കരളിന്റെ ആരോഗ്യം മെച്ചപ്പെടുത്തും ശരീരത്തിലെ വിഷാംശങ്ങള്‍ നീക്കം ചെയ്യും ; ഈ ഭക്ഷണങ്ങളെ കുറിച്ച് അറിയാം

ഇന്നത്തെ മാറിയ ജീവിതശൈലിയും തെറ്റായ ഭക്ഷണക്രമവും കാരണം പലരിലും കരള്‍ സംബന്ധമായ അസുഖങ്ങള്‍ വര്‍ദ്ധിച്ചുവരികയാണ്. അതിനാല്‍, കരളിനെ സംരക്ഷിക്കുക എന്നത് വെറുമൊരു മുന്‍കരുതലല്ല, മറിച്ച് ആരോഗ്യകരമായ ജീവിതത്തിന് അത്യന്താപേക്ഷിതവുമാണ്. കരളിന്റെ ആരോഗ്യം മെച്ചപ്പെടുത്തുന്നതിനും ശരീരത്തിലെ വിഷാംശങ്ങള്‍ നീക്കം ചെയ്യുന്നതിനും സഹായിക്കുന്ന ഭക്ഷണങ്ങളെക്കുറിച്ച് അറിയാം....

* ക്രാന്‍ബെറി (Cranberry) - ഇതിലടങ്ങിയിരിക്കുന്ന പോളിഫെനോളുകള്‍ വയറ്റിലെ നല്ല ബാക്ടീരിയകളുടെ വളര്‍ച്ചയ്ക്ക് സഹായിക്കുന്നു. വയറിന്റെ ആരോഗ്യം കരളിന്റെ ആരോഗ്യവുമായി നേരിട്ട് ബന്ധപ്പെട്ടിരിക്കുന്നു.

* തണ്ണിമത്തനും ചെറുനാരങ്ങയും - തണ്ണിമത്തനിലെ 'സിട്രുലൈന്‍' (Citrulline), നാരങ്ങയിലെ വിറ്റാമിന്‍ സി എന്നിവ ചേരുമ്പോള്‍ കരളിലേക്കുള്ള രക്തയോട്ടം വര്‍ദ്ധിപ്പിക്കാന്‍ സഹായിക്കുന്നു.

* മാതളനാരങ്ങ (Pomegranate) - മാതളനാരങ്ങയിലെ പോളിഫെനോളുകള്‍ കരളിലെ വീക്കം (Inflammation) കുറയ്ക്കാന്‍ സഹായിക്കുമെന്ന് പഠനങ്ങള്‍ സൂചിപ്പിക്കുന്നു.

* റാസ്‌ബെറി (Raspberry) - ഇതിലെ നാരുകളും (Fiber) ആന്തോസയാനിനുകളും രക്തത്തിലെ പഞ്ചസാരയുടെ അളവ് നിയന്ത്രിക്കാനും ഭക്ഷണത്തിന് ശേഷം കൊഴുപ്പ് സംസ്‌കരിക്കാനും ശരീരത്തെ സഹായിക്കുന്നു.

* ആപ്പിളും കറുവപ്പട്ടയും (Apple & Cinnamon) - ആപ്പിളിലെ പെക്റ്റിന്‍ എന്ന ലയിക്കുന്ന നാരുകളും കറുവപ്പട്ടയിലെ ഔഷധഗുണങ്ങളും ഇന്‍സുലിന്‍ പ്രതിരോധം കുറയ്ക്കാനും കൊഴുപ്പിന്റെ അളവ് നിയന്ത്രിക്കാനും സഹായിക്കുന്നു.

* ബീറ്റ്റൂട്ട് (Beetroot) - ബീറ്റ്റൂട്ടിലെ 'ബീറ്റെയ്ന്‍' (Betaine) എന്ന ഘടകം കരള്‍ കോശങ്ങളില്‍ അടിഞ്ഞുകൂടിയ കൊഴുപ്പിനെ നീക്കം ചെയ്യാന്‍ സഹായിക്കുന്നു.

* സ്‌ട്രോബെറിയും ഡാര്‍ക്ക് ചോക്ലേറ്റും - രക്തക്കുഴലുകളുടെ പ്രവര്‍ത്തനം മെച്ചപ്പെടുത്താന്‍ ഈ കൂട്ടുകെട്ട് സഹായിക്കും. 70 ശതമാനത്തിലധികം കൊക്കോ അടങ്ങിയ ഡാര്‍ക്ക് ചോക്ലേറ്റ് ഉപയോഗിക്കാനാണ് ഡോക്ടര്‍ ശുപാര്‍ശ ചെയ്യുന്നത്.