' ഞാന്‍ കാരണമല്ല അവര്‍ ഡിവോഴ്‌സ് ആയത്, എന്റെ പപ്പയും മമ്മയും സെപ്പറേറ്റഡാണ് ആ വേദന അറിയാം' ; സായ് ലക്ഷ്മി

ഭർത്താവ് അരുണുമൊത്തുള്ള നാല് വർ‌ഷത്തെ ദാമ്പത്യം അവസാനിപ്പിച്ചുവെന്നും തങ്ങൾ വേർപിരിഞ്ഞുവെന്നും അടുത്തിടെയാണ് സീരിയൽ താരവും സോഷ്യൽമീഡിയ ഇൻഫ്ലൂവൻസറുമായ പാർവതി വിജയ് വെളിപ്പെടുത്തിയത്. പിന്നാലെ സീരിയൽ താരം സായ് ലക്ഷ്മിയുമായുള്ള അരുണിന്റെ പ്രണയവും ചർച്ചയായിരുന്നു. അരുണ്‍ വിവാഹമോചിതനാവാനുള്ള കാരണം സായ് ലക്ഷ്മിയാണെന്നും അഭ്യൂഹങ്ങൾ വന്നിരുന്നു. എന്നാൽ ഇക്കാര്യത്തിൽ വിശദീകരണവുമായി രംഗത്തെത്തിയിരിക്കുകയാണ് താരം. യൂട്യൂബ് ചാനലിലൂടെയായിരുന്നു സായ് ലക്ഷ്മിയുടെ തുറന്നു പറച്ചിൽ.

പലരും തെറ്റായ കാര്യങ്ങൾ പ്രചരിപ്പിക്കുന്നതു കൊണ്ടാണ് സത്യം തുറന്നു പറയുന്നതെന്ന് സായ് ലക്ഷ്മി വീഡിയോയിൽ പറയുന്നു. ''ലൊക്കേഷനില്‍ വെച്ചാണ് ഞാന്‍ അരുണിനെ ആദ്യം കാണുന്നത്. ആ സമയത്ത് അദ്ദേഹം സെപ്പറേറ്റഡായിരുന്നു. അന്ന് എനിക്ക് പുള്ളി ആരാണെന്നോ, എന്താണെന്നോ, സെപ്പറേറ്റഡാണെന്നോ ഒന്നും അറിയുമായിരുന്നില്ല. അവരുടെ വിവാഹമോചനത്തെക്കുറിച്ച് ഞാന്‍ അറിയുന്നതു തന്നെ മറ്റുള്ളവർ പറഞ്ഞാണ്. ഞങ്ങളെ അറിയാവുന്ന, ഞങ്ങളുടെ കൂടെ നിന്നവര്‍ക്ക് അറിയാം, ഞാന്‍ കാരണമല്ല ആ ഡിവോഴ്‌സ് സംഭവിച്ചത് എന്ന്'', സായ് ലക്ഷ്മി പറഞ്ഞു.

തനിക്ക് മറ്റാരുടെയെങ്കിലും കുടുംബം തകർക്കേണ്ട ആവശ്യമില്ലെന്നും തന്റെ പപ്പയും മമ്മിയും ഡിവോഴ്സ് ആയതിനാൽ തന്നെ ആ വേദന മറ്റാരെക്കാലും തനിക്ക് മനസിലാകുമെന്നും സായ് ലക്ഷ്മി വീഡിയോയിൽ പറയുന്നു. ''ഞാൻ ഒന്നാം ക്ലാസിൽ പഠിക്കുമ്പോളാണ് എന്റെ പപ്പയും മമ്മിയും ഡിവോഴ്സ് ആയത്. ആ സമയത്ത് ഞാനും എന്റെ മമ്മിയും എന്റെ പപ്പയും അനുഭവിച്ച വേദനകൾ എനിക്കറിയാം. അതെല്ലാം മനസിലാക്കി, വേറൊരാളെ അതിലേക്ക് തള്ളിവിടാൻ ഞാൻ ആഗ്രഹിക്കുന്നില്ല'', സായ് ലക്ഷ്മി കൂട്ടിച്ചേർത്തു.

വിവാഹമോചിതനായ ആയ ഒരാളെത്തന്നെ പ്രേമിക്കണോ എന്ന് ചിലർ ചോദിക്കുന്നുണ്ടെന്നും ഡിവോഴ്സ് ആയെന്ന പേരിൽ ജീവിതം അവസാനിക്കുന്നില്ലെന്നും അവർക്ക് വീണ്ടും മറ്റൊരാളെ പ്രേമിക്കാമെന്നും സായ് ലക്ഷ്മി വീഡിയോയിൽ പറയുന്നു. തന്നെ സംബന്ധിച്ച്, അരുൺ ഒരു നല്ല വ്യക്തിയാണെന്നും ആ തീരുമാനത്തിൽ തെറ്റൊന്നും തോന്നുന്നില്ലെന്നും താരം കൂട്ടിച്ചേർത്തു.