' അവള്‍ ജനിച്ച ദിവസം മുതല്‍ പത്താം ക്ലാസ് പരീക്ഷ എഴുതാന്‍ പോകുന്ന ദിവസം വരെ' ; കുറിപ്പുമായി ഗായത്രി അരുണ്‍

photo-www.instagram.com/gayathri__arun/

മിനീസ്‌ക്രീന്‍ പ്രേക്ഷകരുടെ പ്രിയപ്പെട്ട താരമാണ് ഗായത്രി അരുണ്‍. ഏഷ്യാനെറ്റിലെ പരസ്പരം സീരിയലിലൂടെയാണ് ഗായത്രി ശ്രദ്ധ നേടുന്നത്. മമ്മൂട്ടിയും വിനായകനും പ്രധാന വേഷങ്ങളിലെത്തിയ ' കളങ്കാവല്‍' എന്ന ചിത്രത്തിലും ഗായത്രി അഭിനയിച്ചു.

ബിസിനസ്‌കാരനായ അരുണാണ് ഗായത്രിയുടെ ഭര്‍ത്താവ്. കല്യാണിയാണ് മകള്‍. ഇപ്പോഴിതാ മകളെക്കുറിച്ച് ഗായത്രി സോഷ്യല്‍ മീഡിയയില്‍ പങ്കുവെച്ച ഒരു കുറിപ്പാണ് ശ്രദ്ധ നേടുന്നത്. പത്താം ക്ലാസിലെ പരീക്ഷ എഴുതാന്‍ പോകുന്ന മകളെക്കുറിച്ചാണ് ഗായത്രിയുടെ കുറിപ്പ്. ഇത് നിന്നെ കാത്തിരിക്കുന്ന വലിയൊരു ലോകത്തിലേക്കുളള ഒരു ചെറിയ ചുവടുവയ്പ്പ് മാത്രമാണെന്നും ആത്മവിശ്വാസത്തോടെ അതിലേക്ക് കടക്കുക എന്നുമാണ് ഗായത്രി കുറിച്ചത്. മകള്‍ക്കും പരീക്ഷ എഴുതുന്ന മറ്റെല്ലാ കുട്ടികള്‍ക്കും ഗായത്രി ആശംസകളും അറിയിച്ചിട്ടുണ്ട്.

'അവൾ ജനിച്ച ദിവസം മുതൽ പത്താം ക്ലാസ് പരീക്ഷ എഴുതാൻ പോകുന്ന ദിവസം വരെ... സമയം ഞാൻ സങ്കൽപ്പിച്ചതിലും വേഗത്തിൽ പറന്നുപോയി. ഇന്ന് എന്റെ ഹൃദയം ഒരുപാട് വികാരങ്ങളാൽ നിറഞ്ഞിരിക്കുന്നു. ഇന്നലെ അവൾ എന്റെ വിരൽ പിടിച്ചു നടന്നതുപോലെ തോന്നുന്നു, ഇപ്പോൾ അവൾ സ്വന്തം സ്വപ്നങ്ങളിലേക്ക് നടക്കുന്നു... എന്റെ പ്രിയപ്പെട്ട പെൺകുട്ടി.. ഇത് നിന്നെ കാത്തിരിക്കുന്ന വലിയൊരു ലോകത്തിലേക്കുള്ള ഒരു ചെറിയ ചുവടുവയ്പ്പ് മാത്രമാണ്. ഭയത്തോടെയല്ല, ആത്മവിശ്വാസത്തോടെ അതിലേക്ക് കടക്കുക. പരമാവധി ശ്രമിക്കുക. സമ്മർദ്ദം ചുമക്കരുത്. മാർക്കുകൾ വെറും സംഖ്യകളാണ്.. നിന്റെ പരിശ്രമവും ധൈര്യവും പ്രധാനമാണ്.പരീക്ഷ എഴുതുന്ന ഓരോ കുട്ടിക്കും എല്ലാ ആശംസകളും. നിങ്ങളിൽ വിശ്വസിക്കുക, ശാന്തത പാലിക്കുക. നീ ഇപ്പോൾ ഞങ്ങളെ അഭിമാനിപ്പിക്കുന്നു '.