9 കോടി വര്‍ഷം പഴക്കം! ദിനോസറുകള്‍ ഭക്ഷണമായി കഴിച്ചിരുന്ന അപൂര്‍വ്വമരം കായിച്ചു

ചരിത്രാതീത കാലത്ത് ദിനോസറുകള്‍ ഭക്ഷണമായി കഴിച്ചിരുന്ന അപൂര്‍വമരത്തില്‍ ആദ്യമായി പഴമുണ്ടായി. ദിനോസര്‍ മരം എന്നറിയപ്പെടുന്ന വൊല്ലെമി പൈന്‍മരത്തിലാണ് പഴം കായ്ച്ചത്. 9 കോടി വര്‍ഷത്തോളം മുന്‍പേ ഭൂമിയിലുള്ളവയാണ് ഇവ. ദിനോസറുകള്‍ ഭൂമിയില്‍ നിന്ന് അപ്രത്യക്ഷമായ ഘട്ടത്തില്‍ ഈ മരവും അപ്രത്യക്ഷമായെന്നു കണക്കാക്കപ്പെട്ടിരുന്നെങ്കിലും 1994ല്‍ ഓസ്‌ട്രേലിയയിലെ സിഡ്‌നിക്ക് 180 കിലോമീറ്ററോളം അകലെ ഇവ കണ്ടെത്തുകയായിരുന്നു.

ഈ മരത്തിന്റെ ഒരു തൈ അലിസ്റ്റര്‍ തോംസന്‍, പമേല എന്നീ ദമ്പതികള്‍ കൊണ്ടുപോകുകയും അത് ഇംഗ്ലണ്ടിലെ മാല്‍വേണ്‍ കുന്നുകളിലുള്ള തങ്ങളുടെ തോട്ടത്തില്‍ നട്ടുവളര്‍ത്തുകയും ചെയ്തു. ഈ മരമാണ് ഇപ്പോള്‍ കായ്ച്ചിരിക്കുന്നത്. അപൂര്‍വമായ ഈ മരത്തിന്റെ കൂടുതല്‍ തൈകള്‍ ഈ പഴത്തില്‍നിന്നു നട്ടുവളര്‍ത്താനാകുമെന്നാണു ദമ്പതിമാരുടെ പ്രതീക്ഷ. മങ്കി പസില്‍ ട്രീ എന്നയിനം മരങ്ങളുമായി സാമ്യമുള്ള ഈ മരങ്ങളില്‍ ആണ്‍കായകളും പെണ്‍കായകളും പിടിക്കും. മേയ് നാലിന് തങ്ങള്‍ പൂന്തോട്ടം പൊതുജനങ്ങള്‍ക്കു തുറന്നുകൊടുക്കുമെന്ന് ദമ്പതിമാര്‍ അറിയിച്ചു.