മൂന്ന് ഭരതനാട്യക്കാരും ഒരു ഭരതനാട്യക്കാരനും; ചിത്രം പങ്കുവെച്ച് സാജന്‍ സൂര്യ , അടിപൊളി കുടുംബചിത്രമെന്ന് ആരാധകർ

photo-/www.instagram.com/sajansooreya/

മിനിസ്‌ക്രീന്‍ പ്രേക്ഷകരുടെ സ്വന്തം നായകന്‍മാരിലൊരാളാണ് സാജന്‍ സൂര്യ. സീരിയലിൽ നിത്യഹരിത നായകനാണെങ്കിലും മുതിർന്ന രണ്ടു പെൺകുട്ടികളുടെ അച്ഛൻ കൂടിയാണ് സാജൻ സൂര്യ. മക്കളുടെ വിശേഷങ്ങളും മക്കൾക്കൊപ്പമുള്ള ചിത്രങ്ങളുമെല്ലാം സാജൻ സൂര്യ ഇടയ്ക്ക് സമൂഹമാധ്യമങ്ങളിലൂടെ പങ്കിടാറുണ്ട്. സാജന്റെ പുതിയ ഇൻസ്റ്റഗ്രാം പോസ്റ്റാണ് ഇപ്പോൾ ശ്രദ്ധ നേടുന്നത്.

ഭാര്യ വിനിത സാജൻ, മക്കളായ മീനാക്ഷി, മാളവിക എന്നിവർക്കൊപ്പം നിൽക്കുന്ന ചിത്രമാണ് സാജൻ പങ്കിട്ടിരിക്കുന്നത്. ഭാര്യയും മക്കളുമെല്ലാം ഭരതനാട്യം കോസ്റ്റ്യൂമിൽ ആണ്. കൊല്ലൂർ മൂകാംബിക ക്ഷേത്രത്തിൽ വച്ചെടുത്തതാണ് ചിത്രം. "3 ഭരതനാട്യക്കാരും ഒരു നാട്യക്കാരനും," എന്ന അടിക്കുറിപ്പോടെയാണ് സാജൻ ചിത്രം പങ്കുവച്ചത്.

View this post on Instagram

A post shared by Sajansooreya Sooreya (@sajansooreya)

24 വർഷമായി മലയാള സീരിയൽ രംഗത്ത് സജീവസാന്നിധ്യമാണ് സാജൻ സൂര്യ. സ്ത്രീയിലെ ഗോപനും അമ്മതൊട്ടിലിലെ ശരത് ചന്ദ്രനും കുങ്കുമപൂവിലെ മഹേഷുമെല്ലാം സാജൻ സൂര്യയെ മിനിസ്ക്രീൻ പ്രേക്ഷകരുടെ പ്രിയങ്കരനാക്കിയ കഥാപാത്രങ്ങളാണ്.

തിരുവനന്തപുരം ഏണിക്കര സ്വദേശിയാണ് സാജൻ സൂര്യ. ജ്വാലയായ്, ഡിറ്റക്ടീവ് ആനന്ദ് എന്നീ സീരിയലുകളാണ് സാജൻ സൂര്യയ്ക്ക് ജനശ്രദ്ധ നേടികൊടുത്തത്. 'ബംഗ്ലാവില്‍ ഔത' എന്ന ചിത്രത്തിൽ ശ്രദ്ധേയമായ കഥാപാത്രത്തെ അവതരിപ്പിച്ചു. ഭാവനയുടെ ജോഡിയായിട്ടാണ് സാജൻ അഭിനയിച്ചത്. കുങ്കുമപ്പൂവ്, ഭാര്യ തുടങ്ങിയ സീരിയലുകളിലെയും കഥാപാത്രങ്ങള്‍ ശ്രദ്ധിക്കപ്പെട്ടു.

അഭിനയത്തിനു പുറമെ, തന്റെ സർക്കാർ ജോലിയും ബാലൻസ് ചെയ്തു കൊണ്ടുപോവുകയാണ് സാജൻ സൂര്യ. ഐ.ജി. ഓഫ് രജിസ്‌ട്രേഷന്‍ ഓഫീസിലാണ് സാജൻ ജോലിചെയ്യുന്നത്. സെക്രട്ടേറിയറ്റിലെ ഉദ്യോഗസ്ഥനായിരുന്ന അച്ഛന്റെ മരണശേഷം സാജനിലേക്ക് എത്തിയ ജോലിയാണിത്.