ജനറല്‍ നരവണെയുടെ പുസ്തകത്തെചൊല്ലി പാര്‍ലമെന്റില്‍ തര്‍ക്കം: രാഹുലിന്റെ പരാമര്‍ശത്തില്‍ പ്രതിഷേധം; ചട്ടം ഓര്‍മ്മിപ്പിച്ച് സ്പീക്കര്‍

ന്യൂഡല്‍ഹി: മുന്‍ കരസേനാ മേധാവി ജനറല്‍ എം.എം. നരവണെയുടെ പ്രസിദ്ധീകരിക്കാത്ത ആത്മകഥയിലെ പരാമര്‍ശങ്ങള്‍ ലോക്‌സഭയില്‍ ഭരണ-പ്രതിപക്ഷ അംഗങ്ങള്‍ തമ്മിലുള്ള തര്‍ക്കത്തിനും സഭാ നടപടികള്‍ തടസ്സപ്പെടുന്നതിനും കാരണമായി. പുസ്തകത്തിലെ 2020-ലെ ഇന്ത്യ-ചൈന അതിര്‍ത്തി തര്‍ക്കത്തെക്കുറിച്ചുള്ള ഭാഗം രാഹുല്‍ ഗാന്ധി സഭയില്‍ പരാമര്‍ശിച്ചതാണ് കാരണം.

പ്രതിരോധ മന്ത്രി രാജ്നാഥ് സിംഗ്, ആഭ്യന്തര മന്ത്രി അമിത് ഷാ, കിരണ്‍ റിജിജു എന്നിവര്‍ രാഹുല്‍ ഗാന്ധിയുടെ നീക്കത്തെ ശക്തമായി എതിര്‍ത്തു. പ്രസിദ്ധീകരിക്കാത്ത ഒരു പുസ്തകത്തില്‍ നിന്നുള്ള കാര്യങ്ങള്‍ സഭയില്‍ ഉദ്ധരിക്കാന്‍ കഴിയില്ലെന്ന് അവര്‍ വാദിച്ചു.

ചട്ടങ്ങള്‍ ചൂണ്ടിക്കാട്ടി സ്പീക്കര്‍ ഓം ബിര്‍ള, പുസ്തകത്തിലെ ഭാഗങ്ങള്‍ വായിക്കുന്നതില്‍ നിന്ന് രാഹുല്‍ ഗാന്ധിയെ വിലക്കി. സഭയില്‍ ഉദ്ധരിക്കുന്ന കാര്യങ്ങളുടെ ആധികാരികത ഉറപ്പുവരുത്തണമെന്ന് സ്പീക്കര്‍ നിര്‍ദ്ദേശിച്ചു. ബിജെപി എംപി തേജസ്വി സൂര്യ കോണ്‍ഗ്രസിന്റെ രാജ്യസ്നേഹത്തെ ചോദ്യം ചെയ്തതിനുള്ള മറുപടിയായാണ് താന്‍ ഇത് പറയുന്നതെന്ന് രാഹുല്‍ ഗാന്ധി വ്യക്തമാക്കി. ഈ പുസ്തകം വായിച്ചാല്‍ ആര്‍ക്കാണ് യഥാര്‍ത്ഥ രാജ്യസ്നേഹമെന്ന് മനസ്സിലാകുമെന്നും അദ്ദേഹം പറഞ്ഞു.

സഭാനടപടികളുമായി ബന്ധപ്പെട്ടല്ലാതെ മറ്റ് പുസ്തകങ്ങളോ പത്രങ്ങളോ കത്തുകളോ അംഗങ്ങള്‍ സഭയില്‍ വായിക്കാന്‍ പാടില്ലെന്ന് വ്യവസ്ഥ ചെയ്യുന്ന ചട്ടം 349 സ്പീക്കര്‍ ഓര്‍മ്മിപ്പിച്ചു. ഒരാള്‍ക്കെതിരെ അപകീര്‍ത്തികരമായതോ കുറ്റാരോപിതമോ ആയ കാര്യങ്ങള്‍ ഉന്നയിക്കുന്നതിന് മുന്‍പായി സ്പീക്കര്‍ക്കും ബന്ധപ്പെട്ട മന്ത്രിക്കും മുന്‍കൂട്ടി നോട്ടീസ് നല്‍കണമെന്ന് ഈ ചട്ടം വ്യക്തമാക്കുന്നു.

പ്രധാനമന്ത്രിക്കും പ്രതിരോധ മന്ത്രിക്കുമെതിരെ ആരോപണങ്ങള്‍ ഉന്നയിക്കാന്‍ ശ്രമിച്ചപ്പോഴാണ് സ്പീക്കര്‍ ഈ ചട്ടം ഓര്‍മ്മിപ്പിച്ചത്. ജനറല്‍ നരവണെയുടെ 'ഫോര്‍ സ്റ്റാര്‍സ് ഓഫ് ഡെസ്റ്റിനി' എന്ന പുസ്തകം ഇതുവരെ ഔദ്യോഗികമായി പുറത്തിറങ്ങിയിട്ടില്ലെന്ന് രാജ്നാഥ് സിംഗ് സഭയില്‍ സ്ഥിരീകരിച്ചു.