റീല്‍ ചിത്രീകരിക്കാന്‍ കരടിക്ക് ശീതളപാനീയ കുപ്പി നല്‍കി: യുവാവിനെതിരെ കേസ്

റീല്‍ സൃഷ്ടിക്കുന്നതിനായി കരടിക്ക് ശീതളപാനീയത്തിന്റെ കുപ്പി നല്‍കിയ യുവാവിനെതിരെ കേസെടുത്ത് വനംവകുപ്പ്. ഛത്തീസ്ഗഢിലെ കങ്കേര്‍ ജില്ലയിലാണ് സംഭവം. മനുഷ്യരുടെ ഇത്തരം പ്രവര്‍ത്തികള്‍ വന്യജീവികളുടെ സുരക്ഷയെക്കുറിച്ചും സംരക്ഷണ നിയമങ്ങളുടെ ലംഘനത്തെക്കുറിച്ചും ഗുരുതരമായ ആശങ്കകളാണ് ഉയര്‍ത്തുന്നത്.

സമൂഹ മാധ്യമങ്ങളില്‍ പ്രചരിച്ച വീഡിയോയില്‍, ഒരു യുവാവ് ശീതളപാനീയ കുപ്പിയുമായി കരടിയുടെ അടുത്തേക്ക് നടക്കുന്നതും കുപ്പി കരടിയുടെ മുന്നില്‍ വെച്ച് തിരിച്ചുപോകുന്നതും കാണാം. തുടര്‍ന്ന് കരടി കുപ്പിയെടുത്ത് ശീതളപാനീയം കുടിക്കാന്‍ തുടങ്ങുന്നു. കുപ്പിയിലെ പാനീയം മുഴുവന്‍ കുടിച്ച് കരടി കുപ്പി താഴെയിടുന്നതും വീഡിയോയിലുണ്ട്.

ഓണ്‍ലൈന്‍ പ്രശസ്തിക്കായി ആളുകള്‍ സ്വന്തം ജീവനും മൃഗങ്ങളുടെ ജീവനും അപകടത്തിലാക്കുന്ന പ്രവണതയാണ് ഇത് കാണിക്കുന്നത്. ഇത്തരം പ്രവര്‍ത്തികള്‍ അതീവ അപകടകരമാണെന്ന് വിദഗ്ദ്ധര്‍ മുന്നറിയിപ്പ് നല്‍കുന്നു. മനുഷ്യരുമായി അടുത്തിടപഴകുമ്പോള്‍ കരടികള്‍ അക്രമാസക്തമാകാനും ആക്രമിക്കാനും സാധ്യതയുണ്ട്, ഇത് മാരകമായ ഏറ്റുമുട്ടലുകളിലേക്ക് നയിച്ചേക്കാം.

വൈറലായ വീഡിയോ വനംവകുപ്പ് അധികൃതര്‍ ശ്രദ്ധയില്‍പ്പെട്ടതായി സ്ഥിരീകരിച്ചു. സംഭവത്തില്‍ ഉള്‍പ്പെട്ട യുവാവിനെ തിരിച്ചറിയാനുള്ള ശ്രമങ്ങള്‍ നടക്കുന്നുണ്ടെന്നും, വന്യജീവി സംരക്ഷണ നിയമപ്രകാരം നിയമ നടപടിക്ക് ഒരുങ്ങുകയാണെന്നുമാണ് പഞ്ചാബ് കേസരി റിപ്പോര്‍ട്ട് ചെയ്യുന്നത്.

VIDEO : रील के चक्कर में भालू को पिला दी कोल्ड ड्रिंक, वीडियो हुआ सोशल मीडिया पर वायरलछत्तीसगढ़ के कांकेर का है मामला#Chhattisgarh #Kanker #ViralVideo #Bhalu #beardstyle #cold #reel #Kanker #BreakingNews #Bear #Wildlife #trending #viral #cgreels #bastar pic.twitter.com/zcjV5F5XOz— The news (@Thenews0fficial) September 12, 2025