്‍കാന്‍ എംബസി സജ്ജമാണെന്നും അംബാസഡര്‍ പരമിത ത്രിപതി അറിയിച്ചു.ഡപ്യൂട്ടി ചീഫ് ഓഫ് മിഷന്‍ സഞ്്ജ് മുല്ലുക,ഫസ്റ്റ് സെക്രട്ടറിമാരായ മാനസ് രാജ് പട്ടേല്‍,ചന്ദ്രകാന്ത റാത്തോഡ് എന്നിവരും വാര്‍ത്താസമ്മേളനത്തില്‍ സന്നിഹിതരായിരുന്നു.