കവസാക്കി 2026 മോഡല്‍ നിഞ്ച 650 ഇന്ത്യന്‍ വിപണിയില്‍ ; വിലയും ഫീച്ചറുകളും അറിയാം

കവസാക്കി 2026 മോഡല്‍ നിഞ്ച 650 ഇന്ത്യന്‍ വിപണിയില്‍ പുറത്തിറക്കിയിരിക്കുകയാണ്. മുന്‍പുളള മോഡലിനേക്കാള്‍ 14,000 രൂപ കൂടുതലാണ് ഈ പുതിയ പതിപ്പിന് കമ്പനി നിശ്ചയിച്ചിരിക്കുന്ന വില. നിലവിലെ എക്‌സ്-ഷോറൂം വില 7.91 ലക്ഷം രൂപയാണ്. പുതിയൊരു 'ലൈം ഗ്രീന്‍' കളര്‍ സ്‌കീമിലാണ് പ്രധാന അപ്‌ഡേറ്റ് വരുന്നത്. ഇരട്ട എല്‍ഇഡി ഹെഡ്ലാമ്പുകള്‍, എയറോഡൈനാമിക് മുന്‍ വിന്‍ഡ്ഷീല്‍ഡ്, ഷാര്‍പ്പ് നിഞ്ചാ സ്‌റ്റൈലിംഗ്, സ്‌പോര്‍ട്ടി സ്പ്ലിറ്റ് സീറ്റുകള്‍, മസ്‌കുലര്‍ ഫ്യുവല്‍ ടാങ്ക്, പൂര്‍ണ്ണമായി ഫെയറിങ് ചെയ്ത ഡിസൈന്‍, വീതിയുള്ള മിററുകള്‍, കവസാക്കിയുടെ റേസിംഗ് ലൈവറി എന്നിവയെല്ലാം മാറ്റമില്ലാതെ തുടരുന്നുണ്ട്.

649 സിസി, പാരലല്‍-ട്വിന്‍, DOHC, ലിക്വിഡ്-കൂള്‍ഡ് എഞ്ചിനാണ് നിഞ്ച 650-ക്ക് കരുത്ത് പകരുന്നത്. ഈ എഞ്ചിന്‍ 8,000 rpm-ല്‍ 68 PS കരുത്തും 6,700 rpm-ല്‍ 62.1 Nm ടോര്‍ക്കും ഉത്പാദിപ്പിക്കുന്നു. റിച്ചേണ്‍ ഷിഫ്‌റ്റോടു കൂടിയ 6-സ്പീഡ് ഗിയര്‍ബോക്‌സാണ് ഇതിനൊപ്പം ജോടിയാക്കിയിരിക്കുന്നത്. 2-മോഡ് KTRC (കവസാക്കി ട്രാക്ഷന്‍ കണ്‍ട്രോള്‍), റൈഡോളജി ആപ്പ് വഴിയുള്ള സ്മാര്‍ട്ട്ഫോണ്‍ കണക്റ്റിവിറ്റി, 4.3 ഇഞ്ച് TFT കളര്‍ ഇന്‍സ്ട്രുമെന്റ് ക്ലസ്റ്റര്‍, അസിസ്റ്റ്, സ്ലിപ്പര്‍ ക്ലച്ച്, ഡ്യുവല്‍ ത്രോട്ടില്‍ വാല്‍വുകള്‍, ഡ്യുവല്‍-ചാനല്‍ എബിഎസ് എന്നിവയെല്ലാമാണ് നിഞ്ചയിലെ പ്രധാന പ്രീമിയം ഫീച്ചറുകളായി എടുത്തു പറയേണ്ടത്.

ഉയര്‍ന്ന ടെന്‍സൈല്‍ സ്റ്റീല്‍ ട്രെല്ലിസ് ഫ്രെയിമിലാണ് നിഞ്ച 650 നിര്‍മ്മിച്ചിരിക്കുന്നത്. മുന്നില്‍ 41mm ടെലിസ്‌കോപിക് ഫോര്‍ക്കും പിന്നില്‍ ഹോറിസോണ്ടല്‍ ബാക്ക്-ലിങ്ക് മോണോഷോക്കുമാണ് സസ്‌പെന്‍ഷന്‍. ബ്രേക്കിംഗിനായി മുന്നില്‍ 300mm ഡ്യുവല്‍ സെമി-ഫ്‌ലോട്ടിംഗ് പെറ്റല്‍ ഡിസ്‌കുകളും പിന്നില്‍ 220mm സിംഗിള്‍ പെറ്റല്‍ ഡിസ്‌കുമാണുള്ളത്. 17 ഇഞ്ച് അലോയ് വീലുകളില്‍ ട്യൂബ്ലെസ് ടയറുകള്‍ ഘടിപ്പിച്ചിരിക്കുന്നു.