' നല്ലൊരു വ്യക്തിത്വത്തിന്റെ ഉടമ' ; കലാഭവന്‍ മണിയുടെ ഓര്‍മ്മ ദിനത്തില്‍ കുറിപ്പുമായി ജി. വേണുഗോപാല്‍

മലയാളികളുടെ മനസ്സില്‍ ഇന്നും മായാതെ നില്‍ക്കുന്ന അതുല്യ കലാകാരനാണ് കലാഭവന്‍ മണി. മിമിക്രി വേദിയില്‍ നിന്ന് സിനിമയിലെത്തിയ മണി വളരെ പെട്ടന്നാണ് ജനഹൃദയങ്ങളില്‍ ഇടം പിടിച്ചത്. ഇന്ന് മണിയുടെ പത്താം ഓര്‍മ്മ ദിനം ആണ്. ഈ അവസരത്തില്‍ ഫേസ്ബുക്കില്‍ കുറിപ്പ് പങ്കുവച്ചിരിക്കുകയാണ് ഗായകന്‍ ജി. വേണുഗോപാല്‍.

' ഇന്ന് മണിയുടെ പത്താം ഓര്‍മ്മ വര്‍ഷം. നൈസര്‍ഗ്ഗികമായ പ്രതിഭയായിരുന്നു മണിയുടേത്. അഭിനയവും സംഗീതവുമെല്ലാം വളരെ സ്വാഭാവികമായ് കൈവന്നു ചേര്‍ന്നിരുന്നു മണിയ്ക്ക്. നല്ലൊരു വ്യക്തിത്വത്തിനുടമയായ മണിയുടെ ഓര്‍മ്മകള്‍ക്ക് മുന്നില്‍ ഈ സഹോദരന്റെ ഒരു പിടി കണ്ണീര്‍ പൂക്കള്‍', എന്നാണ് ജി. വേണുഗോപാലിന്റെ വാക്കുകള്‍. കലാഭവന്‍ മണിയ്‌ക്കൊപ്പമുളള ചിത്രവും ജി. വേണുഗോപാല്‍ പങ്കുവച്ചു.

മലയാള സിനിമയെയും ആരാധകരെയും ഒരുപോലെ ഞെട്ടിച്ച ഒന്നായിരുന്നു കലാഭവന്‍ മണിയുടെ അപ്രതീക്ഷിത വിയോഗം. 2016 മാര്‍ച്ച് 6-ന് ആണ് കലാഭവന്‍ മണി അന്തരിച്ചത്.

ചാലക്കുടിക്കാരനായ മണി, ഒരു ഓട്ടോറിക്ഷാ ഡ്രൈവറായി ജീവിതം ആരംഭിച്ച് പിന്നീട് കലാഭവന്‍ എന്ന പ്രശസ്തമായ മിമിക്രി ട്രൂപ്പിലൂടെയാണ് കലാരംഗത്ത് എത്തിയത്. സിബി മലയില്‍ സംവിധാനം ചെയ്ത് 1995ല്‍ പുറത്തിറങ്ങിയ ' അക്ഷരം' ആണ് മണിയുടെ ആദ്യ സിനിമ. പിന്നീട് മലയാളത്തിലും തമിഴിലും തെലുങ്കിലുമായി അദ്ദേഹം നിരവധി സിനിമകളില്‍ അഭിനയിച്ചു. കലാഭവന്‍ മണിയുടെ നാടന്‍ പാട്ടുകള്‍ക്കും ആരാധകര്‍ ഏറെയാണ്.