മലയാളികളുടെ സ്വന്തം മധുവിന് ഇന്ന് 92 ാം പിറന്നാള്‍; പ്രിയനടന് ആശംസകളുമായി താരങ്ങള്‍

മലയാളികളുടെ എക്കാലത്തെയും പ്രിയപ്പെട്ട നടനായ മധുവിന്റെ 92 ാം ജന്മദിനമാണിന്ന്. പ്രിയനടന് ആശംസകളുമായെത്തുകയാണ് സിനിമാ ലോകവും ആരാധകരും. കുറച്ചേറെ നാളുകളായി അഭിനയത്തില്‍ നിന്നും മാറി വിശ്രമജീവിതം നയിക്കുകയാണ് താരം.

ഹാപ്പി ബര്‍ത്ത്‌ഡേ മൈ സൂപ്പര്‍ സ്റ്റാര്‍ എന്നായിരുന്നു മധുവിന്റെ ചിത്രം പങ്കുവെച്ച് മമ്മൂട്ടി ഫെയ്‌സ്ബുക്കില്‍ കുറിച്ചത്. ബഹുമാനപ്പെട്ട മധുസാറിന് ഹൃദയം നിറഞ്ഞ ജന്മദിനാശംസകള്‍ എന്നായിരുന്നു മോഹന്‍ലാലിന്റെ ആശംസ.

ഹാപ്പി ബര്‍ത്ത്‌ഡേ മധു സാര്‍ എന്നായിരുന്നു നടന്‍ ദിലീപ് ഫെയ്‌സ്ബുക്കില്‍ കുറിച്ചത്. സുരേഷ് ഗോപിയും മധുവിന് ആശംസകള്‍ നേര്‍ന്ന് പോസ്റ്റ് പങ്കുവെച്ചിരുന്നു.

1962 ലായിരുന്നു മലയാള ചലച്ചിത്രരംഗത്തേക്ക് മധു കടന്ന് വന്നതത്.ആദ്യ മലയാളചിത്രം രാമു കാര്യാട്ടിന്റെ മൂടുപടം ആയിരുന്നു എങ്കിലും ആദ്യം പുറത്തിറങ്ങിയ ചിത്രം ശോഭനാ പരമേശ്വരന്‍ നായര്‍നിര്‍മിച്ച് എന്‍.എന്‍ പിഷാരടി സംവിധാനംചെയ്ത നിണമണിഞ്ഞ കാല്പാടുകള്‍ ആണ്.

മലയാള സിനിമാ ചരിത്രത്തിലെ നാഴികക്കല്ലെന്ന് വിശേഷിപ്പിക്കപ്പെടുന്ന ചെമ്മീനാണ് മധുവിന്റെ അഭിനയ ജീവിതത്തിലും വഴിത്തിരിവായത്.
കറുത്തമ്മയെ കുടിയിരുത്തിയ പ്രണയതരളമായ മനസ്സുമായി ജീവിച്ച പരീക്കുട്ടി മലയാളികളുടെ ഹൃദയത്തിലേക്കാണ് നടന്നു കയറിയത്.

ഓളവും തീരവും, ഏണിപ്പടികള്‍, ഭാര്‍ഗവീ നിലയം, ഇതാ ഒരു മനുഷ്യന്‍, ഹൃദയം ഒരു ക്ഷേത്രം, ജീവിതം, പ്രായിക്കര പാപ്പാന്‍, നരന്‍ എന്നിങ്ങനെ നാനൂറിലേറെ ചിത്രങ്ങളില്‍ മധു അഭിനയിച്ചു. സംവിധായകന്‍, നിര്‍മാതാവ് എന്നീ റോളുകളിലും മധു തിളങ്ങി. 12 ചിത്രങ്ങള്‍ സംവിധാനം ചെയ്തു. 15 ചിത്രങ്ങള്‍ നിര്‍മിച്ചു. 2004 ല്‍ സംസ്ഥാന സര്‍ക്കാര്‍ ജെസി ഡാനിയേല്‍ പുരസ്‌കാരം നല്‍കി ആദരിച്ചു. 2013 ല്‍ പത്മശ്രീ പുരസ്‌കാരവും ലഭിച്ചു.