സോഷ്യല്‍ മീഡിയയില്‍ തരംഗമാകുന്ന കൊറിയന്‍ ഗ്ലാസ് സ്‌കിന്‍: കാത്തിരിക്കുന്നത് വന്‍ അപകം, മുന്നറിയിപ്പുമായി വിദ്ഗധര്‍

ഇന്ന് സോഷ്യല്‍ മീഡിയയില്‍ ഏറെ തരംഗമായി മാറിക്കൊണ്ടിരിക്കുന്ന ഒന്നാണ് കൊറിയന്‍ ഗ്ലാസ് സ്‌കിന്‍. വെറും ഏഴു ദിവസം കൊണ്ട് മുഖം കണ്ണാടി പോലെ തിളങ്ങും എന്നൊക്കെയുള്ള പരസ്യങ്ങള്‍ കണ്ടാണ് പലരും ഇത്തരം ക്രീമുകളും ലോഷനുകളും വാങ്ങുന്നത്. എന്നാല്‍ പ്രിയപ്പെട്ട ഇന്‍ഫ്‌ലുവന്‍സര്‍മാര്‍ പറയുന്നത് കേട്ട് ഇത്തരം ഉല്‍പ്പന്നങ്ങള്‍ വാങ്ങി ഉപയോഗിക്കുന്നത് വലിയ അപകടമാണെന്ന് മുന്നറിയിപ്പ് നല്‍കുകയാണ് ആരോഗ്യ വിദഗ്ധര്‍.

ഡോക്ടറുടെ ഉപദേശം ഇല്ലാതെ ഇത്തരം ക്രീമുകള്‍ ഉപയോഗിക്കുന്നത് ചര്‍മ്മത്തിന് ദോഷം ചെയ്യും. ഇവയിലടങ്ങിയിരിക്കുന്ന രാസവസ്തുക്കള്‍ കാരണം മുഖത്ത് അലര്‍ജി, ചൊറിച്ചില്‍, ചുവന്ന പാടുകള്‍ എന്നിവ വരാന്‍ സാധ്യതയുണ്ട്. ചില ഉല്‍പ്പന്നങ്ങളില്‍ അടങ്ങിയിരിക്കുന്ന സ്റ്റിറോയിഡുകള്‍ ചര്‍മ്മത്തെ പാടേ നശിപ്പിക്കാന്‍ പോലും കാരണമായേക്കാം.

പല ക്രീമുകളിലും മെര്‍ക്കുറി എന്ന വിഷാംശം അടങ്ങിയിട്ടുണ്ടെന്ന് പഠനങ്ങള്‍ പറയുന്നു. ഇത് മുഖത്തെ കറുപ്പ് നിറം കുറച്ച് പെട്ടെന്ന് വെളുപ്പിക്കുമെങ്കിലും ശരീരത്തിന് വളരെ ദോഷകരമാണ്. മെര്‍ക്കുറി നമ്മുടെ നാഡീവ്യവസ്ഥയെയും വൃക്കകളെയും ബാധിക്കാന്‍ സാധ്യതയുണ്ട്. അതുകൊണ്ട് വെളുക്കാന്‍ വേണ്ടി ഇത്തരം കെണികളില്‍ വീഴാതിരിക്കാന്‍ ശ്രദ്ധിക്കണമെന്ന് ഫാര്‍മക്കോ വിജിലന്‍സ് ഉദ്യോഗസ്ഥ രശ്മി അരവിന്ദ് വ്യക്തമാക്കുന്നു.

ആരോഗ്യമുള്ള ചര്‍മ്മത്തിന് കൃത്യമായ ഭക്ഷണവും വെള്ളവുമാണ് വേണ്ടത്. പരസ്യങ്ങളില്‍ കാണുന്ന തിളക്കം കണ്ട് വഞ്ചിതരാകാതെ, ഏതെങ്കിലും ഉല്‍പ്പന്നം ഉപയോഗിക്കുന്നതിന് മുന്‍പ് ഒരു ചര്‍മ്മരോഗ വിദഗ്ധന്റെ അഭിപ്രായം തേടുന്നത് എപ്പോഴും നല്ലതാണ്. സുരക്ഷിതമായ രീതിയില്‍ സൗന്ദര്യം സംരക്ഷിക്കുന്നതാണ് ബുദ്ധി.