'അഞ്ച് ജെറ്റുകള്‍ വെടിവച്ചു വീഴ്ത്തി' : ഓപ്പറേഷന്‍ സിന്ദൂരുമായി ബന്ധപ്പെട്ട് മറ്റൊരു അവകാശവാദവുമായി ട്രംപ്

ന്യൂഡല്‍ഹി: പഹല്‍ഗാം ഭീകരാക്രമണത്തെത്തുടര്‍ന്ന് ഇന്ത്യയും പാകിസ്ഥാനും തമ്മില്‍ അടുത്തിടെ ഉണ്ടായ സംഘര്‍ഷത്തില്‍ വിവാദ പ്രസ്താവനകളും അവകാശവാദങ്ങളും തുടര്‍ന്ന് അമേരിക്കന്‍ പ്രസിഡന്റ് ഡൊണാള്‍ഡ് ട്രംപ്. സംഘര്‍ഷത്തിനിടയില്‍ 'അഞ്ച് ജെറ്റുകള്‍ വെടിവച്ചിട്ടതായി' യുഎസ് പ്രസിഡന്റ് വെള്ളിയാഴ്ച അവകാശപ്പെട്ടു. വൈറ്റ് ഹൗസില്‍ റിപ്പബ്ലിക്കന്‍ നിയമസഭാംഗങ്ങളുമായുള്ള സ്വകാര്യ അത്താഴവിരുന്നില്‍ നടത്തിയ പ്രസ്താവനയില്‍, പക്ഷേ ഏത് രാജ്യത്തിന്റെ വിമാനങ്ങളാണ് വെടിവച്ചിട്ടതെന്ന് വ്യക്തമാക്കിയില്ല.

'വാസ്തവത്തില്‍, വിമാനങ്ങള്‍ ആകാശത്ത് നിന്ന് വെടിവയ്ക്കുകയായിരുന്നു. അഞ്ച്, അഞ്ച്, നാലോ അഞ്ചോ, പക്ഷേ അഞ്ച് ജെറ്റുകള്‍ യഥാര്‍ത്ഥത്തില്‍ വെടിവച്ചിട്ടതായി ഞാന്‍ കരുതുന്നു.' ആണവായുധങ്ങളുള്ള അയല്‍ക്കാര്‍ തമ്മിലുള്ള ഹ്രസ്വവും എന്നാല്‍ തീവ്രവുമായ സൈനിക കൈമാറ്റത്തെ പരാമര്‍ശിച്ച് ട്രംപ് പറഞ്ഞു. വിശദാംശങ്ങള്‍ ഇല്ലെങ്കിലും ട്രംപിന്റെ അവകാശവാദം ഓപ്പറേഷന്‍ സിന്ദൂറിലേക്ക് വീണ്ടും ശ്രദ്ധ തിരിച്ചുവിട്ടിരിക്കുകയാണ്. എന്നിരുന്നാലും അവകാശവാദത്തെ പിന്തുണയ്ക്കുന്ന ഒന്നും അമേരിക്കയും പുറത്തുവിട്ടിട്ടില്ല.

നേരത്തേ ഇന്ത്യയുടെ ജെറ്റുകളെ വെടിവെച്ചിട്ടെന്നും അതില്‍ മൂന്ന് ഫ്രഞ്ച് നിര്‍മ്മിത റാഫേല്‍ യുദ്ധവിമാനങ്ങള്‍ ഉണ്ടായിരുന്നതായും ഇന്ത്യന്‍ പൈലറ്റുമാരെ പിടികൂടിയെന്നും പാകിസ്താന്‍ അവകാശവാദം ഉന്നയിച്ചിരുന്നു. എന്നാല്‍ ഇതിന് തക്കതായ തെളിവു നല്‍കാന്‍ പാകിസ്താന് കഴിഞ്ഞിരുന്നതുമില്ല. എന്നാല്‍ വടിനിര്‍ത്തലിന് ശേഷമുള്ള ആഴ്ചകളില്‍, ഇന്ത്യന്‍ വ്യോമസേന വിമാനങ്ങള്‍ നഷ്ടപ്പെട്ടുവെന്ന് ഇന്ത്യന്‍ പ്രതിരോധ മേധാവി ജനറല്‍ അനില്‍ ചൗഹാന്‍ സമ്മതിച്ചെങ്കിലും ആറ് ഇന്ത്യന്‍ ജെറ്റുകള്‍ നശിപ്പിക്കപ്പെട്ടുവെന്ന പാക് വിവരണം തള്ളിക്കളഞ്ഞു.

'ജെറ്റ് തകര്‍ന്നതല്ല, മറിച്ച് അവ എന്തിനാണ് തകര്‍ന്നതെന്നതാണ് പ്രധാനം,' മെയ് മാസത്തില്‍ സിംഗപ്പൂരില്‍ നടന്ന ഷാംഗ്രി-ലാ ഡയലോഗില്‍ ജനറല്‍ ചൗഹാന്‍ ബ്ലൂംബെര്‍ഗ് ടിവിയോട് പറഞ്ഞു. 'എണ്ണം പ്രധാനമല്ല.' തുടര്‍ന്ന് ജനറല്‍ ചൗഹാന്‍ പാകിസ്ഥാന്‍ പ്രദേശത്തിനുള്ളില്‍ തന്ത്രങ്ങള്‍ വേഗത്തില്‍ പൊരുത്തപ്പെടുത്താനും, ആദ്യകാല പിഴവുകളില്‍ നിന്ന് പഠിക്കാനും, തുടര്‍ന്നുള്ള വിജയകരമായ ദീര്‍ഘദൂര കൃത്യതയുള്ള ആക്രമണങ്ങള്‍ നടത്താനുമുള്ള ഇന്ത്യയുടെ കഴിവിനെക്കുറിച്ച് വിവരിച്ചു.

'300 കിലോമീറ്റര്‍ ഉള്ളില്‍, ഒരു മീറ്ററിന്റെ കൃത്യതയോടെ പാകിസ്ഥാന്റെ വ്യോമ പ്രതിരോധമുള്ള വ്യോമതാവളങ്ങളില്‍ കൃത്യമായ ആക്രമണങ്ങള്‍ നടത്താന്‍ ഞങ്ങള്‍ക്ക് കഴിഞ്ഞു,' അദ്ദേഹം പറഞ്ഞു. ഒരു റാഫേല്‍ യുദ്ധവിമാനവും നഷ്ടപ്പെട്ടിട്ടില്ലെന്ന് ഇന്ത്യ സ്ഥിരമായി പറഞ്ഞിട്ടുണ്ട്, ഇന്ത്യന്‍ പൈലറ്റുമാരെ പിടികൂടുകയോ തടങ്കലില്‍ വയ്ക്കുകയോ ചെയ്തിട്ടില്ലെന്നും നിഷേധിച്ചിട്ടുണ്ട്.

ജൂണ്‍ 15 ന്, റഫേലിന്റെ ഫ്രഞ്ച് നിര്‍മ്മാതാക്കളായ ദസ്സാള്‍ട്ട് ഏവിയേഷന്റെ ചെയര്‍മാനും സിഇഒയുമായ എറിക് ട്രാപ്പിയര്‍ പാകിസ്ഥാന്റെ അവകാശവാദങ്ങളെ 'വസ്തുതാപരമായി തെറ്റാണ്' എന്ന് വിളിച്ചു. മെയ് 10 ന് പ്രഖ്യാപിച്ച വെടിനിര്‍ത്തല്‍ യുഎസ് നയതന്ത്ര ഇടപെടലിന്റെ ഫലമാണെന്ന് ട്രംപ് ആവര്‍ത്തിച്ചു, എന്നിരുന്നാലും ഇന്ത്യ ആ വിവരണത്തില്‍ നിന്ന് നിരന്തരം പിന്മാറി.