സ്വർണ്ണവിലയിൽ വൻ കുതിപ്പ്; പവന് ഇന്ന് 1840 രൂപ കൂടി 1,20,000 രൂപയിലെത്തി

സംസ്ഥാനത്തെ സ്വർണ്ണവിലയിൽ ഇന്ന് വൻ കുതിപ്പ്. കഴിഞ്ഞ കുറച്ചുദിവസങ്ങളായി വിപണിയിൽ രേഖപ്പെടുത്തിയിരുന്ന ഇടിവിന് വിരാമമിട്ടുകൊണ്ടാണ് ഇന്നത്തെ കുത്തനെയുള്ള വർദ്ധനവ്. ഇന്നലെ രാവിലെയും വൈകുന്നേരവുമായി 1200 രൂപ കുറഞ്ഞ വിപണിയിൽ ഇന്ന് ഒറ്റയടിക്ക് 1840 രൂപയാണ് വർദ്ധിച്ചത്.

ഇതോടെ ഒരു പവൻ സ്വർണ്ണത്തിന് ഇന്ന് നൽകേണ്ടി വരുന്നത് 1,20,000 രൂപയാണ്. ഒരു ഗ്രാം സ്വർണ്ണത്തിന് 15,000 രൂപ എന്ന നിരക്കിലാണ് ഇന്ന് വ്യാപാരം പുരോഗമിക്കുന്നത്. മാർച്ച് ഒന്നിന് പവൻ വില 1.26 ലക്ഷം രൂപയിലേക്ക് കടന്നിരുന്നുവെങ്കിലും പിന്നീടുള്ള ദിവസങ്ങളിൽ വില താഴേക്ക് വന്നിരുന്നു.

പശ്ചിമേഷ്യയിൽ ഇറാൻ-ഇസ്രായേൽ സംഘർഷം കടുക്കുന്നതാണ് സ്വർണ്ണവില വീണ്ടും ഉയരാൻ പ്രധാന കാരണമാകുന്നത്. യുദ്ധം കൂടുതൽ മേഖലകളിലേക്ക് വ്യാപിക്കുമെന്ന ഭീതിയും നിക്ഷേപകരെ വീണ്ടും സ്വർണ്ണത്തിലേക്ക് ആകർഷിക്കുകയാണ്.

സുരക്ഷിത നിക്ഷേപമെന്ന നിലയിൽ ആഗോളതലത്തിൽ സ്വർണ്ണത്തിന് ഡിമാൻഡ് വർദ്ധിച്ചത് അന്താരാഷ്ട്ര വിപണിയിൽ വില ഉയരാൻ കാരണമായി. അമേരിക്കൻ ഡോളറിന്റെ മൂല്യത്തിലുണ്ടാകുന്ന ചാഞ്ചാട്ടവും യുഎസ് ഫെഡറൽ റിസർവിന്റെ നയങ്ങളും വിപണിയെ അസ്ഥിരപ്പെടുത്തുന്നുണ്ട്.