വാഹനങ്ങള്‍ക്ക് 4 വര്‍ഷത്തെ സ്റ്റാന്‍ഡേര്‍ഡ് വാറണ്ടിയുമായി സ്‌കോഡ

മോഡല്‍ നിരയില്‍ സ്റ്റാന്‍ഡേര്‍ഡായി 4 വര്‍ഷത്തെ വാറണ്ടി നല്‍കുമെന്ന് പ്രഖ്യാപിച്ചിരിക്കുകയാണ് ചെക്ക് റിപ്പബ്ലിക്കന്‍ വാഹന നിര്‍മാതാക്കളായ സ്‌കോഡ. ഇതോടൊപ്പം സ്‌കോഡ ഓട്ടോ ഇന്ത്യ 'സ്‌കോഡ സൂപ്പര്‍ കെയര്‍' എന്ന പുതിയ സര്‍വീസ്, ഓണര്‍ഷിപ്പ് പ്രോഗ്രാമും അവതരിപ്പിച്ചിരിക്കുകയാണ്. വാറന്റി, റോഡ്സൈഡ് അസിസ്റ്റന്‍സ്, ഷെഡ്യൂള്‍ഡ് സര്‍വീസ് ആനുകൂല്യങ്ങള്‍ എന്നിവ ഒരൊറ്റ ഘടനയിലേക്ക് സംയോജിപ്പിക്കുകയാണ് ഈ സംരംഭത്തിന്റെ പ്രധാന ഉദ്ദേശം. അതുവഴി വാഹന ഉടമസ്ഥാവകാശം ലളിതമാക്കാനും ഉപഭോക്താക്കള്‍ക്ക് ചെലവ് പ്രവചിക്കാനുള്ള കഴിവ് മെച്ചപ്പെടുത്താനും സ്‌കോഡ ഓട്ടോ ലക്ഷ്യമിടുകയാണ്.

ഈ പദ്ധതി പ്രകാരം, ഇന്ത്യയില്‍ വില്‍ക്കുന്ന എല്ലാ സ്‌കോഡ വാഹനങ്ങള്‍ക്കും നാല് വര്‍ഷത്തെ സ്റ്റാന്‍ഡേര്‍ഡ് വാറണ്ടി, നാല് വര്‍ഷത്തെ റോഡ്‌സൈഡ് അസിസ്റ്റന്‍സ്, നാല് ലേബര്‍-ഫ്രീ സര്‍വീസുകള്‍ എന്നിവ സ്റ്റാന്‍ഡേര്‍ഡായി ലഭിക്കും. 'സ്‌കോഡ സൂപ്പര്‍ കെയറിന്' കീഴിലുള്ള 4 ലേബര്‍-ഫ്രീ സര്‍വീസുകളില്‍ 15,000 കിലോമീറ്ററിലും 30,000 കിലോമീറ്ററിലും പീരിയോഡിക് മെയിന്റനന്‍സ് സര്‍വീസുകളും 1,000 കിലോമീറ്ററിലും 7,500 കിലോമീറ്ററിലും പുതുതായി അവതരിപ്പിച്ച രണ്ട് സ്‌കോഡ ചെക്ക്-ഇന്‍ സര്‍വീസുകളും ഉള്‍പ്പെടും. വാഹന ഡെലിവറി കഴിഞ്ഞാലുടന്‍ ഒരു ഘടനാപരമായ സര്‍വീസ് റിലേഷന്‍ഷിപ്പ് സ്ഥാപിക്കുന്നതിനാണ് ഈ ചെക്ക്-ഇന്നുകള്‍ വഴി ഉദ്ദേശിക്കുന്നതെന്ന് കമ്പനി പറയുന്നു.

സര്‍വീസ് ചെലവുകളില്‍ സുതാര്യത നല്‍കുന്നതിനും മോഡല്‍ ലൈനപ്പിലുടനീളം സ്ഥിരതയുള്ള സര്‍വീസ് മാനദണ്ഡങ്ങള്‍ ഉറപ്പാക്കുന്നതിനുമാണ് സംയോജിത കവറേജ് രൂപകല്‍പ്പന ചെയ്തിരിക്കുന്നതെന്ന് സ്‌കോഡ ഓട്ടോ ഇന്ത്യ പറഞ്ഞു. ഈ കവറേജിനു പുറമേ സ്‌കോഡ സൂപ്പര്‍ കെയര്‍ സര്‍വീസ് പ്രവര്‍ത്തനങ്ങളിലും മാറ്റങ്ങള്‍ കൊണ്ടുവരുന്നുണ്ട്. എളുപ്പത്തിലുള്ള സര്‍വീസ് ബുക്കിംഗ്, ഇനം തിരിച്ചുള്ള ബില്ലിംഗ്, വേഗത്തിലുള്ള ടേണ്‍അറൗണ്ട് സമയങ്ങള്‍, സര്‍വീസ് സ്റ്റാറ്റസിനെക്കുറിച്ചുള്ള തത്സമയ അപ്ഡേറ്റുകള്‍ എന്നിവ ഈ പ്രോഗ്രാമില്‍ കമ്പനി ഉള്‍പ്പെടുത്തിയിട്ടുണ്ട്.