റിയല്‍മി സി83 5ജി എത്താന്‍ ഒരുങ്ങുന്നു ; ഫീച്ചറുകള്‍ വെളിപ്പെടുത്തി റിയല്‍മി

റിയല്‍മി തങ്ങളുടെ സി സീരീസില്‍ പുതിയ 5ജി സ്മാര്‍ട്ട്‌ഫോണ്‍ അവതരിപ്പിക്കാന്‍ പോകുന്നു. കഴിഞ്ഞ വര്‍ഷത്തെ റിയല്‍മി സി73 5ജിയുടെ പിന്‍ഗാമിയായി റിയല്‍മി സി83 5ജി (realme C83 5G) എന്ന പുതിയ ഫോണ്‍ ആണ് വരാന്‍ പോകുന്നത്. മാര്‍ച്ച് 7ന് റിയല്‍മി സി83 5ജിയുടെ ഇന്ത്യന്‍ ലോഞ്ച് നടക്കുമെന്ന് കമ്പനി ഇപ്പോള്‍ ഔദ്യോഗികമായി സ്ഥിരീകരിച്ചിരിക്കുന്നു. ലോഞ്ച് തിയതി സ്ഥിരീകരിച്ചത് കൂടാതെ റിയല്‍മി സി83 5ജിയുടെ ചില ഫീച്ചറുകളും കമ്പനി വെളിപ്പെടുത്തിയിട്ടുണ്ട്. റിയല്‍മിയുടെ ഔദ്യോഗിക വെബ്‌സൈറ്റില്‍ ഈ മോഡലിനായി ആരംഭിച്ച പേജിലൂടെയാണ് ഫീച്ചറുകള്‍ സ്ഥിരീകരിച്ചിരിക്കുന്നത്.

6 വര്‍ഷം വരെ വിശ്വസനീയമായ ഉപയോഗം, റിവേഴ്സ് വയര്‍ഡ് ചാര്‍ജിംഗ്, ബൈപാസ് ചാര്‍ജിംഗ് എന്നിവയുടെ പിന്തുണയോടെയാണ് റിയല്‍മി സി83 5ജിയിലെ 7000mAh ബാറ്ററി എത്തുന്നത് എന്ന വിവരവും റിയല്‍മി സ്ഥിരീകരിച്ചു. കൂടാതെ ഇതില്‍ പൊടി, ജല പ്രതിരോധത്തിനായി IP64 റേറ്റിങ് ഉണ്ട് എന്നതും ഉറപ്പിക്കപ്പെട്ടിരിക്കുന്നു. ടീസറുകളിലൂടെ റിയല്‍മി സി83 5ജിയുടെ ഡിസൈന്‍ സൂചനകളും ലഭ്യമായിട്ടുണ്ട്. പരിചിതമായ ഒരു ലംബ ക്യാമറ ഡെക്കോ ഹൗസിംഗ് ഡ്യുവല്‍ റിയര്‍ ക്യാമറകള്‍ ഇതില്‍ ഉണ്ടായിരിക്കും. ബ്ലൂമിംഗ് പര്‍പ്പിള്‍, സ്പ്രൗട്ടിംഗ് ഗ്രീന്‍ എന്നീ രണ്ട് കളര്‍ ഓപ്ഷനുകളിലാണ് റിയല്‍മി സി83 5ജി വിപണിയില്‍ എത്തുക.

MIL-STD 810H മിലിട്ടറി-ഗ്രേഡ് ഷോക്ക് റെസിസ്റ്റന്‍സ് സര്‍ട്ടിഫിക്കേഷന്‍ റിയല്‍മി സി83 5ജിക്ക് ഉണ്ട്. സ്‌ക്രീന്‍ സൈസ് വെളിപ്പെടുത്തിയിട്ടില്ലെങ്കിലും, 144Hz റിഫ്രഷ് റേറ്റ് സ്‌ക്രീന്‍ ആണ് ഇതില്‍ ഉണ്ടാകുക എന്ന വിവരവും സ്ഥിരീകരിച്ചിട്ടുണ്ട്. സ്മാര്‍ട്ട്‌ഫോണുകള്‍ക്ക് ഈ വര്‍ഷം പൊതുവില്‍ വില വര്‍ധിച്ചതിനാല്‍ മുന്‍ഗാമിയായ സി73 5ജിയെക്കാള്‍ അല്‍പ്പം ഉയര്‍ന്ന വിലയിലാകും സി83 5ജി എത്തുക എന്ന് പ്രതീക്ഷിക്കുന്നു. മാര്‍ച്ച് 7ലെ ലോഞ്ചിന് ശേഷം ഫ്‌ലിപ്കാര്‍ട്ട്, റിയല്‍മി ഓണ്‍ലൈന്‍ സ്റ്റോര്‍, ഓഫ്ലൈന്‍ സ്റ്റോറുകള്‍ എന്നിവ വഴി റിയല്‍മി C83 5G വില്‍പ്പനയ്ക്ക് എത്തും.