പുത്തന്‍ മോഡലിനെ വിപണിയില്‍ അവതരിപ്പിച്ച് മെര്‍സിഡീസ് ബെന്‍സ്

ആഡംബര വാഹനങ്ങളുടെ ഇടയില്‍ തല ഉയര്‍ത്തി തന്നെ നില്‍ക്കുന്ന ബ്രാന്‍ഡാണ് മെര്‍സിഡീസ് ബെന്‍സ്. ഇപ്പോള്‍ ബ്രാന്‍ഡ് തങ്ങളുടെ മെര്‍സിഡീസ് ബെന്‍സ് 2025 CLA പുറത്തിറക്കിയിരിക്കുകയാണ്. വിപണിയിലുളള മോഡലിനെക്കാള്‍ സ്‌പേസ്, കൂടുതല്‍ ടെക്‌നോളജി എന്നിവ എല്ലാം ലഭ്യമാക്കിയിട്ടുണ്ട്. പ്രധാനമായും പുത്തന്‍ എന്‍ട്രി-ലെവല്‍ കൂപ്പെ സെഡാന്‍ ഇലക്ട്രിക്, ഹൈബ്രിഡ് വേരിയന്റുകളിലാണ് കമ്പനി വാഗ്ദാനം ചെയ്യുന്നത്. EQ സാങ്കേതികവിദ്യയുള്ള CLA 250+ നൊപ്പം CLA 350 4MATIC മോഡലും ആണ് വിപണികളില്‍ ആദ്യം എത്തുന്നത്.

CLA 250+ 10 മിനിറ്റ് ചാര്‍ജ് ചെയ്താല്‍ 325 കിലോമീറ്റര്‍ വരെ ഓടാന്‍ സാധിക്കുമെന്നാണ് കമ്പനിയുടെ അവകാശവാദം. പിന്‍ ആക്സിലിലെ മെയിന്‍ ഡ്രൈവില്‍ രണ്ട് സ്പീഡ് ഗിയര്‍ബോക്സും CLA-യുടെ പ്രധാന സവിശേഷതയാണ്. എഞ്ചിന്‍ വശങ്ങളിലേക്ക് വന്നാല്‍ ഹൈബ്രിഡ് പതിപ്പിന് കരുത്ത് പകരാന്‍ കമ്പനി നല്‍കിയിരിക്കുന്നത് ഒരു പുതിയ 1.5 ലിറ്റര്‍, നാല് സിലിണ്ടര്‍ പെട്രോള്‍ എഞ്ചിനാണ്, ഇത് എട്ട് സ്പീഡ്, ഡ്യുവല്‍-ക്ലച്ച് ട്രാന്‍സ്മിഷനുമായി സംയോജിത ഇലക്ട്രിക് മോട്ടോറുമായി ബന്ധിപ്പിച്ചിട്ടുണ്ട്. 1.3kWh വരെ ശേഷിയുള്ള 48-വോള്‍ട്ട് ലിഥിയം-അയണ്‍ ബാറ്ററിയും ലഭിക്കുന്നു. പുതിയ CLA -യ്ക്ക് മുമ്പത്തേക്കാള്‍ നീളവും വീതിയും ഉയരവും കമ്പനി ലഭ്യമാക്കിയിട്ടുണ്ട്.