400 വര്‍ഷമായി മരുഭൂമിയില്‍ ഒറ്റയ്ക്ക് നില്‍ക്കുന്ന ഒരു വന്‍ മരം: അതിജീവനത്തിന്റെ രഹസ്യം ഇന്നും കണ്ടെത്താനാകാതെ ശാസ്ത്രലോകം

വ്യത്യസ്തവും വിചിത്രവുമായ അനേകം മരങ്ങളെക്കുറിച്ചും ചെടികളെക്കുറിച്ചുമൊക്കെ നാം കേട്ടിട്ടുണ്ട്. ഇത്തരത്തില്‍ ബഹ്‌റൈനിലെ വരണ്ട് സഖീര്‍ മരുഭൂമിക്ക് നടുവില്‍ 400 വര്‍ഷത്തിലേറെയായി ഒറ്റയ്ക്ക് നില്‍ക്കുന്ന മരമാണ് ' ശജറത്ത് അല്‍ ഹയാത്ത്'. ജീവന്റെ മരം എന്നാര്‍ത്ഥമുള്ള പേരുള്ള ഈ മരം പ്രാസോപിസ് സിനറേറിയ ഇനത്തില്‍പ്പെട്ടതാണ്. ഏകദേശം 9-10 മീറ്റര്‍ ഉയരമുള്ള ഈ മരം ശുദ്ധജല സ്രോതസ്സുകള്‍ സമീപത്തില്ലാത്ത ഒരു ചെറിയ മണല്‍ക്കുന്നിന് മുകളിലാണ് വളരുന്നത്. ചുറ്റും പച്ചപ്പൊന്നും തന്നെയില്ല. ഈ മരത്തിന്റെ അതിജീവനം ശാസ്ത്രത്തിന് അജ്ഞമാണ്. കഠിനമായ കാലാവസ്ഥയിലും നൂറ്റാണ്ടുകളുടെ പഴക്കവും ഒറ്റപ്പെട്ട നിലനില്‍പ്പും സമൃദ്ധമായ ഇലച്ചാര്‍ത്തും ഈ മരത്തെ ബഹ്‌റൈനിലെ ഏറ്റവും പ്രശസ്തമായ പ്രകൃതിദത്ത ആകര്‍ഷണങ്ങളിലൊന്നാക്കുന്നു. അനേകം സന്ദര്‍ശകര്‍ ഈ മരം കാണാനായി സഖീര്‍ മരുഭൂമിയില്‍ എത്താറുണ്ട്.

എങ്ങനെയായിരിക്കും ഈ മരം നിലനില്‍ക്കുന്നത്. ഇന്നും ഗവേഷകര്‍ക്കതൊരു പിടികിട്ടാ സമസ്യയാണ്. വിശാലമായ വേരുപടലങ്ങളിലൂടെ ഭൂമിക്കുള്ളില്‍ ആഴത്തിലുള്ള ജലസ്രോതസ്സില്‍നിന്ന് ജലം കണ്ടെത്തുന്നെന്നാണ് പ്രബലമായ ഒരു വിശ്വാസം. ഈ മരത്തിന്റെ വേരുകള്‍ 50 മീറ്റര്‍ ആഴത്തില്‍ വരെ പോയിട്ടുണ്ടെന്നും ശാസ്ത്രജ്ഞര്‍ കണക്കാക്കുന്നു. മരുഭൂമിയില്‍ പെയ്യുന്ന തുച്ഛമായ മഴയില്‍നിന്നും മണലിലെ ഈര്‍പ്പത്തില്‍നിന്നും ജലം വലിച്ചെടുക്കാന്‍ ഈ മരം പ്രാപ്തി നേടിയിരിക്കാമെന്നും ചില ശാസ്ത്രജ്ഞര്‍ വിശ്വസിക്കുന്നു.എന്നാല്‍, ഈ വിഷയത്തില്‍ കൃത്യമായ ഒരു വിശദീകരണം നിലവിലില്ല. ഈ അനിശ്ചിതത്വം പല ഐതിഹ്യങ്ങള്‍ക്കും വിശ്വാസങ്ങള്‍ക്കും വഴിവച്ചിട്ടുണ്ട്.

മരത്തിന് ചുറ്റും നടത്തിയ പുരാവസ്തു ഗവേഷണങ്ങളില്‍, നൂറ്റാണ്ടുകള്‍ പഴക്കമുള്ള ജനവാസ കേന്ദ്രങ്ങളുടെ അവശിഷ്ടങ്ങളും പുരാവസ്തുക്കളും കണ്ടെത്തിയിട്ടുണ്ട്. ഈ പ്രദേശം ഒരുകാലത്ത് സജീവമായ മനുഷ്യവാസത്തിന് സാക്ഷ്യം വഹിച്ചിരുന്നു എന്നതിന്റെ സൂചനയാണിത്. ബഹ്‌റൈന്‍ തലസ്ഥാനം മനാമയില്‍ നിന്ന് 40 മീറ്റര്‍ അകലെയാണ് ഈ മരത്തിന്റെ സ്ഥാനം. ബഹ്‌റൈനിലെ ഏറ്റവുമുയര്‍ന്ന ഭൂമേഖലയായ ജെബെല്‍ ദുഖാന്‍ ഈ മരത്തിന് 6 കിലോമീറ്റര്‍ അകലെയാണ്. മഴപ്പെയ്ത്ത് വളരെക്കുറവുള്ള രാജ്യമാണ് ബഹ്‌റൈന്‍. പ്രോസോപിസ് സിനറേറിയ മരങ്ങള്‍ പേര്‍ഷ്യന്‍ മെസ്‌ക്വിറ്റ്, ഖെജ്‌റി തുടങ്ങിയ പേരുകളില്‍ അറിയപ്പെടുന്നു. പുഷ്പിക്കുന്ന മരങ്ങളില്‍ പെട്ടതാണ് ഇവ.പടിഞ്ഞാറന്‍ ഏഷ്യയിലും ഇന്ത്യന്‍ ഉപഭൂഖണ്ഡത്തിലും ഇവ കാണാം. രാജസ്ഥാന്റെ ഔദ്യോഗിക സംസ്ഥാനമരവുമാണ് ഇത്.