ലോകം യുദ്ധഭീതിയിലിരിക്കെ ബ്രിട്ടീഷ് പാര്‍ലമെന്റിനുള്ളില്‍ എംപിമാരുടെ നൃത്തം: വ്യാപക പ്രതിഷേധം

ലോകരാജ്യങ്ങള്‍ യുദ്ധത്തിന്റെ വക്കില്‍ നില്‍ക്കെ, ബ്രിട്ടീഷ് പാര്‍ലമെന്റിനുള്ളില്‍ നാല്‍പ്പതോളം എംപിമാര്‍ നൃത്തം ചെയ്യുന്ന ദൃശ്യങ്ങള്‍ പുറത്തുവന്നത് വന്‍ വിവാദമാകുന്നു. പ്രശസ്ത ടെലിവിഷന്‍ പരിപാടിയായ 'സ്ട്രിക്റ്റ്‌ലി കം ഡാന്‍സിംഗിലെ' താരങ്ങള്‍ക്കൊപ്പം ജനപ്രതിനിധികള്‍ ചുവടുവെക്കുന്ന വീഡിയോയാണ് സമൂഹമാധ്യമങ്ങളില്‍ വ്യാപകമായി പ്രചരിക്കുന്നത്. മിഡില്‍ ഈസ്റ്റില്‍ സംഘര്‍ഷം രൂക്ഷമായിരിക്കുന്ന ഘട്ടത്തില്‍ ഇത്തരമൊരു ആഘോഷം സംഘടിപ്പിച്ചത് തികച്ചും അനുചിതമാണെന്ന വിമര്‍ശനം ഇതിനകം ഉയര്‍ന്നു കഴിഞ്ഞു.

നൃത്തം ആരോഗ്യത്തിലും മാനസിക ഉല്ലാസത്തിലും ചെലുത്തുന്ന ഗുണപരമായ സ്വാധീനത്തെക്കുറിച്ച് അവബോധം നല്‍കാനാണ് കഴിഞ്ഞ വ്യാഴാഴ്ച പാര്‍ലമെന്റ് സമുച്ചയത്തില്‍ ഈ പരിപാടി സംഘടിപ്പിച്ചത്. വിവിധ രാഷ്ട്രീയ പാര്‍ട്ടികളിലെ പ്രമുഖ എംപിമാര്‍ പ്രൊഫഷണല്‍ കൊറിയോഗ്രാഫര്‍മാരുടെ നിര്‍ദ്ദേശാനുസരണം നൃത്തം ചെയ്യുന്നതാണ് വീഡിയോയിലുള്ളത്. എന്നാല്‍, രാജ്യം സുരക്ഷാ ഭീഷണികളും സാമ്പത്തിക പ്രതിസന്ധിയും നേരിടുമ്പോള്‍ പാര്‍ലമെന്റ് പോലൊരു സ്ഥലത്ത് ഇത്തരം വിനോദങ്ങള്‍ നടത്തിയത് ജനങ്ങള്‍ക്കിടയില്‍ വലിയ അമര്‍ഷമുണ്ടാക്കി.

സംഭവത്തിനെതിരെ ലേബര്‍ പാര്‍ട്ടി എംപി സറ സുല്‍ത്താന ഉള്‍പ്പെടെയുള്ളവര്‍ ശക്തമായി രംഗത്തെത്തി. 'ലോകം യുദ്ധത്തിലേക്ക് നീങ്ങുമ്പോള്‍ എംപിമാര്‍ നൃത്തം ചെയ്യുന്നത് പാര്‍ലമെന്റിന്റെ നിലവാരമില്ലായ്മയാണ് കാണിക്കുന്നത്' എന്ന് അവര്‍ എക്‌സില്‍ കുറിച്ചു. ബ്രിട്ടന്റെ സുരക്ഷാ വിഷയങ്ങളില്‍ ഗൗരവകരമായ ചര്‍ച്ചകള്‍ നടക്കേണ്ട സമയത്ത് ഇത്തരം ആഘോഷങ്ങള്‍ പൊതുജനങ്ങള്‍ക്ക് മോശം സന്ദേശമാണ് നല്‍കുന്നതെന്ന് മുന്‍ മന്ത്രിമാരും അഭിപ്രായപ്പെട്ടു. സാധാരണക്കാരും സമൂഹമാധ്യമങ്ങളിലൂടെ തങ്ങളുടെ പ്രതിഷേധം അറിയിച്ചു. രാജ്യം ആഗോളതലത്തില്‍ വലിയ അടിയന്തരാവസ്ഥ നേരിടുമ്പോള്‍ ജനപ്രതിനിധികള്‍ നികുതിപ്പണം ഉപയോഗിച്ച് ആഘോഷം നടത്തുന്നത് മാപ്പര്‍ഹിക്കാത്ത കുറ്റമാണെന്നാണ് പലരും പരിഹസിക്കുന്നത്.

🔴 MPs dance with Strictly Come Dancing stars amid Iran crisis pic.twitter.com/lXst8xK33z— The Telegraph (@Telegraph) March 4, 2026