സ്‌ക്രാംബ്ലര്‍ 400 XC പുറത്തിറക്കാന്‍ ഒരുങ്ങി ട്രയംഫ് ; ബൈക്കിന്റെ വില ലോഞ്ചിന് മുമ്പേ ചോര്‍ന്നു

ട്രയംഫ് ഇന്ത്യയടക്കമുള്ള വിപണികള്‍ ലക്ഷ്യമിട്ട് പുറത്തിറക്കിയ മോഡലുകളില്‍ ഒന്ന് ആയിരുന്നു സ്‌ക്രാംബ്ലര്‍ 400X. കഴിഞ്ഞ ദിവസം കമ്പനി പുത്തന്‍ നിറം ചേര്‍ത്ത് ഈ ബൈക്ക് അപ്ഡേറ്റ് ചെയ്തിരുന്നു. ഇതിന്റെ കൂടെ തന്നെ ഇതേ മോട്ടോര്‍സൈക്കിളിന്റെ കൂടുതല്‍ പ്രീമിയം ഓഫ്റോഡ് ഫോക്കസ്ഡ് മോഡല്‍ ആയ സ്‌ക്രാംബ്ലര്‍ 400 XC പുറത്തിറക്കാന്‍ പോകുകയാണ് ബ്രിട്ടീഷ് ബ്രാന്‍ഡ്. പരീക്ഷണയോട്ടത്തിനിടെ ക്യാമറക്കണ്ണുകളില്‍ പതിഞ്ഞിരുന്ന ഈ ബൈക്കിന്റെ വില ലോഞ്ചിന് മുമ്പേ ചോര്‍ന്നിരിക്കുകയാണ്.

സ്പീഡ് T4, സ്പീഡ് 400, സ്‌ക്രാംബ്ലര്‍ 400 X എന്നിവയ്ക്ക് ശേഷം ട്രയംഫിന്റെ 400 സിസി പോര്‍ട്ട്ഫോളിയോയിലേക്ക് എത്തുന്ന പുതിയ മോഡലാണ് സ്‌ക്രാംബ്ലര്‍ 400 XC. കമ്പനിയുടെ 400 സിസി നിരയിലെ പുതിയ ഫ്ലാഗ്ഷിപ്പ് മോഡല്‍ ആയിരിക്കും ഇത്. പുതിയ സ്‌ക്രാംബ്ലര്‍ 400 XC ട്രയംഫിന്റെ 400 സിസി നിരയിലേക്ക് ചില ഓഫ്-റോഡിംഗ് സവിശേഷതകള്‍ ചേര്‍ക്കും. പുതിയ മോട്ടോര്‍സൈക്കിള്‍ സ്‌ക്രാംബ്ലര്‍ 400 X മോഡലിനെ അടിസ്ഥാനമാക്കിയാണ് പണികഴിപ്പിച്ചിരിക്കുന്നത്.

അതുകൊണ്ട് തന്നെ എഞ്ചിന്‍, ഫ്രെയിം, മിക്ക സൈക്കിള്‍ പാര്‍ട്സുകളും സ്‌ക്രാംബ്ലര്‍ 400 XC നിലവിലെ സ്‌ക്രാംബ്ലര്‍ 400 X ബൈക്കുമായി പങ്കിടും. രണ്ട് സ്‌ക്രാംബ്ലര്‍ 400 വേരിയന്റുകള്‍ തമ്മിലുള്ള പ്രധാന വ്യത്യാസങ്ങളില്‍ ഒന്ന് വീലുകളുടെ കാര്യത്തില്‍ ആയിരിക്കുമെന്ന് സ്പൈ ചിത്രങ്ങളില്‍ നിന്ന് വ്യക്തമായതാണ്. സ്‌ക്രാംബ്ലര്‍ XC-ക്ക് അലോയ് വീലുകള്‍ക്ക് പകരം ട്യൂബ്ലെസ് ടയറുകളില്‍ പൊതിഞ്ഞ ക്രോസ്-സ്‌പോക്ക് വീലുകള്‍ ലഭിക്കും.

8,000 ആര്‍പിഎമ്മില്‍ 39.5 bhp പവറും 6,500 ആര്‍പിഎമ്മില്‍ 37.5 Nm ടോര്‍ക്കും ഉത്പാദിപ്പിക്കാന്‍ ശേഷിയുള്ള 398.15 സിസി ലിക്വിഡ്-കൂള്‍ഡ് സിംഗിള്‍-സിലിണ്ടര്‍ എഞ്ചിനാണ് സ്‌ക്രാംബ്ലര്‍ 400 XC-ക്ക് കരുത്തേകാന്‍ എത്തുക. ഈ എഞ്ചിന്‍ 6-സ്പീഡ് ഗിയര്‍ബോക്‌സുമായി ജോടിയാക്കും. ബൈക്കില്‍ സ്ലിപ്പ് അസിസ്റ്റ് ക്ലച്ച് ഓപ്ഷനല്‍ ഫീച്ചറായി വാഗ്ദാനം ചെയ്യുമെന്ന് പ്രതീക്ഷിക്കുന്നു. പുതിയ സ്‌ക്രാംബ്ലര്‍ 400 XC-യുടെ മുന്നില്‍ 320 mm ഡിസ്‌ക്കും പിന്നില്‍ 230 mm ഡിസ്‌കുമായിരിക്കും ബ്രേക്കിംഗ് ഡ്യൂട്ടി കൈകാര്യം ചെയ്യുക.

നിലവില്‍ സ്‌ക്രാംബ്ലര്‍ 400X ബൈക്ക് 2.67 ലക്ഷം രൂപ എക്സ്ഷോറൂം വിലയിലാണ് വിലക്കുന്നത്. ട്രയംഫ് ഡീലര്‍ഷിപ്പുകളില്‍ നിന്നുള്ള വിവരങ്ങള്‍ അനുസരിച്ച് പുതിയ മോഡലിന് സ്‌ക്രാംബ്ലര്‍ 400 X നേക്കാള്‍ ഏകദേശം 25,000 രൂപ കൂടുതലായിരിക്കുമെന്നാണ് അറിയാന്‍ കഴിയുന്നത്. വിവിധ മാധ്യമങ്ങളില്‍ വന്ന റിപ്പോര്‍ട്ടുകള്‍ പ്രകാരം പുതിയ അഡ്വഞ്ചര്‍ ഫോക്കസ്ഡ് മോട്ടോര്‍സൈക്കിളിന് 2.94 ലക്ഷം രൂപ എക്സ്-ഷോറൂം വിലവരും.