വീണ്ടും അച്ഛന്‍ മകന്‍ മാജിക്കല്‍ കോമ്പോ;ജയറാം-കാളിദാസ് ചിത്രത്തിന്റെ ഫസ്റ്റ്ലുക്ക് തരംഗം; സ്വപ്നത്തിന്റെ പുനർജനനമാണ് എന്ന് കുറിച്ച് കാളിദാസ്

ജയറാമും മകന്‍ കാളിദാസും പ്രേക്ഷകര്‍ക്ക് ഏറെയിഷ്ടമുള്ള താരങ്ങളാണ്. ഇവര്‍ ഒരുമിച്ചെത്തിയ സിനിമകള്‍ക്ക് നിറഞ്ഞ കൈയടിയും കിട്ടിയിട്ടുണ്ട്. ഇപ്പോഴിതാ വര്‍ഷങ്ങള്‍ക്കിപ്പുറം ഇവര്‍ രണ്ടാളും ഒരുമിച്ചെത്തുന്ന ‘ആശകള്‍ ആയിരം’ സിനിമയുടെ ഫസ്റ്റ്ലുക്ക് പോസ്റ്റര്‍ പങ്കിട്ടിരിക്കുകയാണ് കാളിദാസ്.

Firstlook poster of aashakal aayiram (Image Source: Instagram)

മലയാള സിനിമാപ്രേക്ഷകരുടെ പ്രിയ താരമായി ജയറാം ബിഗ് സ്ക്രീനില്‍ നിറഞ്ഞു നില്‍ക്കാന്‍ തുടങ്ങിയിട്ട് ഒരുപാട് കാലങ്ങളായി. സിനിമയില്‍ തിളങ്ങി നിന്നിരുന്ന പാര്‍വ്വതിയെ വിവാഹം ചെയ്ത ജയറാം തെന്നിന്ത്യയില്‍ തന്നെ ഏറ്റവും പ്രിയങ്കരനായ താരമാണ്. അച്ഛനു പിന്നാലെ വര്‍ഷങ്ങള്‍ക്കു മുമ്പു തന്നെ ബാലതാരമായി മകന്‍ കാളിദാസ് ജയറാമും പ്രേക്ഷകമനസ്സിലിടം നേടിയിരുന്നു. അച്ഛനും മകനുമായി തന്നെ ബിഗ് സ്ക്രിനില്‍ ഇരുവരും മത്സരിച്ച് അഭിനയിച്ച ‘എന്റെ വീട് അപ്പൂന്റേം’ ഇന്നും പ്രേക്ഷകര്‍ക്ക് ഏറെയിഷ്ടമുള്ള കുടുംബചിത്രങ്ങളില്‍ ഒന്നാണ്.
ഇപ്പോഴിതാ വര്‍ഷങ്ങള്‍ക്കിപ്പുറം താനും അച്ഛനും ഒരുമിച്ച് സ്ക്രീന്‍ ഷെയര്‍ ചെയ്യുന്ന സന്തോഷം പങ്കിടുകയാണ് കാളിദാസ്. ‘ആശകള്‍ ആയിരം’ എന്ന സിനിമയുടെ ഫസ്റ്റ്ലുക്ക് പോസ്റ്റര്‍ പങ്കിട്ടാണ് കാളിദാസിന്റെ കുറിപ്പ്.
‘‘25 വർഷമായി കാത്തിരുന്ന് നിര്‍മ്മിച്ച ഒരു നിമിഷം...
എന്റെ അപ്പയോടൊപ്പം ഒരു വിടർന്ന കണ്ണുകളുള്ള കുട്ടിയായി - റീലിലും യഥാർത്ഥ ജീവിതത്തിലും അദ്ദേഹത്തിന്റെ മകനായി - സ്‌ക്രീൻ പങ്കിടുന്നത് മുതൽ വർഷങ്ങളുടെ പഠനത്തിലൂടെ രൂപപ്പെട്ട ഒരു നടനായി വീണ്ടും അദ്ദേഹത്തോടൊപ്പം നിൽക്കുന്നത് വരെ, ഈ യാത്ര ഒരു പൂർണ്ണ വൃത്തം പോലെ തോന്നുന്നു...
ഇത് വെറുമൊരു സിനിമയേക്കാൾ കൂടുതലാണ്. ഇതൊരു വികാരമാണ്, ഒരു പുനഃസമാഗമമാണ്, ഒരു സ്വപ്നത്തിന്റെ പുനർജനനമാണ്.
ഞങ്ങളുടെ വരാനിരിക്കുന്ന ചിത്രമായ ’ആശകൾ ആയിരം’ ന്റെ ആദ്യ ലുക്ക് പങ്കിടുന്നതിൽ വളരെ വിനയവും സന്തോഷവും തോന്നുന്നു...ഞങ്ങളുടെ ഹൃദയങ്ങളോട് ചേർന്നുനിൽക്കുന്ന ഒരു കഥ... മിടുക്കനായ ജി. പ്രജിത്ത് നയിക്കുന്ന, ഞങ്ങളുടെ ക്രിയേറ്റീവ് ക്യാപ്റ്റനായി എപ്പോഴും പ്രചോദനം നൽകുന്ന ജൂഡ് ആന്റണി ജോസഫിനൊപ്പം, ഞങ്ങളുടെ പ്രിയപ്പെട്ട ഗോകുലം ഗോപാലൻ സാറിന്റെയും അഭിമാനകരമായ ശ്രീ ഗോകുലം മൂവീസിന്റെയും അചഞ്ചലമായ പിന്തുണയില്ലാതെ ഇതൊന്നും സാധ്യമാകില്ല...
ഇത് എല്ലാ അച്ഛൻ-മകൻ ബന്ധത്തിനും, ഓരോ സ്വപ്നജീവിക്കും, എല്ലാം ആരംഭിച്ച സ്ഥലത്തേക്ക് വീട്ടിലേക്ക് വരുമെന്ന് വിശ്വസിച്ചിട്ടുള്ള എല്ലാവർക്കും വേണ്ടിയുള്ളതാണ്....’’ എന്ന ക്യാപ്ഷനൊപ്പമാണ് കാളിദാസിന്റെ കുറിപ്പ്. രണ്ട് ദിശകളിലേക്ക് സഞ്ചരിക്കുന്ന, എന്നാല്‍ മകനെ പിന്തിരിഞ്ഞു നോക്കുന്ന ഒരു അച്ഛന്റെയും മകന്റെയും ചിത്രമാണ് ഫസ്റ്റ്ലുക്ക് പോസ്റ്ററില്‍.
കാളിദാസ് പങ്കിട്ട പോസ്റ്റിനു താഴെ സഹതാരങ്ങളും ആരാധകരുമടക്കം നിരവധി പേര്‍ ആശംസകളും കമന്റുകളും കുറിക്കുന്നുണ്ട്. ലവ് ഇമോജിയാണ് കല്യാണി നല്‍കിയിരിക്കുന്നത്. ‘കാത്തിരിക്കാനാവുന്നില്ല ബ്രോ’ എന്നാണ് സഞ്ജു സാംസണ്‍ കുറിച്ചിരിക്കുന്നത്. ‘ജയറാമേട്ടന് ‘യാത്രക്കാരുടെ ശ്രദ്ധയ്ക്ക്’ എന്ന സിനിമയിലെ ലുക്ക്, വർഷങ്ങൾക്ക് ശേഷം വീണ്ടും ആ അച്ഛൻ മകൻ മാജിക്കൽ കോമ്പോ, ഇതാണ് മലയാളികൾ ആഗ്രഹിച്ച ലുക്ക്‌ പഴയ ജയറാമേട്ടൻ...’ എന്നതടക്കമാണ് കമന്റുകള്‍.