നാവികരെയും കപ്പലുകളെയും ബേസുകളെയും സംരക്ഷിക്കും, യുഎസ് നേവിയുടെ ആശ്രയമായ ജീവികള്‍

യുഎസ് നേവിയുടെ സഹായകരായ കുറച്ചു ജീവികളാണ് ഇപ്പോള്‍ വാര്‍ത്തകളില്‍ ഇടം നേടുന്നത്. സമുദ്രത്തിനടിയില്‍ ഏതെങ്കിലും വസ്തുക്കള്‍ കണ്ടെത്തേണ്ട സാഹചര്യത്തില്‍ യുഎസ് നാവികസേന ആശ്രയിക്കുന്നത് ഡോള്‍ഫിനുകളെയും കടല്‍സിംഹങ്ങളെയുമാണ്. നേവി മറൈന്‍ മാമല്‍ പ്രോഗ്രാമിന് കീഴിലുള്ളവയാണ് ഇവ. ഈ ജീവികള്‍ക്ക് സമുദ്രാന്തര്‍ഭാഗത്തുള്ള വസ്തുക്കള്‍ മനുഷ്യരെക്കാളും ജലാന്തര ഡ്രോണുകളെക്കാളും വേഗത്തില്‍ കണ്ടെത്താന്‍ കഴിയും. നാവികരെയും കപ്പലുകളെയും ബേസുകളെയുമൊക്കെ സംരക്ഷിക്കാനും സഹായിക്കാനുമായി ഈ ജീവികള്‍ പല ദൗത്യങ്ങളിലും ഏര്‍പ്പെടാറുണ്ട്.

മറൈന്‍ മാമല്‍ അഥവാ സമുദ്ര സസ്തനികള്‍ എന്ന ഗ്രൂപ്പില്‍ പെടുന്നതാണ് ഡോള്‍ഫിനുകളും കടല്‍സിംഹങ്ങളുമൊക്കെ. ഉഷ്ണരക്തവും ശ്വാസകോശങ്ങളും പ്രസവവും പാലൂട്ടലുമൊക്കെയുള്ള ജീവികളാണ് സമുദ്ര സസ്തനികള്‍. 1963ല്‍ ആണ് യുഎസ് നേവി മറൈന്‍ മാമല്‍ പദ്ധതി രൂപീകരിച്ചത്. മനുഷ്യ ഡൈവര്‍മാര്‍ക്ക് പ്രായോഗിക ബുദ്ധിമുട്ടുള്ള ദൗത്യങ്ങള്‍ ചെയ്യാന്‍ ഇവയ്ക്കു കഴിയുമോയെന്നു പരിശോധിക്കുകയായിരുന്നു ലക്ഷ്യം. ഏകദേശം 20 സസ്തനികളെ പരീക്ഷിച്ച ശേഷം ബോട്ടില്‍നോസ് ഡോള്‍ഫിന്‍, കലിഫോര്‍ണിയ സീ ലയണ്‍സ് എന്നീ ജീവികളെ ഉപയോഗിക്കാന്‍ യുഎസ് തീരുമാനിക്കുകയായിരുന്നു.

ഇരു ജീവികള്‍ക്കും ജലത്തിനുള്ളിലെ വസ്തുക്കള്‍ കണ്ടെത്താന്‍ വലിയ കഴിവായിരുന്നു. യുഎസ് നേവി ഉപയോഗിച്ച ആദ്യ ഡോള്‍ഫിനുകളിലൊന്നിന്റെ പേര് ടഫി എന്നായിരുന്നു. തന്റെ ബുദ്ധിശക്തിയും ദൃഢനിശ്ചയവും കൊണ്ട് ടഫി എല്ലാവരെയും അതിശയിപ്പിച്ചു. ഡൈവര്‍മാരെ വെള്ളത്തിനടിയില്‍ താമസിപ്പിച്ച് നടത്തിയ സീലാബ് 2 പ്രൊജക്ടിലും ടഫി പങ്കെടുത്തു. ഡൈവര്‍മാര്‍ക്കായി സന്ദേശങ്ങളും സാമഗ്രികളും കൊണ്ടു കൊടുക്കാനും കാണാതായവരെയും പരുക്ക് പറ്റിയവരെയും കണ്ടെത്താനും ടഫി മിടുക്ക് കാട്ടി.