ലോകത്തിലെ ഏറ്റവും ചെറിയ പൂച്ചയിനം, ഭാരം വെറും ഒന്നരക്കിലോ: മിടുമിടുക്കനാണ് ഈ ഇത്തിരിക്കുഞ്ഞന്‍

Photo. Reddit/ Just Another Aviatrix

സിംഹവും കടുവയും ഉള്‍പ്പെടുന്ന മാര്‍ജാര കുടുംബത്തിലെ ഏറ്റവും ചെറിയ അംഗമാണ് 'റസ്റ്റി സ്‌പോട്ടഡ് ക്യാറ്റ്' . ഇന്ത്യ, ശ്രീലങ്ക, നേപ്പാള്‍ എന്നിവിടങ്ങളില്‍ മാത്രം കാണപ്പെടുന്ന ഈ കാട്ടുപൂച്ചകള്‍ക്ക് ഒരു അണ്ണാന്റെ അത്രയും വലുപ്പമേയുള്ളൂ. ഏകദേശം 35 മുതല്‍ 48 സെന്റിമീറ്റര്‍ വരെ മാത്രം നീളമുള്ള ഇവയുടെ പരമാവധി ഭാരം 1.6 കിലോഗ്രാം മാത്രമാണ്. ലോകത്തിലെ ഏറ്റവും ചെറിയ പൂച്ചയിനമായാണ് ഇവ അറിയപ്പെടുന്നത്.

ചാരനിറത്തിലുള്ള ശരീരത്തില്‍ തുരുമ്പിന്റെ നിറമുള്ള പുള്ളികളുള്ളതിനാലാണ് ഇവയ്ക്ക് ഈ പേര് ലഭിച്ചത്. മുഖത്തെ കറുത്ത വരകളും തിളങ്ങുന്ന കണ്ണുകളും ഇവയുടെ പ്രത്യേകതയാണ്. പാറക്കെട്ടുകളിലും പുല്‍മേടുകളിലും മുള്ളുക്കാടുകളിലും ജീവിക്കുന്ന ഇവ പൊതുവെ മനുഷ്യരില്‍ നിന്ന് ഒഴിഞ്ഞുമാറി നടക്കാന്‍ ഇഷ്ടപ്പെടുന്ന നാണക്കാരാണ്. രാത്രികാലങ്ങളില്‍ മികച്ച കാഴ്ചശക്തിയുള്ളതിനാല്‍ ഇരുട്ടിലും ഇവയ്ക്ക് വേഗത്തില്‍ സഞ്ചരിക്കാന്‍ സാധിക്കും.

എലികള്‍, പക്ഷികള്‍, പല്ലികള്‍, തവളകള്‍ തുടങ്ങിയ ചെറുജീവികളെയാണ് ഇവ പ്രധാനമായും ആഹാരമാക്കുന്നത്. തറനിരപ്പിലാണ് ഇരപിടിത്തമെങ്കിലും മരം കയറുന്നതില്‍ ഇവര്‍ അതീവ വൈദഗ്ധ്യമുള്ളവരാണ്. തങ്ങളുടെ പ്രദേശം അടയാളപ്പെടുത്താന്‍ പ്രത്യേക രീതിയില്‍ മൂത്രമൊഴിക്കുന്ന ശീലവും ഈ കുട്ടിപ്പൂച്ചകള്‍ക്കുണ്ട്. കാഴ്ചയില്‍ പാവമാണെങ്കിലും വേട്ടയാടുന്ന കാര്യത്തില്‍ ഇവര്‍ മിടുക്കരാണ്.