സി.ബി.എസ്‌.ഇ. ബോര്‍ഡ്‌ പരീക്ഷ 17 മുതല്‍; ഇക്കുറി മാറ്റങ്ങളോടെ

ന്യൂഡല്‍ഹി: സി.ബി.എസ്‌.ഇ 10, 12 ക്ലാസുകളിലെ ബോര്‍ഡ്‌ പരീക്ഷ 17ന്‌ ആരംഭിക്കും. ദേശീയ വിദ്യാഭ്യാസ നയം(എന്‍.ഇ.പി.) അനുസരിച്ച്‌ ഇക്കുറി പരീക്ഷാഘടനയില്‍ മാറ്റമുണ്ടാകും. പ്രധാന മാറ്റങ്ങള്‍:
2 തവണ പരീക്ഷ എഴുതാനുള്ള സംവിധാനം

ഈ വര്‍ഷത്തെ ഏറ്റവും ശ്രദ്ധേയമായ പരിഷ്‌കാരങ്ങളിലൊന്ന്‌ 10ാം ക്ലാസ്‌ വിദ്യാര്‍ഥികള്‍ക്കായി രണ്ട്‌ തവണ പരീക്ഷ എഴുതാനുള്ള സംവിധാനം ഏര്‍പ്പെടുത്തിയതാണ്‌. ഫെബ്രുവരിയില്‍ നടക്കുന്ന പരീക്ഷ നിര്‍ബന്ധിതമായ ആദ്യ അവസരമായിരിക്കും. 2026 മേയ്‌ മാസത്തില്‍ നടത്തുന്ന രണ്ടാമത്തെ അവസരം, വിദ്യാര്‍ഥികള്‍ക്ക്‌ പ്രകടനം മെച്ചപ്പെടുത്താന്‍ ആഗ്രഹമുണ്ടെങ്കില്‍ തെരഞ്ഞെടുക്കാം. ഈ രണ്ട്‌ അവസരങ്ങളില്‍നിന്നും ലഭിക്കുന്ന ഉയര്‍ന്ന മാര്‍ക്ക്‌ അന്തിമ ഫലത്തിനായി പരിഗണിക്കും.
പുതുക്കിയ പരീക്ഷാ രീതി

പരീക്ഷാ രീതിയിലും മാറ്റങ്ങള്‍ വരുത്തിയിട്ടുണ്ട്‌. പുതിയ ഘടന അനുസരിച്ച്‌, ചോദ്യപേപ്പറിന്റെ 50% പ്രശ്‌നപരിഹാരം അടിസ്‌ഥാനമാക്കിയുള്ള ചോദ്യങ്ങളായിരിക്കും. 20% വെയിറ്റേജ്‌ ഒബ്‌ജക്‌റ്റീവ്‌ ടൈപ്പ്‌ ചോദ്യങ്ങള്‍ക്കായിരിക്കും, ബാക്കിയുള്ള 30% ഷോര്‍ട്ട്‌, ലോങ്‌ കണ്‍സ്‌ട്രക്‌റ്റഡ്‌ റെസ്‌പോണ്‍സ്‌ ചോദ്യങ്ങളായിരിക്കും. ഈ രീതി 10, 12 ക്ലാസുകളിലെ പരീക്ഷകള്‍ക്ക്‌ ബാധകമായിരിക്കും.
ഉത്തരം എഴുതുമ്പോള്‍ സൂക്ഷിക്കുക

ചില വിഷയങ്ങളില്‍ സി.ബി.എസ്‌.ഇ കര്‍ശനമായ സെക്ഷനല്‍ ഉത്തരം എഴുതുന്നതിനുള്ള നിയമങ്ങളും നടപ്പിലാക്കിയിട്ടുണ്ട്‌. സയന്‍സില്‍, ബയോളജി, കെമിസ്‌ട്രി, ഫിസിക്‌സ്‌ എന്നീ വിഷയങ്ങളിലെ ഉത്തരങ്ങള്‍ അവയുടെ നിശ്‌ചിത ഭാഗങ്ങളില്‍ തന്നെ എഴുതണം. അതേസമയം, സോഷ്യല്‍ സയന്‍സില്‍, ഹിസ്‌റ്ററി, ജോഗ്രഫി തുടങ്ങിയ വിഷയങ്ങള്‍ക്കനുസരിച്ചുള്ള ഭാഗങ്ങളില്‍ ഉത്തരം എഴുതേണ്ടതാണ്‌. തെറ്റായ ഭാഗത്ത്‌ എഴുതുന്ന ഉത്തരങ്ങള്‍ മൂല്യനിര്‍ണയം നടത്തില്ല.
യോഗ്യത മാനദണ്ഡങ്ങളിലും കര്‍ശനമാക്കിയിട്ടുണ്ട്‌. കുറഞ്ഞത്‌ 75% ഹാജര്‍ നിര്‍ബന്ധമാണ്‌, കൂടാതെ ഇന്റേണല്‍ അസസ്‌മെന്റുകള്‍ ഓരോ വിഷയത്തിനും മൊത്തം മാര്‍ക്കിന്റെ 20% മുതല്‍ 40% വരെ സംഭാവന നല്‍കും. എല്ലാ വിദ്യാര്‍ഥികളും പരീക്ഷാ സംഗം പോര്‍ട്ടല്‍ വഴി പേര്‌ രജിസ്‌റ്റര്‍ ചെയ്യണം. അവിടെ ഓരോ വിദ്യാര്‍ഥിക്കും ഡിജിറ്റല്‍ അക്കാദമിക്‌ ട്രാക്കിങ്ങിനായി ഒരു യുണീക്ക്‌ അപാര്‍ ഐ.ഡി നല്‍കും.
10-ാം ക്ലാസ്‌ പരീക്ഷകള്‍ മാര്‍ച്ച്‌ 11ന്‌ അവസാനിക്കും. 12ാം ക്ലാസ്‌ പരീക്ഷകള്‍ ഏപ്രില്‍ 10 വരെ തുടരും. എല്ലാ പരീക്ഷകളും ഇന്ത്യയിലെയും വിദേശത്തെയും നിശ്‌ചിത കേന്ദ്രങ്ങളില്‍ ഓഫ്‌ലൈന്‍ രീതിയില്‍ നടത്തും.