"എന്റെ അച്ഛൻ സ്നേഹത്തിന്റെ വലിയ കൊറിയറുകൾ അയയ്ക്കുന്നത് അനുപം അങ്കിളിലൂടെയാണ്..."വൻഷിക കൗശികിന്റെ ഹൃദയസ്പർശിയായ സന്ദേശം കണ്ട് കണ്ണീരണിഞ്ഞ് അനുപം ഖേർ

Anupam kher with sathish kaushik and daughter (Image Source: Instagram)

സ്റ്റാർട്ട്‌ ആക്ഷൻ കട്ട്‌ പറഞ്ഞു കഴിയുമ്പോഴും ക്യാമറയ്ക്ക് പിന്നിൽ വളരെ ആത്മാർത്ഥമായി സ്നേഹിക്കുന്ന സുഹൃത്തുക്കൾ സിനിമാമേഖലയിലുണ്ട്. അത്തരത്തിൽ വലിയൊരു ആത്മബന്ധം കാത്തുസൂക്ഷിക്കുന്ന സുഹൃത്തുക്കളാണ് അനിൽ കപൂറും അനുപം ഖേറും സതീഷ് കൗശികും. അതിൽ സതീഷ് കൗശിക് ഇന്നിവർക്കൊപ്പമില്ല. സതീഷിന്റെ വേർപാടിന്റെ വേദനയിലാണ് അനുപം ഖേറും അനിൽ കപൂറും ജീവിക്കുന്നത്.
പലപ്പോഴും സതീഷിന്റെ പേര് പറയുമ്പോൾ തന്നെ ഇവർക്ക് രണ്ടാൾക്കും കണ്ണ് നിറയാറുണ്ട്. അന്തരിച്ച സുഹൃത്ത് സതീഷ് കൗശിക്കിന്റെ മരണശേഷം കുടുംബത്തോടൊപ്പം ചേർന്നു നിൽക്കുകയാണ് അനുപം ഖേർ.
ഇപ്പോഴിതാ കൗശിക്കിന്റെ മകൾ വൻഷികയിൽ നിന്ന് ഹൃദയംഗമമായ ഒരു സന്ദേശം കണ്ട് കണ്ണീരണിഞ്ഞ അനുപം ഖേറിന്റെ ഒരു വീഡിയോയാണ് വൈറലാകുന്നത്. തന്റെ പ്രിയപ്പെട്ട അച്ഛൻ അവശേഷിപ്പിച്ച ശൂന്യത അനുപം ഖേർ എങ്ങനെ നികത്തുന്നുവെന്നും എങ്ങനെ നിരന്തരമായ പിന്തുണയും വാത്സല്യവും നൽകുന്നുവെന്നുമാണ് വൻഷിക വിവരിക്കുന്നത്. ഒരു അഭിമുഖത്തിനിടെ ആ പെൺകുട്ടിയുടെ വൈകാരിക വീഡിയോ സന്ദേശം അനുപം ഖേറിനെ നിശബ്ദനാക്കുന്നുണ്ട്.
"അനുപം അങ്കിൾ" എന്ന വ്യക്തിയുമായി താൻ പങ്കിടുന്ന ബന്ധത്തെക്കുറിച്ച് വൻഷിക കൗശിക് സ്നേഹപൂർവ്വം സംസാരിച്ചു, തന്റെ പിതാവിന്റെ മരണശേഷം അദ്ദേഹം എങ്ങനെ നിരന്തരമായ പിന്തുണയും വാത്സല്യവും നൽകിയിട്ടുണ്ടെന്ന് താരപുത്രി പറയുന്നു.
“എന്റെ അച്ഛൻ പഴയതുപോലെ എന്നോടൊപ്പമില്ലെന്ന് എനിക്കറിയാം. പക്ഷേ ഇപ്പോഴും എനിക്ക് അദ്ദേഹത്തിന്റെ എല്ലാ സ്നേഹവും ലഭിക്കുന്നു. എങ്ങനെയെന്ന് നിങ്ങൾക്കറിയാമോ? അച്ഛൻ തന്റെ എല്ലാ സ്നേഹവും അയയ്ക്കുന്നത് അദ്ദേഹത്തിന്റെ ഉറ്റ സുഹൃത്തായ മിസ്റ്റർ അനുപം ഖേർ വഴിയാണ്, ഞാൻ അദ്ദേഹത്തെ അനുപം അങ്കിൾ എന്ന് വിളിക്കുന്നു. പപ്പ പെട്ടെന്ന് ഒരു പ്രത്യേക യാത്ര പോകേണ്ടി വന്നപ്പോൾ, അദ്ദേഹം എന്റെ കൈ പിടിച്ചു, എന്നെ നയിച്ചു, ഓരോ ഘട്ടത്തിലും എന്നെ സംരക്ഷിച്ചു. എനിക്ക് എന്റെ അച്ഛനെ കാണാൻ കഴിഞ്ഞേക്കില്ലെങ്കിലും, അദ്ദേഹത്തിന്റെ ഊഷ്മളത എനിക്ക് തീർച്ചയായും അനുപം അങ്കിളിലൂടെ അനുഭവിക്കാൻ കഴിഞ്ഞു.
തന്റെ അച്ഛൻ എല്ലാ ഞായറാഴ്ചയും ഉച്ചഭക്ഷണത്തിന് കൊണ്ടു പോയിരുന്ന ആ ശീലം തിരക്കേറിയ ഷെഡ്യൂളുകൾക്കിടയിലും അനുപം ഖേർ മുടക്കാതിരിക്കുന്ന കാര്യവും വൻഷിക പറഞ്ഞു. “അദ്ദേഹം എന്നോടൊപ്പം സമയം ചെലവഴിക്കുന്നു, എന്റെ സ്കൂളിനെക്കുറിച്ചും പഠനത്തെക്കുറിച്ചും എന്റെ ഇൻസ്റ്റാഗ്രാം ചാനലിനെക്കുറിച്ചും സംസാരിക്കുന്നു. ഓ, ഞാൻ നിങ്ങളോട് ഇത് പറയണം. അനുപം അങ്കിൾ എന്നോടൊപ്പം ചില അടിപൊളി റീലുകൾ ചെയ്തിട്ടുണ്ട്, അത് അദ്ദേഹം സ്വന്തം ഇൻസ്റ്റാഗ്രാം പേജിൽ പങ്കിട്ടു.
അദ്ദേഹം എന്നോടൊപ്പം നൃത്തം ചെയ്യാറുണ്ട്, തമാശകൾ പറയാറുണ്ട്, എന്റെ കഥകൾ കേൾക്കാറുണ്ട്. ഞാൻ എന്റെ അച്ഛനോടൊപ്പം ചെയ്യുന്നതെല്ലാം അദ്ദേഹം ചെയ്തു തരാറുണ്ട്. അദ്ദേഹത്തിന്റെ ഹെയർസ്റ്റൈൽ പോലും പപ്പയുടേതിന് സമാനമാണ്. അതുകൊണ്ടാണ് പപ്പ ഇപ്പോഴും തന്റെ സ്നേഹത്തിന്റെ വലിയ കൊറിയറുകൾ അയയ്ക്കുന്നതെന്ന് എനിക്ക് തോന്നുന്നു. ഡെലിവറി വിലാസം അനുപം അങ്കിളിന്റേതാണ്. നന്ദി, അനുപം അങ്കിൾ. നിങ്ങൾക്ക് ഒരുപാട് സ്നേഹവും ആശംസകളും...." എന്നാണ് വൻഷിക വീഡിയോയിൽ പറഞ്ഞത്.
വൻഷികയുടെ വൈകാരിക പ്രതികരണം കേട്ട് അനുപം ഖേർ വികാരഭരിതനായി, കണ്ണുകൾ നിറഞ്ഞു. അഭിമുഖം അവസാനിപ്പിക്കാൻ അവതാരികയായ റിച്ചയോടു മൃദുവായി ആവിശ്യപെട്ടു. "എത്ര മധുരം... വൗ. ഇതിനുശേഷം എനിക്ക് ഒന്നും പറയാൻ കഴിയില്ല..." നനഞ്ഞ കണ്ണുകളോടെ ഖേർ പിന്നീട് കൂട്ടിച്ചേർത്തു, "ആരുടെയെങ്കിലും നന്മയാണ് നിങ്ങളെ സ്പർശിക്കുന്നത്. അവളുടെ അച്ഛനെക്കുറിച്ച് സംസാരിക്കാൻ അവൾക്ക് വളരെയധികം ധൈര്യം ആവശ്യമായിരുന്നിരിക്കണം, അവിടെ അവൾ എനിക്ക് ആദരം അർപ്പിക്കുന്നു, ഞാൻ അവളെ അത്രമാത്രം സ്നേഹിക്കുന്നു. അവൾ ഇത്രയും നന്നായി സംസാരിച്ചത് അവളുടെ ധൈര്യമാണ്. അതുകൊണ്ടാണ് വാക്കാലുള്ള സംഭാഷണം ഉണ്ടാകുന്നത്, പക്ഷേ വാക്കുകൾ അങ്ങനെയല്ല. ഇത് കൂടുതൽ സ്നേഹം കാണിക്കുന്നു...." എന്നാണ് അനുപം ഖേർ പറയുന്നത്.

View this post on Instagram

A post shared by Anupam Kher (@anupampkher)

ഹൃദയംഗമമായ വൈകാരിക വീഡിയോ പങ്കുവെച്ചുകൊണ്ട് അനുപം ഖേർ ഇൻസ്റ്റാഗ്രാമിൽ കുറിച്ചിട്ടുണ്ട്. “എനിക്കുള്ള മനോഹരമായ ഒരു സന്ദേശം: എന്റെ പ്രിയപ്പെട്ട വൻഷിക ബേട്ടാ... നിങ്ങളുടെ വാക്കുകൾ എന്റെ ഹൃദയത്തിന്റെയും ആത്മാവിന്റെയും ആഴങ്ങളെ സ്പർശിച്ചു... നിങ്ങളുടെ ഉദാരമനസ്കതയും നിങ്ങളോടുള്ള എന്റെ സ്നേഹത്തെയും കരുതലിനെയും കുറിച്ചുള്ള നിങ്ങളുടെ ധാരണയും എന്നെ വളരെയധികം സ്പർശിച്ചു (ഈ വീഡിയോയിൽ നിങ്ങൾ കാണുന്നത് പോലെ)! ഞാൻ എപ്പോഴും നിനക്കൊപ്പമുണ്ടാകും...
നീ അതിശയകരമാംവിധം തിളക്കമുള്ളവളും, മിടുക്കിയും, കഴിവുള്ളവളുമാണ്... സതീഷ് എപ്പോഴും നിങ്ങളെ മികച്ച സ്ഥലത്ത് നിന്ന് നിരീക്ഷിക്കുന്നു. തന്റെ സ്നേഹവും കരുതലും എന്നിലൂടെ നിങ്ങളിലേക്ക് എത്തുമെന്ന ചിന്തയിൽ അദ്ദേഹത്തിന് സുഖം തോന്നുന്നു... കൂടാതെ, എന്റെ അറിവില്ലാതെ ഈ വീഡിയോ വൻഷികയോട് ആവശ്യപ്പെട്ടതിന് പ്രിയപ്പെട്ട റിച്ച നിരുദ്ധയ്ക്ക് നന്ദി... ദയയും കാരുണ്യവുമുള്ള ഒരാൾക്ക് മാത്രമേ ഇത് ചെയ്യാൻ കഴിയൂ... നിങ്ങൾ രണ്ടുപേർക്കും സ്നേഹവും പ്രാർത്ഥനയും... " എന്നാണ് അനുപം ഖേർ കുറിക്കുന്നത്.

കഴിഞ്ഞ വർഷം, സതീഷ് കൗശിക്കിന്റെ 68-ാം ജന്മവാർഷികത്തിൽ, അവരുടെ പതിറ്റാണ്ടുകൾ നീണ്ട സൗഹൃദത്തെ ഓർമ്മിക്കുന്ന ഒരു ഹൃദയംഗമമായ പോസ്റ്റ് അനുപം ഖേർ പങ്കിട്ടിരുന്നു. അവരുടെ പ്രിയപ്പെട്ട ഓർമ്മകളുടെ ഒരു സംഗ്രഹം പോസ്റ്റ് ചെയ്താണ് അനുപം ഖേർ കുറിച്ചത്. "ജന്മദിനാശംസകൾ എന്റെ പ്രിയപ്പെട്ട സതീഷേ! നീ എവിടെയായിരുന്നാലും ദൈവം നിനക്ക് എല്ലാ സന്തോഷവും നൽകട്ടെ. എനിക്ക്, നീ എപ്പോഴും കൂടെയുണ്ട്... ചിത്രങ്ങളിലൂടെ, ഭക്ഷണത്തിലൂടെ, സംഭാഷണങ്ങളിലൂടെ, ഞാൻ തനിച്ചായിരിക്കുമ്പോൾ, ഞാൻ ആളുകളോടൊപ്പമുള്ളപ്പോൾ. നിങ്ങളുടെ ഓർമ്മ ആഴത്തിൽ നിറഞ്ഞു നിൽക്കുന്നു..." എന്നാണ് അനുപം ഖേർ കുറിച്ചത്.
സതീഷ് കൗശിക് തന്റെ 66-ാം വയസ്സിൽ 2023 മാർച്ചിലാണ് ഹൃദയാഘാതത്തെ തുടർന്ന് ഗുരുഗ്രാമിൽ വച്ചാണ് അന്തരിച്ചത്. വെള്ളിത്തിരയിൽ സതീഷ് അനശ്വരമാക്കിയ കഥാപാത്രങ്ങളിലൂടെയും ഏറ്റവും അടുത്ത സുഹൃത്ത് അനുപം ഖേറും സതീഷിന്റെ മകൾ വൻഷികയും വിലമതിക്കുന്ന സ്നേഹത്തിലൂടെയും ഓർമ്മകളിലൂടെയും ഇന്നും എല്ലാവരുടെയും മനസ്സിൽ ജീവിക്കുന്നു.