ജയിച്ച ബാഴ്‌സ ഫൈനല്‍ കാണില്ല

മാഡ്രിഡ്‌: സ്‌പാനിഷ്‌ കോ ഡെല്‍ റേ ഫുട്‌ബോളില്‍ മുന്‍ ചാമ്പ്യന്‍ ബാഴ്‌സലോണ ഫൈനല്‍ കാണാതെ മടങ്ങി. രണ്ടാംപാദ സെമി ഫൈനലില്‍ അത്‌ലറ്റിക്കോ മാഡ്രിഡിനെ 3-0 ത്തിനു തോല്‍പ്പിച്ചെങ്കിലും 4-3 എന്ന അഗ്രഗേറ്റ്‌ സ്‌കോറില്‍ പിന്നിലായി.
കഴിഞ്ഞ മാസം 13 നു സ്വന്തം തട്ടകത്തില്‍ നടന്ന ഒന്നാംപാദ സെമിയില്‍ അത്‌ലറ്റിക്കോ 4-0 ത്തിനു ജയിച്ചിരുന്നു. സ്വന്തം തട്ടകമായ ന്യൂ ക്യാമ്പിലാണ്‌ ബാഴ്‌സ 3-0 ത്തിനു ജയിച്ചത്‌. മാര്‍ക്‌ ബെമാല്‍ ഇരട്ട ഗോളുകളും റാഫിഞ്ഞ ഒരു ഗോളുമടിച്ചു. അഗ്രഗേറ്റില്‍ അത്‌ലറ്റിക്കോയെ മറികടക്കാന്‍ ഈ ഗോളുകള്‍ മതിയായിരുന്നില്ല. 4-2-3-1 എന്ന ഫോര്‍മേഷനിലാണ്‌ ബാഴ്‌സ കോച്ച്‌ ഹാന്‍സി ഫ്‌ളിക്ക്‌ തയാറായത്‌്.
അത്‌ലറ്റിക്കോ കോച്ച്‌ ഡീഗോ സിമിയോണി 4-4-2 എന്ന ഫോര്‍മേഷനിലാണ്‌ ശിഷ്യന്‍മാരെ തയാറാക്കിയത്‌. 29-ാം മിനിറ്റില്‍ ബാഴ്‌സ ലീഡ്‌ നേടി. ലാമിനെ യമാലിന്റെ അസിസ്‌റ്റിലായിരുന്നു വലകുലുക്കിയത്‌. ഒന്നാം പകുതിയുടെ ഇഞ്ചുറി ടൈമില്‍ റാഫിഞ്ഞ പെനാല്‍റ്റിയിലൂടെ ലീഡ്‌ ഇരട്ടിയാക്കി. 72-ാം മിനിറ്റിലാണ്‌ ബെര്‍ണാല്‍ വീണ്ടും ഗോളടിച്ചത്‌. ജോയ കാന്‍സെലോയാണു ഗോളിന്‌ വഴിയൊരുക്കിയത്‌. അഗ്രഗേറ്റില്‍ ഒപ്പം പിടിക്കാനുള്ള ബാഴ്‌സയുടെ ശ്രമങ്ങള്‍ അത്‌ലറ്റിക്കോ മാഡ്രിഡ്‌ നിഷ്‌ഫലമാക്കി.