റഷ്യയില്‍ നാണയമഴ, നഗരങ്ങളെ മൂടി ആയിരകണക്കിന് നാണയങ്ങള്‍: ലോകം കണ്ട വിചിത്ര മഴപ്രതിഭാസങ്ങള്‍ക്ക് പിന്നില്‍ എന്ത്?

മഴ ആസ്വദിക്കാത്തതായി ഈ ലോകത്ത് ആരും തന്നെ ഉണ്ടാകില്ല. മനസ്സിനും ശരീരത്തിനും കുളിരുപകരുന്ന അനുഭവമാണ് മഴ നല്‍കുന്നതെങ്കിലും ലോകമെമ്പാടുമുള്ള വിവിധ പ്രദേശങ്ങളില്‍ പലപ്പോഴും ശാസ്ത്രലോകത്തെപ്പോലും അമ്പരപ്പിക്കുന്ന തരത്തിലുള്ള വിചിത്രമായ മഴകള്‍ പെയ്തിട്ടുണ്ട്. ഇതില്‍ ഏറ്റവും പ്രധാനപ്പെട്ട ഒന്നാണ് 2001ല്‍ കേരളത്തില്‍ പെയ്ത ചുവന്ന മഴ. ആകാശത്തുനിന്ന് രക്തം പെയ്യുകയാണോ എന്ന് തോന്നിപ്പിക്കുന്ന തരത്തിലുള്ള ഈ പ്രതിഭാസം വലിയ ചര്‍ച്ചകള്‍ക്ക് വഴിവെച്ചു. അന്തരീക്ഷത്തിലെ പ്രത്യേക തരം ആല്‍ഗകളുടെ സാന്നിധ്യമാണ് ഈ നിറവ്യത്യാസത്തിന് കാരണമെന്ന് പിന്നീട് കണ്ടെത്തുകയഒം ചെയ്തു. സമാനമായ രീതിയില്‍ 2015ല്‍ അമേരിക്കയിലെ ഓറിഗണില്‍ പെയ്ത പാലിന്റെ നിറമുള്ള 'പാല്‍മഴ'യും ഏറെ ശ്രദ്ധിക്കപ്പെട്ടു. ദൂരെയുള്ള അഗ്‌നിപര്‍വ്വത സ്‌ഫോടനത്തെത്തുടര്‍ന്നുണ്ടായ ചാരം വായുവില്‍ കലര്‍ന്നതാണ് ഈ പ്രതിഭാസത്തിന് പിന്നിലെ രഹസ്യമെന്ന് ഗവേഷകര്‍ അവകാശപ്പെടുന്നു.

ഇത്തരത്തില്‍ 1940ല്‍ റഷ്യയിലെ ഗോര്‍ക്കി പട്ടണത്തില്‍ വെള്ളി നാണയങ്ങള്‍ മഴപോലെ പൊഴിഞ്ഞു വീണത് ചരിത്രത്തിലെ രസകരമായ ഒരു മറ്റൊരു സംഭവമാണ്. ശക്തമായ ഒരു ചുഴലിക്കാറ്റ് പഴയൊരു നിധിപേടകത്തെ അന്തരീക്ഷത്തിലേക്ക് ഉയര്‍ത്തിയതാണ് ഇങ്ങനെയൊരു 'ഭാഗ്യമഴയ്ക്ക്' കാരണമായത്. ജപ്പാനിലെ ഇഷിക്കാവയില്‍ തവളകളും മീനുകളും ആകാശത്തുനിന്ന് വീണതും, ഓസ്‌ട്രേലിയയില്‍ ചിലന്തികള്‍ കൂട്ടമായി ആകാശത്തുനിന്ന് താഴേക്ക് പതിക്കുന്നതും ഇത്തരം പ്രതിഭാസങ്ങളില്‍ പെടുന്നു. ജലാശയങ്ങളിലെ വെള്ളം വായുവിലേക്ക് ചുഴറ്റിയെടുക്കുന്ന 'വാട്ടര്‍ സ്പ്രൗട്ട്' പോലെയുള്ള പ്രതിഭാസങ്ങളാണ് പലപ്പോഴും ഇത്തരം ജീവമഴകള്‍ക്ക് പിന്നില്‍ പ്രവര്‍ത്തിക്കുന്നത്.

ഇത്തരത്തില്‍ മഴയോടൊപ്പം അജ്ഞാത വസ്തുക്കള്‍ വീഴുന്ന പ്രതിഭാസങ്ങളും ലോകത്തിന്റെ പല ഭാഗങ്ങളിലും റിപ്പോര്‍ട്ട് ചെയ്യപ്പെട്ടിട്ടുണ്ട്. 2012ല്‍ ബ്രിട്ടനിലെ ഡോര്‍സെറ്റില്‍ നീല നിറത്തിലുള്ള ജെല്ലി കഷ്ണങ്ങള്‍ മഴയോടൊപ്പം വീണത് ഇതിനൊരു ഉദാഹരണമാണ്. സോഡിയം പോളി അക്രിലേറ്റ് എന്ന പദാര്‍ത്ഥമാണ് ഇതെന്നു തിരിച്ചറിഞ്ഞെങ്കിലും അവ എങ്ങനെ ആകാശത്തെത്തി എന്നത് ഇന്നും ദുരൂഹമായി തുടരുന്നു. പ്രകൃതിയുടെ ഇത്തരം വിസ്മയങ്ങള്‍ കാലാവസ്ഥാ വ്യതിയാനങ്ങളും ഭൂമിശാസ്ത്രപരമായ പ്രത്യേകതകളും ഒത്തുചേരുമ്പോഴാണ് സംഭവിക്കുന്നത്. ശാസ്ത്രത്തിന് പലതിനും ഉത്തരമുണ്ടെങ്കിലും, പ്രകൃതിയുടെ ഈ വിചിത്രമായ കരുനീക്കങ്ങള്‍ ഇന്നും മനുഷ്യന് ഒരു അത്ഭുതമാണ്.