ജീവകാരുണ്യ മേളയിൽ ഇന്ത്യൻ സാംസ്കാരിക സാന്നിധ്യം തിളങ്ങി; ജിദ്ദയിൽ ഇന്ത്യയുടെ വൈവിധ്യം ആഘോഷമായി

ജിദ്ദ:അൽ ഊല വുമൻസ് വെൽഫെയർ സൊസൈറ്റി ജിദ്ദ പാർക്ക് ഹയാത്തിൽ സംഘടിപ്പിച്ച പത്താമത് ‘എ കപ്പ് ഫോർ എ ഗുഡ് കോസ്’ വാർഷിക ജീവകാരുണ്യ മേളയിൽ ഇന്ത്യൻ പവലിയൻ പ്രധാന ആകർഷണങ്ങളിലൊന്നായി. ഫെബ്രുവരി 5 മുതൽ 7 വരെ നടന്ന മേളയിൽ ജിദ്ദ ഇന്ത്യൻ കോൺസുലേറ്റിന്റെ സജീവ പങ്കാളിത്തം ഇന്ത്യയുടെ സമൃദ്ധമായ സാംസ്കാരിക പൈതൃകവും സാമൂഹിക സേവനങ്ങളോടുള്ള പ്രതിബദ്ധതയും വ്യക്തമാക്കി.

ഇന്ത്യൻ കോൺസുലേറ്റ് സ്പൗസസ് അസോസിയേഷൻ പ്രസിഡന്റ് ഫഹ്മിന ഖാത്തൂണിന്റെ നേതൃത്വത്തിൽ ഒരുക്കിയ പവലിയനിൽ ഇന്ത്യയുടെ പരമ്പരാഗത കരകൗശല വസ്തുക്കൾ, കലാഭരിതമായ ആഭരണങ്ങൾ, വർണ്ണാഭമായ വസ്ത്രങ്ങൾ, വിവിധ ഇന്ത്യൻ രുചികൾ ഉൾക്കൊള്ളുന്ന വിഭവങ്ങൾ എന്നിവ അവതരിപ്പിച്ചു. മേളയുടെ മൂന്ന് ദിവസങ്ങളിലും ഇന്ത്യൻ പവലിയനിൽ സന്ദർശകരുടെ വലിയ ഒഴുക്കാണ് ഉണ്ടായിരുന്നത്.
മേളയുടെ ഉദ്ഘാടന ചടങ്ങിൽ കോൺസുൽ ജനറൽ ഫഹദ് അഹമ്മദ് ഖാൻ സൂരി പങ്കെടുത്തു. സാമൂഹിക ഉത്തരവാദിത്വം മുൻനിർത്തിയ ഇത്തരം പ്രവർത്തനങ്ങൾ അഭിനന്ദനാർഹമാണെന്നും, ഇത്തരത്തിലുള്ള സംരംഭങ്ങൾക്ക് കോൺസുലേറ്റിന്റെ പൂർണ പിന്തുണ തുടരുമെന്നും അദ്ദേഹം വ്യക്തമാക്കി.

മേളയുടെ ഭാഗമായി യുവകലാകാരന്മാർ അവതരിപ്പിച്ച സാംസ്കാരിക പ്രകടനങ്ങൾ ഇന്ത്യയുടെ കലാസമ്പത്തും സൃഷ്ടിപരമായ പാരമ്പര്യവും മനോഹരമായി അവതരിപ്പിച്ചു. സാംസ്കാരിക കൈമാറ്റങ്ങളിലൂടെ രാജ്യങ്ങൾക്കിടയിലെ സൗഹൃദവും പരസ്പര ബോധ്യവും ശക്തിപ്പെടുത്താൻ ഇത്തരം പങ്കാളിത്തങ്ങൾ സഹായിക്കുമെന്ന് കോൺസുലേറ്റ് പുറത്തിറക്കിയ വാർത്താകുറിപ്പിൽ അറിയിച്ചു.

(ഇ കെ ബാദുഷ)