പുത്തനൊരു വാഹനം കൂടി സമ്മാനിക്കാന്‍ ഒരുങ്ങി മഹീന്ദ്ര ; എത്തുന്നത് XEV 9S സെവന്‍ സീറ്റര്‍ ഇലക്ട്രിക് എസ്യുവി

പുത്തനൊരു വാഹനം കൂടി ഇന്ത്യക്കാര്‍ക്ക് സമ്മാനിക്കാന്‍ ഒരുങ്ങുകയാണ് മഹീന്ദ്ര ആന്‍ഡ് മഹീന്ദ്ര. ടീസര്‍ വീഡിയോകളിലൂടെ ഇതിനോടകം ശ്രദ്ധേയമായ XEV 9S സെവന്‍ സീറ്റര്‍ ഇലക്ട്രിക് എസ്യുവിയാണ് അടുത്തതായി എത്താന്‍ ഒരുങ്ങുന്നത്. മോഡലിന്റെ പുതിയൊരു ടീസറും പങ്കുവെച്ച് വരാനിരിക്കുന്ന 7-സീറ്റര്‍ ഇവിയെക്കുറിച്ച് കൂടുതല്‍ വിവരങ്ങള്‍ പങ്കുവെക്കുകയാണ് മഹീന്ദ്ര. ഫീച്ചറുകള്‍ കുത്തിനിറച്ച ഇന്റീരിയര്‍, അപ്മാര്‍ക്കറ്റ് ക്യാബിന്‍ എക്‌സ്പീരിയന്‍സ് എന്നിവയെക്കുറിച്ചാണ് പുതിയ ടീസറിലുള്ളത്. നവംബര്‍ 27-ന് ബെംഗളൂരുവില്‍ നടക്കുന്ന ബ്രാന്‍ഡിന്റെ സ്‌ക്രീം ഇലക്ട്രിക് പരിപാടിയിലായിരിക്കും വാഹനത്തിന്റെ അരങ്ങേറ്റമുണ്ടാവുക.

ബോണ്‍ ഇലക്ട്രിക് INGLO സ്‌കേറ്റ്‌ബോര്‍ഡ് പ്ലാറ്റ്ഫോമിനെ അടിസ്ഥാനമാക്കിയുള്ള മഹീന്ദ്രയുടെ ആദ്യത്തെ ഫുള്ളി ഇലക്ട്രിക് ത്രീ-റോ എസ്യുവിയായിരിക്കും XEV 9S. XEV 9e, BE 6 എന്നിവയേക്കാള്‍ പ്രീമിയമായ അകത്തളമായിരിക്കും ഈ സെവന്‍ സീറ്റര്‍ വാഹനത്തില്‍ കമ്പനി ഒരുക്കുക. മഹീന്ദ്രയുടെ മറ്റ് ഫ്‌ലാഗ്ഷിപ്പ് ഇവികളില്‍ കാണുന്ന അതേ ഉയര്‍ന്ന നിലവാരമുള്ള ഓഡിയോ സജ്ജീകരണമായ ഹര്‍മാന്‍ കാര്‍ഡണ്‍ സൗണ്ട് സിസ്റ്റം ഈ എസ്യുവിയില്‍ സജ്ജീകരിച്ചിരിക്കും. പവര്‍ വിന്‍ഡോകള്‍ക്കായുള്ള സോഫ്റ്റ്-ടച്ച് മെറ്റീരിയലുകള്‍, സ്ലീക്ക് ഡോര്‍ പാഡുകള്‍, ടോഗിള്‍-സ്‌റ്റൈല്‍ സ്വിച്ചുകള്‍ എന്നിവയെക്കുറിച്ചുള്ള സൂക്ഷ്മമായ വിവരണവും പുതിയ ടീസര്‍ വീഡിയോ നല്‍കുന്നുണ്ട്. മെമ്മറി സെറ്റിംഗുകള്‍, വെന്റിലേറ്റഡ് സീറ്റുകള്‍, മള്‍ട്ടി-സോണ്‍ ക്ലൈമറ്റ് കണ്‍ട്രോള്‍, പവര്‍-അഡ്ജസ്റ്റബിള്‍ ഡ്രൈവര്‍ സീറ്റ്, ഒന്നും രണ്ടും നിര സീറ്റുകള്‍ക്ക് സ്ലൈഡിംഗ്, റീക്ലൈനിംഗ് ഫങ്ഷന്‍ എന്നിവയും മഹീന്ദ്രയുടെ XEV 9S ഇവിയില്‍ ഉണ്ടാവും.

ഡിജിറ്റല്‍ ഡ്രൈവര്‍ ഡിസ്‌പ്ലേ, സെന്‍ട്രല്‍ ഇന്‍ഫോടെയ്ന്‍മെന്റ് ടച്ച്സ്‌ക്രീന്‍, ഒരു പ്രത്യേക പാസഞ്ചര്‍ എന്റര്‍ടൈന്‍മെന്റ് സ്‌ക്രീന്‍ എന്നിവയുള്‍പ്പെടെയുള്ള ട്രിപ്പിള്‍-സ്‌ക്രീന്‍ സജ്ജീകരണം ഇന്റീരിയറിനെ വേറിട്ടു നിര്‍ത്തും. ബാക്ക്ലിറ്റ് മഹീന്ദ്ര ലോഗോയുള്ള ഫ്‌ലാറ്റ്-ബോട്ടം സ്റ്റിയറിംഗ് വീല്‍, ആംബിയന്റ് ലൈറ്റിംഗ്, പനോരമിക് സണ്‍റൂഫ് എന്നിവയാണ് പുതിയ 7-സീറ്റര്‍ ഇലക്ട്രിക് എസ്യുവിയിലെ മറ്റ് ഫീച്ചറുകള്‍. വയര്‍ലെസ് ചാര്‍ജിംഗ്, 360-ഡിഗ്രി ക്യാമറ, ലെവല്‍ 2 ADAS സ്യൂട്ട്, ഓട്ടോ ഹോള്‍ഡുള്ള ഇലക്ട്രോണിക് പാര്‍ക്കിംഗ് ബ്രേക്ക്, 7 എയര്‍ബാഗുകള്‍ എന്നിവയും വരാനിരിക്കുന്ന മഹീന്ദ്രയുടെ ഇലക്ട്രിക് എസ്യുവിയില്‍ ഉള്‍പ്പെടുമെന്ന് പ്രതീക്ഷിക്കാം.