പുതിയ അതിഥി ഉടനെ എത്തും; അച്ഛനാകുന്ന സന്തോഷം പങ്കുവെച്ച് സായി കിരണ്‍

photo-www.instagram.com/sravanthi.official/

വാനമ്പാടിയിലെ മോഹൻ, മലയാളി പ്രേക്ഷകർക്ക് അത്ര പെട്ടന്ന് മറക്കാൻ കഴിയുന്ന കഥാപാത്രമല്ല അത്. ഏഷ്യനെറ്റിൽ സംപ്രേക്ഷണം ചെയ്തിരുന്ന വാനമ്പാടി എന്ന സീരിയലിലെ നായക കഥാപാത്രം ചെയ്തുകൊണ്ടാണ് സായി കിരൺ മലയാളി പ്രേക്ഷകർക്ക് പരിചിതനായത്. പിന്നീടൊരു മലയാളം സീരിയലിലും വന്നില്ല എങ്കിലും മോഹനെ മലയാളികൾ മറന്നിട്ടില്ല.

ജീവിതത്തിലെ പുതിയ ഒരു സന്തോഷ വാർത്ത പങ്കുവച്ച് എത്തിയിരിക്കുകയാണിപ്പോൾ സായി കിരൺ, താനും ഭാര്യയും പുതിയ ആളെ വരവേൽക്കാൻ തയ്യാറായി നിൽക്കുന്നു. ഭാര്യയുടെ വളകാപ്പ് ചിത്രങ്ങൾക്കൊപ്പമാണ് പോസ്റ്റ്. പുതിയ അംഗം ഉടനെ എത്തും എന്ന് പറഞ്ഞുകൊണ്ടാണ് ഫോട്ടോകൾ പങ്കുവച്ചിരിയ്ക്കുന്നത്. ആശംസകളുമായി നിരവധി കമന്റുകൾ വരുന്നുണ്ട്.

2024 ൽ ആയിരുന്നു സായി കിരണിന്റെയും തെലുങ്ക് സീരിയൽ നടി ശ്രാവന്തിയുടെയും വിവാഹം കഴിഞ്ഞത്. നാൽപതിയാറാം വയസ്സിൽ താൻ വിവാഹിതനാകുന്നു എന്ന സന്തോഷ വാർത്ത സോഷ്യൽ മീഡിയയിലൂടെയാണ് അന്നും സായി കിരൺ അറിയിച്ചത്. നിരവധി കോമിക് റീൽ വീഡിയോകൾ ചെയ്യുന്ന സായി കിരൺ ഇതും തമാശയായി പറഞ്ഞതായിരിക്കും എന്നാണ് ആരാധകർ ആദ്യം കരുതിയത്. പിന്നീട് ശ്രാവന്തിയും പോസ്റ്റുമായി എത്തി.

സായി കിരണിന്റെ അച്ഛൻ വി രാമകൃഷ്ണൻ തെലുങ്കിൽ അയ്യായിരത്തിൽ അധികം പാട്ടുകൾ പാടിയിട്ടുള്ള ഗായകനാണ്. അമ്മ ജ്യോതിയും എഴുപതുകൾ മുതൽ ദൂരദർശനിൽ പാട്ടുകൾ പാടുന്ന ആളാണ്. അച്ഛന്റെയും അമ്മയുടെയും സംഗീത വാസനയുണ്ടെങ്കിലും സായി കിരൺ അഭിനയത്തിലാണ് ശ്രദ്ധ കേന്ദ്രീകരിച്ചത്. സിനിമകൾ പലതും ചെയ്തിട്ടുണ്ടെങ്കിലും, നടൻ എന്ന നിലയിൽ ശ്രദ്ധിക്കപ്പെട്ടത് സീരിയലുകളിലൂടെ തന്നെയാണ്.

നേരത്തെ വിവാഹിതനായിരുന്നു സായി കിരൺ. വൈഷ്ണവി എന്നാണ് ആദ്യ ഭാര്യയുടെ പേര്. ആ ബന്ധത്തിൽ ഒരു മകളും പിറന്നിരുന്നു. വിവാഹ ബന്ധം വേർപിരിഞ്ഞ് വർഷങ്ങൾക്ക് ശേഷമാണ് ശ്രാവന്ത്രിയുമായുള്ള പ്രണയ വിവാഹം നടന്നത്.