ചേച്ചി പോയിട്ട് ഇന്നേക്ക് ഒമ്പത് വര്‍ഷം; വൈകാരിക കുറിപ്പുമായി രാഹുല്‍ രാജ്

photo-www.instagram.com/rahulrajmusic/

ചേച്ചിയുടെ വേർപാടിന്റെ ഓർമ്മയിൽ സംഗീത സംവിധായകൻ രാഹുൽ രാജ്. അമ്മയുടെ സ്ഥാനം ആയിരുന്നു ചേച്ചിക്ക് അമ്മയുടെ സ്ഥാനം ആയിരുന്നുവെന്നും രാഹുൽ കുറിച്ചു . അമ്മയില്ലാത്ത കാലം വന്നാൽ ആ സ്ഥാനത്തു നിന്ന് നമ്മളെ സ്നേഹിക്കുകയും ശാസിക്കുകയും ചെയ്യേണ്ടവൾ, പക്ഷേ അവർ രണ്ടാളും പോയാലോ- അമ്മയേയും ചേച്ചിയെയും നഷ്‌ടമായ ആളാണ് താനെന്നും പോസ്റ്റിലൂടെ രാഹുൽ കുറിച്ചു. അടുത്തിടെയാണ് രാഹുലിന്റെ 'അമ്മ വിടവാങ്ങിയത്. തന്റെ ലോകം ഇരുണ്ടു പോയെന്നും യാഥാർഥ്യത്തോട് പൊരുത്തപ്പെടാൻ ആകുന്നില്ലെന്നുമാണ് അദ്ദേഹം കുറിച്ചത്.

പണ്ട് കുഞ്ഞായിരിക്കുമ്പോൾ ഒരു കപ്പലണ്ടി മിട്ടായി പോലും നിനക്ക് പാതി തരാതെ ഞാൻ കഴിച്ചിട്ടില്ല. മോളക്ക് കൊടുത്തോ എന്ന് ചോദിക്കും.... എന്നെ നിന്റെ കയ്യിലേൽപ്പിച്ചിട്ടു പോയ മമ്മി ഓഫീസീന്നു വരുമ്പോൾ വളവിലെ ബാർബർ അസീസിക്കയെ അനുകരിച്ചു ഡാഡീടെ ഷേവിങ്ങ് സെറ്റ് വെച്ചെന്റെ പുരികം വളരെ ശാസ്ത്രീയമായും ആധികാരികമായും ക്ലീൻ ഷേവ് ചെയ്തതും തദ്‌ഫലമായി അപ്പൊ ഫ്രഷ് ആയി വെട്ടിയെടുത്ത കൊന്നവടി വിത്ത് ഇല വെച്ച് മമ്മി നിന്റെ പുറത്തിനിട്ടു ഡിസൈൻ ഉണ്ടാക്കിയതും ഇന്നും മനസ്സിലുണ്ട്.

നിന്നെ പൂർണമായും വിശ്വസിച്ചു കണ്ണുമടച്ചിരുന്ന എന്നെ പറഞ്ഞാൽ മതിയല്ലോ. മാമംഗലത്തുള്ള മധുസൂദനമേനോൻ മാഷിന്റെ അടുത്തു ശാസ്ത്രീയ സംഗീതം പഠിക്കാൻ ഒരുമിച്ചു ചേർന്ന നമ്മൾ അന്നൊക്കെ ഒരേ പോലെ പാടുമായിരുന്നു. അവിടന്ന് 20 മീറ്റർ മാത്രം ദൂരത്തുള്ള ജോസ് മൃദംഗം തബല വർക്‌സിന്റെ മുന്നിൽ ഞാൻ എന്നും വായ് നോക്കി നിൽക്കുന്നത് കണ്ടു ഡാഡിയോടു അവനു മൃദംഗം ഭയങ്കര ഇഷ്ടമാണ് അവനെ പഠിപ്പിക്കണം എന്ന് ശുപാർശ ചെയ്തതും നീയായിരുന്നു. പിന്നീട് ഞാൻ പാട്ടിൽ കൂടുതൽ ശ്രദ്ധിക്കാൻ തുടങ്ങിയപ്പോൾ നീ മനഃപൂർവം എനിക്ക് വേണ്ടി മാറി നിന്നതാണോ എന്ന് പലപ്പോഴും ഞാൻ മനസ്സിലെങ്കിലും ചിന്തിച്ചിട്ടുണ്ട്.

തൊണ്ടയിൽ സാധനം വരാത്തത് കൊണ്ടാണെന്നു ഞാൻ മനഃപൂർവം കളിയാക്കുമ്പോൾ പണ്ടെങ്ങോ ഡാഡി ബോർ അടിച്ചിരുന്നപ്പോൾ ചെമ്മീൻ തല കൊടുത്തു എറണാകുളം മാർക്കറ്റീന്നു മേടിച്ചതാണ് എന്നെ എന്ന നിന്റെ 'സ്വയം സമാധാനിപ്പിൽ നറേറ്റിവ്' കൌണ്ടർ ആയടിച്ചോണ്ട് നീ തൃപ്തിയടയുമായിരുന്നു.പാട്ടു മത്സരങ്ങളിലൊക്കെ സമ്മാനം മേടിക്കുമ്പോൾ എനിക്ക് വേണ്ടി ഒച്ചയുണ്ടാക്കാനും കയ്യടിക്കാനും നീ മുൻനിരയിൽ ഉണ്ടായിരുന്നു.അതിനൊക്കെ ശേഷം കോളേജ് കാലത്തു ലോകത്തേറ്റവും പാര നീയാണെന്നു ഞാൻ ഉറച്ചു വിശ്വസിച്ചിരുന്നു.

പെൺകുട്ട്യോളുമായി ബന്ധപ്പെട്ട എന്ത് വിഷയം വന്നാലും അതെത്ര നൈസ് ആയിട്ട് സോൾവ് ചെയ്താലും അത് മമ്മീനെയും ഡാഡീനെയും അറിയിച്ചു എനിക്ക് പണി തരാൻ നീ കാണിച്ചിരുന്ന ആ ഒരു സിൻസിയർ ശുഷ്‌കാന്തി കാരണം നീയാണെന്റെ ഏറ്റവും വല്യ ശത്രു എന്ന് ഞാൻ അക്കാലത്തു ഉറച്ചു വിശ്വസിച്ചിരുന്നു.അക്കാലത്തുള്ള പല കഥകളുമുണ്ട്. മറ്റൊരവസരത്തിലാവാം

ആ പ്രായത്തിലുള്ള ശത്രുതയും പാരവെപ്പിനുമൊക്കെ ശേഷം നമ്മൾ ഏറ്റവും ബെസ്റ് ഫ്രണ്ട്‌സ് ആയി.മനസ്സൊന്നു എവിടെയേലും പതറിയാൽ നീയറിയുന്ന പോലെ ആർക്കും എന്നെ അറിയാൻ പറ്റില്ലായിരുന്നു.ഞാൻ പോലുമറിയാതെ എനിക്ക് വേണ്ടി നീ ചെയ്തിരുന്ന കാര്യങ്ങൾ. കൂടുതൽ ഇപ്പോൾ പറയുന്നില്ല.അതിനു ശേഷം നിനക്ക് വയ്യാണ്ടായപ്പോ ഞാൻ വിചാരിച്ചാൽ നിനക്ക് രക്ഷപെടാൻ പറ്റുമെന്ന് നീ ഉറച്ചു വിശ്വസിച്ചിരുന്നു. അല്ലെങ്കിൽ ഞാൻ നിന്നോട് സംസാരിക്കുന്ന പെപ് ടോക്സ് നിന്നെ അങ്ങനെ തോന്നിപ്പിച്ചിരുന്നു. ഒരു വെറും മനുഷ്യനായ എനിക്കതിനു സാധിച്ചില്ലല്ലോ എന്ന സങ്കടം ഈ ജന്മം മുഴുവനുമുണ്ടാവും

മൂത്ത സഹോദരി എന്ന് പറഞ്ഞാൽ ' രണ്ടാമത്തെ അമ്മ 'എന്നാണു വിശേഷിപ്പിക്കാറുള്ളത്.അമ്മയില്ലാത്ത കാലം വന്നാൽ ആ സ്ഥാനത്തു നിന്ന് നമ്മളെ സ്നേഹിക്കുകയും ശാസിക്കുകയും ചെയ്യേണ്ടവൾ....!പക്ഷേ അവർ രണ്ടാളും പോയാലോ.........?
ചേച്ചി പോയിട്ട് ഇന്നേക്ക് ഒമ്പത് വർഷം .

മൂത്ത സഹോദരി രണ്ടാമത്തെ അമ്മയെപ്പോലെയാണ്, എപ്പോഴും വഴികാട്ടാനും സംരക്ഷിക്കാനും കൂടെയുണ്ട്. ഒരു സഹോദരി ഉണ്ടാകുക എന്നതിനർത്ഥം ജീവിതത്തിലെ ഉയർച്ച താഴ്ചകളിൽ നിങ്ങൾക്ക് എപ്പോഴും ഒരു പിന്തുണയുണ്ടാകുമെന്നാണ്. സഹോദരിമാർ ഒരേ പൂന്തോട്ടത്തിലെ വ്യത്യസ്ത പൂക്കളാണ്. മൂത്ത സഹോദരി ഹൃദയം കൊണ്ട് കേൾക്കുന്ന ഒരു സുഹൃത്താണ്.ജീവിതവും അതിന്റെ നിമിഷങ്ങളും പ്രകൃതിയിൽ ക്ഷണികമാണ്...ജീവിച്ചിരിക്കുമ്പോൾ അവരെ ആവോളം സ്നേഹിക്കുക. രാഹുല്‍ കുറിച്ചു.