‘സഹായം ആവശ്യമുണ്ടെങ്കില്‍ ഒരു കോൾ അകലെ ഞാൻ ഒപ്പമുണ്ടാകും...’ തന്റെ അമ്മ കാന്‍സറിനോട് പോരാടുന്ന സമയത്ത് സൽമാൻ ഖാൻ നൽകിയ പിന്തുണയെപ്പറ്റി സുധ ചന്ദ്രന്‍

Sudha Chandran about Salman Khan (Image Source: Instagram)

ബോളിവുഡിന്റെ ഭായ് ജാനാണ് സല്‍മാന്‍ ഖാന്‍. അവതരിപ്പിക്കുന്ന കഥാപാത്രങ്ങള്‍ അല്‍പ്പം മൂര്‍ച്ചയുള്ളതും സീരിയസ്സുമാണെങ്കിലും റിയല്‍ ലൈഫില്‍ പലരുടെയും ജീവിതത്തിലെ വിഷമഘട്ടങ്ങളില്‍ സല്‍മാന്‍ ഒരു ദൈവദൂതനെപ്പോലെ അവതരിച്ചിട്ടുണ്ട്. വലം കൈ ചെയ്യുന്നത് ഇടം കൈ അറിയരുത് എന്ന തത്വത്തില്‍ ജീവിക്കുന്ന സല്ലു ഭായ് സഹതാരങ്ങളുടെ സങ്കടങ്ങളില്‍ താങ്ങായും തണലായും നിന്നിട്ടുണ്ട്.
പിന്നീടെപ്പോഴെങ്കിലും ആ സഹായം ഏറ്റു വാങ്ങിയവര്‍ സല്‍മാന്റെ മനസ്സിന്റെ വലിപ്പവും തുറന്നു പറയുമ്പോഴാണ് പുറംലോകം ഇക്കാര്യങ്ങള്‍ അറിയാറുള്ളത്. അല്ലാതെ സല്‍മാന്‍ ഇതൊന്നും കൊട്ടിഘോഷിച്ചു നടക്കാറില്ല.
ഇപ്പോഴിതാ സിനിമ സീരിയല്‍ താരം സുധ ചന്ദ്രന്‍ തന്റെ ജീവിതത്തിലെ മറക്കാനാവാത്ത ഒരു അനുഭവം പങ്കിടുകയാണ്. സല്‍മാനെ എക്കാലത്തെയും ഏറ്റവും അവിശ്വസനീയനായ മനുഷ്യൻ എന്ന് വിശേഷിപ്പിച്ച സുധ ചന്ദ്രന്‍, ജീവിതത്തിലെ ഒരു പ്രയാസകരമായ ഘട്ടത്തിൽ സല്‍മാന്‍ നല്‍കിയ മാനസിക പിന്തുണയെക്കുറിച്ചാണ് പറയുന്നത്. സിനിമകളിൽ പ്രവർത്തിച്ച കാലത്തെ ഒരു ഹൃദയസ്പർശിയായ ഓർമ്മയാണ് സുധ ചന്ദ്രന്‍ പങ്കിടുന്നത്.
‘‘സൽമാൻ ഖാന്റെ അധികമാര്‍ക്കും അത്ര അറിയപ്പെടാത്ത ഒരു വശമാണിത്. അദ്ദേഹം ഒരു അത്ഭുതകരമായ മനുഷ്യനാണ്. എന്റെ ജീവിതത്തിലെ ഏറ്റവും പ്രയാസകരമായ ഘട്ടമായിരുന്നു അത്. എന്റെ അമ്മ കാൻസറിനോട് പോരാടുന്ന സമയമായിരുന്നു അത്.
അമ്മ ആശുപത്രിയിൽ ആയിരുന്ന സമയത്ത് ഞാൻ അദ്ദേഹത്തോടൊപ്പം ഒരു സിനിമ ചെയ്യുകയായിരുന്നുവെന്ന് എനിക്ക് ഓർമ്മയുണ്ട്. അദ്ദേഹത്തിന് ഇത് ഓർമ്മയില്ലായിരിക്കാം. ഞാൻ എന്റെ സ്റ്റാഫിനൊപ്പം ഉച്ചഭക്ഷണം കഴിക്കുമ്പോൾ സൽമാന്റെ സ്റ്റാഫിലൊരാള്‍ എന്റെ അടുത്ത് വന്ന് പറഞ്ഞു, ‘മാം, അദ്ദേഹം നിങ്ങളോട് സംസാരിക്കാൻ ആഗ്രഹിക്കുന്നു...’ എന്ന്. ഞാൻ അദ്ദേഹത്തിന്റെ അടുത്തേക്ക് പോയി, ‘ എന്താണ് സൽമാൻ സർ?...’
‘നിങ്ങളുടെ അമ്മയ്ക്ക് കാൻസർ ബാധിച്ചതായി ഞാൻ കേട്ടു. നിങ്ങൾക്ക് എന്തെങ്കിലും സഹായം ആവശ്യമുണ്ടോ?...’ എന്നായി അദ്ദേഹം.
ഞാൻ അത്ഭുതപ്പെട്ടു, എന്റെ അമ്മയുടെ രോഗത്തെക്കുറിച്ച് അദ്ദേഹത്തിന് എങ്ങനെ അറിയാമെന്ന് ചോദിച്ചു. അദ്ദേഹം മറുപടി പറഞ്ഞു, ‘ അതല്ല ഇവിടുത്തെ കാര്യം. നിങ്ങൾക്ക് സഹായം ആവശ്യമുണ്ടോ ഇല്ലയോ? നിങ്ങൾക്ക് സഹായം ആവശ്യമുണ്ടെങ്കിൽ, ഒരു കോൾ അകലെ, ഞാൻ നിങ്ങൾക്കൊപ്പമുണ്ടാകും...’ എന്ന് പറഞ്ഞു.
അതാണ് സൽമാൻ ഭായ്. ഇത് ഞാൻ ഒരിക്കലും മറക്കില്ല. അദ്ദേഹത്തിന്റെ ജീവിതത്തിലേക്ക് എത്ര പേർ കടന്നുവന്നിട്ടുണ്ടാകണം, എത്ര പേരെ സഹായിച്ചിട്ടുണ്ടാകണം എന്നതുകൊണ്ടു തന്നെ അദ്ദേഹമത് മറന്നു പോയിട്ടുണ്ടാകും. പക്ഷേ എനിക്ക്, ആ നിമിഷം അദ്ദേഹം എന്റെ മനസ്സില്‍ വളരെയധികം ബഹുമാനം നേടിയെടുത്തു.
സൽമാൻ മറ്റുള്ളവർക്ക് നൽകുന്ന സഹായം ഒരിക്കലും പരസ്യപ്പെടുത്താറില്ല. ഒരു കൈ ചെയ്യുന്നത് മറു കൈ അറിയാറില്ല എന്നൊക്കെ പറയാറില്ലേ അത്. ഇന്നത്തെ അദ്ദേഹത്തിന്റെ വിജയത്തിന് പിന്നിൽ കുടുംബത്തിന്റെയും അഭ്യുദയകാംക്ഷികളുടെയും അനുഗ്രഹമാണ്. അംഗീകാരം തേടാതെ നിശബ്ദമായി സഹായിക്കുന്നതിൽ അദ്ദേഹം വിശ്വസിക്കുന്നു...’’ എന്നാണ് സുധ ചന്ദ്രന്‍ പറഞ്ഞു. സിദ്ധാര്‍ത്ഥ് കണ്ണനുമായുള്ള ഒരു പോഡ്കാസ്റ്റില്‍ വച്ചാണ് സുധ ചന്ദ്രന്‍ മനസ്സു തുറന്നത്. തന്റെ മനസ്സ് തുറന്ന് സംസാരിക്കുന്നതിലൂടെ അറിയപ്പെടുന്ന സുധ, സൂപ്പർസ്റ്റാറിനെ താൻ വീക്ഷിച്ച രീതിയെ മാറ്റിമറിച്ച ഒരു ആഴത്തിലുള്ള വ്യക്തിപരമായ നിമിഷമാണ് ഈ അഭിമുഖത്തില്‍ പങ്കുവച്ചത്.