ഭൂമിയിലെ സമുദ്രങ്ങള്‍ ഒരു കാലത്ത് പച്ചനിറത്തിലായിരുന്നു, വീണ്ടും അതേ അവസ്ഥയിലേക്ക് പോകുമെന്ന് ഗവേഷകര്‍

നാം ജീവിക്കുന്ന ഭൂമിയുടെ നാലില്‍ മൂന്ന് ഭാഗവും സമുദ്രങ്ങളാണ്. അതുകൊണ്ടു തന്നെ ബഹിരാകാശത്ത് നിന്ന് നോക്കുമ്പോള്‍ ഭൂമി ഒരു ഇളംനീല ബിന്ദു പോലെ കാണപ്പെടുന്നു. എന്നാല്‍ ഭൂമിയിലെ സമുദ്രങ്ങള്‍ ഒരുകാലത്ത് പച്ചയായിരുന്നുവെന്ന വാദവുമായി രംഗത്തെത്തിയിരിക്കുകയാണ് ജപ്പാനിലെ ഒരു സംഘം ഗവേഷകര്‍. നേച്ചറില്‍ പ്രസിദ്ധീകരിച്ച പഠനത്തില്‍ സമുദ്രങ്ങള്‍ വീണ്ടും പച്ചയായി മാറിയേക്കാമെന്നും ഗവേഷകര്‍ അവകാശപ്പെടുന്നു. പുരാതന കാലത്ത് സമുദ്രങ്ങള്‍ വ്യത്യസ്തമായി കാണപ്പെട്ടിരിക്കാനുള്ള കാരണം അവയുടെ രസതന്ത്രവും പ്രകാശസംശ്ലേഷണത്തിന്റെ പരിണാമവുമാണ്.

ഏകദേശം 3.8 മുതല്‍ 1.8 ബില്യണ്‍ വര്‍ഷങ്ങള്‍ക്ക് മുമ്പ് 'ആര്‍ക്കിയന്‍' കാലഘട്ടങ്ങളില്‍ ബാന്‍ഡഡ് ഇരുമ്പ് രൂപങ്ങള്‍ നിക്ഷേപിക്കപ്പെട്ടിരുന്നു. അന്ന് ജീവന്‍ സമുദ്രങ്ങളിലെ ഒരു കോശ ജീവികളില്‍ മാത്രമായി ഒതുങ്ങി. ചാര, തവിട്ട്, കറുത്ത പാറകളുടെയും അവശിഷ്ടങ്ങളുടെയും ഒരു തരിശായ ഭൂപ്രകൃതിയായിരുന്നു ഭൂഖണ്ഡങ്ങള്‍. ജാപ്പനീസ് അഗ്‌നിപര്‍വത ദ്വീപായ ഇവോ ജിമയ്ക്ക് ചുറ്റുമുള്ള ജലത്തിന് ഓക്‌സിഡൈസ് ചെയ്ത ഇരുമ്പിന്റെ പച്ചകലര്‍ന്ന നിറമുണ്ട്. ദ്വീപിനെ ചുറ്റിയുള്ള പച്ച വെള്ളത്തില്‍ നീല-പച്ച ആല്‍ഗകള്‍ തഴച്ചുവളരുന്നു. പ്രാകൃത ബാക്ടീരിയകളാണ് നീല-പച്ച ആല്‍ഗകള്‍. ആധുനിക നീല-പച്ച ആല്‍ഗകളുടെ ഈ പൂര്‍വികര്‍ യഥാര്‍ഥ ആല്‍ഗകളല്ല. ആര്‍ക്കിയന്‍ യുഗത്തില്‍ പ്രകാശസംശ്ലേഷണത്തിനായി വെള്ളത്തിന് പകരം ഫെറസ് ഇരുമ്പ് ഉപയോഗിക്കുന്ന മറ്റ് ബാക്ടീരിയകള്‍ക്കൊപ്പമാണ് ഈ ആല്‍ഗകള്‍ രൂപപ്പെട്ടത്.

ആദ്യകാല പ്രകാശസംശ്ലേഷണം വഴി പുറത്തുവിട്ട ഓക്‌സിജന്‍ ഉപരിതല ജലത്തെ പച്ചയാക്കാന്‍ ആവശ്യമായത്ര ഉയര്‍ന്ന ഓക്‌സിഡൈസ് ചെയ്ത ഇരുമ്പ് കണികകളിലേക്ക് എത്തിയതായും ജപ്പാന്‍ ഗവേഷക സംഘം കണ്ടെത്തി. സമുദ്രങ്ങളുടെ നിറം ജല രസതന്ത്രവുമായും ജീവന്റെ സ്വാധീനവുമായും ബന്ധപ്പെട്ടിരിക്കുന്നു എന്നാണ് ജാപ്പനീസ് പ്രബന്ധത്തില്‍ പറയുന്നത്. സള്‍ഫറിന്റെ അളവ് ഉയര്‍ന്നതാണെങ്കില്‍ ഭൂമിയില്‍ പര്‍പ്പിള്‍ സമുദ്രങ്ങള്‍ ഉണ്ടാകുമായിരുന്നുവെന്നും ഗവേഷകര്‍ അഭിപ്രായപ്പെടുന്നു. തീവ്രമായ അഗ്‌നിപര്‍വ്വത പ്രവര്‍ത്തനവുമായും അന്തരീക്ഷത്തിലെ കുറഞ്ഞ ഓക്‌സിജന്റെ അളവുമായും ഇത് ബന്ധപ്പെട്ടിരിക്കാം. കരയിലെ പാറകളുടെ ജീര്‍ണ്ണതയില്‍ നിന്ന് ചുവന്ന ഓക്‌സിഡൈസ് ചെയ്ത ഇരുമ്പ് രൂപപ്പെടുകയും നദികളിലൂടെയോ കാറ്റിലൂടെയോ സമുദ്രങ്ങളിലേക്ക് കൊണ്ടുപോകുകയും ചെയ്യുമ്പോള്‍ തീവ്രമായ ഉഷ്ണമേഖലാ കാലാവസ്ഥയില്‍ സമുദ്രങ്ങള്‍ ചുവന്നതായി മാറും. നൈട്രജന്‍ കൂടുതലുള്ളയിടങ്ങളില്‍ ഈ ചുവന്ന ആല്‍ഗകള്‍ സാധാരണമാണ്.

നൂറ്റാണ്ടുകള്‍ കഴിയുമ്പോള്‍ സൂര്യന്‍ കൂടുതല്‍ തിളക്കമുള്ളതായിത്തീരുകയും ഉപരിതല ബാഷ്പീകരണം വര്‍ധിക്കുകയും തീവ്രമായ അള്‍ട്രാവയലറ്റ് പ്രകാശം ഉണ്ടാകുകയും ചെയ്യും. ഇത് ഓക്‌സിജന്‍ ഇല്ലാത്ത ആഴത്തിലുള്ള വെള്ളത്തില്‍ ജീവിക്കുന്ന പര്‍പ്പിള്‍ സള്‍ഫര്‍ ബാക്ടീരിയകളെ സ്വാധീനിച്ചേക്കാം. തീരദേശ അല്ലെങ്കില്‍ സ്ട്രാറ്റിഫൈഡ് പ്രദേശങ്ങളില്‍ ഇത് കൂടുതല്‍ പര്‍പ്പിള്‍, തവിട്ട് അല്ലെങ്കില്‍ പച്ച നിറങ്ങള്‍ക്ക് കാരണമാകും, ഫൈറ്റോപ്ലാങ്ക്ടണ്‍ കുറയുമ്പോള്‍ വെള്ളത്തില്‍ ആഴത്തിലുള്ള നീല നിറം കുറയും. ഭൂമിശാസ്ത്രപരമായ സമയക്രമങ്ങളില്‍ ഒന്നും ശാശ്വതമല്ല, അതിനാല്‍ നമ്മുടെ സമുദ്രങ്ങളുടെ നിറത്തില്‍ മാറ്റങ്ങള്‍ സംഭവിക്കാമെന്നും ഗവേഷകര്‍ പറയുന്നു.