പിന്നിൽ നിന്ന് അച്ഛനെ കെട്ടിപ്പിടിച്ച്, തോളില്‍ കൈവച്ചിരിക്കുന്ന സഹീറിനെ നോക്കി നിറചിരിയോടെ സോനാക്ഷി; സഹീര്‍ ജനിച്ചതിൽ താന്‍ ഭാഗ്യവതിയെന്ന് താരം

Sonakshi Sinha’s Birthday wish for Zaheer Iqbal

ബോളിവുഡിന്റെ ക്യൂട്ട് പവര്‍ കപ്പിള്‍സാണ് ​ബോളിവുഡ് താരങ്ങളായ സോനാക്ഷി സിന്‍ഹയും സഹീര്‍ ഇക്ബാലും. ഏഴുവര്‍ഷത്തെ പ്രണയത്തിനൊടുവില്‍ കഴിഞ്ഞവര്‍ഷമാണ് ഇവര്‍ വിവാഹിതരായത്. മുതിർന്ന നടനും ടിഎംസി എം.പിയുമായ ശത്രുഘ്നൻ സിൻഹയുടെയും പൂനം സിൻഹയുടേയും പുത്രിയായ സോനാക്ഷികോസ്റ്റ്യൂം ഡിസൈനറെന്ന തന്റെ കരിയർ ഉപേക്ഷിച്ചാണ് അഭിനയരംഗത്ത് എത്തിയത്. 2010ൽ പുറത്തിറങ്ങിയ ‘ദബാംഗ്’ ആയിരുന്നു സോനാക്ഷിയുടെ അരങ്ങേറ്റ ചിത്രം.
മിശ്രവിവാഹമായതു കൊണ്ടു തന്നെ ഇവരുടെ വിവാഹത്തിന് ആദ്യം സോനാക്ഷിയുടെ കുടുംബം എതിര്‍പ്പ് പ്രകടിപ്പിച്ചിരുന്നെങ്കിലും പിന്നീട് സമ്മതം നല്‍കി. സോഷ്യല്‍ മീഡിയയില്‍ സജീവമായ താരദമ്പതിമാരാണ് ഇവര്‍. പരസ്പരം ട്രോളിയും പ്രാങ്കുകള്‍ കാണിച്ചുമുള്ള വീഡിയോകള്‍ ഇവര്‍ പങ്കിടാറുണ്ട്. ജീവിതത്തിന്റെ ഓരോ നിമിഷവും പ്രണയിച്ചും ആസ്വദിച്ചും ജീവിക്കുന്ന ദമ്പതിമാര്‍ കൂടിയാണിവര്‍.
ഇപ്പോഴിതാ തന്റെ ഭര്‍ത്താവ് സഹീര്‍ ഇക്ബാലിന് പ്രണയാതുരമായ ജന്മദിനാശംസകള്‍ കുറിക്കുകയാണ് സൊനാക്ഷി സിന്‍ഹ. തന്റെ അച്ഛനായ ശത്രുഘ്നന്‍ സിന്‍ഹയ്ക്കൊപ്പമുള്ള ചിത്രം പങ്കിട്ടാണ് സൊനാക്ഷി ആശംസകള്‍ കുറിച്ചിരിക്കുന്നത്. ‘‘പ്രധാനപ്പെട്ട ഒരേയൊരു പുരുഷൻ... ഞാൻ നിന്നെ വളരെയധികം സ്നേഹിക്കുന്നു... ജന്മദിനാശംസകൾ... നീ ജനിച്ചതിൽ ഞാന്‍ ഭാഗ്യവതിയാണ്...’’ എന്ന ക്യാപ്ഷന്‍ നല്‍കിയാണ് സൊനാക്ഷി ഇന്‍സ്റ്റഗ്രാം സ്റ്റോറി കുറിച്ചിരിക്കുന്നത്.
തന്റെ ജീവിതത്തിലെ സൂപ്പർഹീറോകൾക്കൊപ്പമുള്ള ചിത്രമാണ് സൊനാക്ഷി പങ്കിട്ടിരിക്കുന്നത്. പിന്നിൽ നിന്ന് അച്ഛനെ കെട്ടിപ്പിടിച്ച് ചിരിക്കുന്ന സോനാക്ഷിയെ ഭർത്താവ് സഹീർ തോളിലൂടെ ചേര്‍ത്തു പിടിച്ചിരിക്കുന്ന ക്യാന്‍ഡിഡ് ചിത്രമാണിത്. സഹീറിനെ നോക്കി നിറചിരിയോടെ നില്‍ക്കുന്ന താരത്തിന്റെ മുഖത്തുള്ള സന്തോഷം കുടുംബത്തിനുള്ളിലുള്ള ഊഷ്മളതയും സ്നേഹവും പ്രകടമാകുന്നുണ്ട്.

ഡിസംബർ 9 ന് 79-ാം വയസ്സിലേക്ക് കടന്ന തന്റെ അമ്മായിയച്ചന്‍ ശത്രുഘ്നൻ സിൻഹയ്ക്ക് സഹീര്‍ ഇൻസ്റ്റാഗ്രാം സ്റ്റോറികളിൽ ഒരു ഊഷ്മള സന്ദേശം പങ്കുവച്ചിരുന്നു. സോണാക്ഷി സിൻഹയുമായുള്ള വിവാഹദിനത്തിലെ ഒരു പഴയകാല ചിത്രം പങ്കിട്ട്, ‘‘ഹാപ്പി ബർത്ത്ഡേ സസുർ ജി...’’ എന്ന് കുറിച്ച് റെഡ് ഇമോജിയുമാണ് താരം പങ്കിട്ടത്. ചിത്രത്തിൽ, നവദമ്പതികൾക്കൊപ്പം അഭിമാനത്തോടെ പോസ് ചെയ്യുന്ന ശത്രുഘ്നൻ സിൻഹയെ കാണാം. പരമ്പരാഗത ചുവന്ന സാരിയിൽ സോനാക്ഷിയും സഹീറും ശത്രുഘ്നനും ആകർഷകമായ ഷെർവാണികളിലും തിളങ്ങുന്നു.

View this post on Instagram

A post shared by Sonakshi Sinha (@aslisona)

ഏഴ് വർഷത്തെ പ്രണയത്തിന് ശേഷം 2024 ജൂൺ 23 ന് മുംബൈയിൽ നടന്ന ഒരു സ്വകാര്യ സിവിൽ ചടങ്ങിൽ വെച്ചാണ് ഇരുവരും വിവാഹിതരായത്. സോനാക്ഷിയുടെയും സഹീറിന്റെയും യാത്ര ആരംഭിച്ചത് അവരുടെ ബന്ധം പരസ്യമാക്കുന്നതിന് വളരെ മുമ്പാണ്. അവർ അടുത്ത സുഹൃത്തുക്കളായി തുടങ്ങിയെങ്കിലും അവരുടെ ബന്ധം ക്രമേണ പ്രണയമായി വളർന്നു.
സൊനാക്ഷി അടുത്തിടെ ജടാധാര എന്ന തെലുങ്ക് ചിത്രത്തിലൂടെയാണ് അരങ്ങേറ്റം കുറിച്ചത്. വെങ്കട്ട് കല്യാണ്‍ സംവിധാനം ചെയ്ത ഈ ചിത്രത്തിൽ സുധീർ ബാബുവും ദിവ്യ ഖോസ്ല കുമാറും സോനാക്ഷിക്കൊപ്പം പ്രധാന വേഷങ്ങളിൽ അഭിനയിക്കുന്നു.
മറുവശത്ത്, നോട്ട്ബുക്ക്, ഡബിൾ എക്സ്എൽ എന്നീ ചിത്രങ്ങളിലെ വേഷങ്ങളിലൂടെ പ്രശസ്തനായ സഹീർ അവസാനമായി കണ്ടത് ജഗപതി ബാബുവും ആയുഷ് ശർമ്മയും പ്രധാന വേഷങ്ങളിൽ അഭിനയിച്ച ആക്ഷൻ കോമഡി ചിത്രമായ റുസ്‌ലാനിലാണ്.