റമദാന്‍ വ്രതം പോഷക സമ്പന്നമാക്കാം; വിശപ്പകറ്റാനും ഊര്‍ജ്ജസ്വലത നിലനിര്‍ത്താനും സഹായിക്കുന്ന ഭക്ഷണങ്ങള്‍

റമദാനിലെ വ്രതം ആത്മീയമായി വളരെ അര്‍ത്ഥവത്തായ ഒന്നാണ്, എന്നാല്‍ അതിന് ശരിയായ ശാരീരിക പോഷണം ആവശ്യമാണ്. അത്താഴത്തിനും (സുഹൂര്‍) നോമ്പ് തുറയ്ക്കും (ഇഫ്താര്‍) ഇടയിലുള്ള ദീര്‍ഘനേരത്തെ ഇടവേളയില്‍ ഉന്മേഷത്തോടെയിരിക്കാന്‍ സാവധാനം ദഹിക്കുന്നതും രക്തത്തിലെ പഞ്ചസാരയുടെ അളവ് നിലനിര്‍ത്തുന്നതുമായ ഭക്ഷണങ്ങള്‍ തിരഞ്ഞെടുക്കേണ്ടത് അത്യാവശ്യമാണ്. നോമ്പ് എന്നത് ശരീരത്തെ പോഷിപ്പിക്കാനുള്ള വഴി കൂടിയാണ്. ഫൈബര്‍, പ്രോട്ടീന്‍, ആരോഗ്യകരമായ കൊഴുപ്പ് എന്നിവ അടങ്ങിയ ഭക്ഷണങ്ങള്‍ തിരഞ്ഞെടുക്കുന്നത് വ്രതത്തിന്റെ ആത്മീയത കാത്തുസൂക്ഷിക്കുന്നതിനൊപ്പം തന്നെ ശാരീരിക ആരോഗ്യം നിലനിര്‍ത്താനും സഹായിക്കും. റമദാനിലുടനീളം കൂടുതല്‍ കരുത്തോടും ഉന്മേഷത്തോടും കൂടി ഇരിക്കാന്‍ സഹായിക്കുന്ന ചില ഭക്ഷണങ്ങള്‍ താഴെ പറയുന്നവയാണ്:

ഓട്സ് - സാവധാനം ഊര്‍ജ്ജം നല്‍കുന്ന പ്രഭാതഭക്ഷണം. ഇതിലടങ്ങിയിരിക്കുന്ന സോളുബിള്‍ ഫൈബര്‍ (ബീറ്റാ ഗ്ലൂക്കന്‍) ദഹനത്തെ നിയന്ത്രിക്കുകയും മണിക്കൂറുകളോളം വയര്‍ നിറഞ്ഞ സംതൃപ്തി നല്‍കുകയും ചെയ്യുന്നു. പാലില്‍ കുറുക്കിയോ, അണ്ടിപ്പരിപ്പും ഈന്തപ്പഴവും ചേര്‍ത്തോ, അല്ലെങ്കില്‍ തൈരും പഴങ്ങളും ചേര്‍ത്ത 'ഓവര്‍നൈറ്റ് ഓട്സ്' ആയോ ഇത് കഴിക്കാം.

മുട്ട - പ്രോട്ടീന്റെ കലവറ. ഉയര്‍ന്ന ഗുണമേന്മയുള്ള പ്രോട്ടീന്‍ അടങ്ങിയ മുട്ട വിശപ്പ് കുറയ്ക്കാന്‍ സഹായിക്കുന്നു. അത്താഴത്തിന് മുട്ട കഴിക്കുന്നത് രക്തത്തിലെ പഞ്ചസാരയുടെ അളവ് സ്ഥിരപ്പെടുത്തും. പുഴുങ്ങിയ മുട്ടയോ സ്‌ക്രാംബിള്‍ഡ് എഗ്ഗോ ഹോള്‍-ഗ്രെയിന്‍ ടോസ്റ്റിനൊപ്പം കഴിക്കുന്നത് വളരെ നല്ലതാണ്.

ഈന്തപ്പഴം - പ്രകൃതിദത്തമായ ഉന്മേഷം. ഈന്തപ്പഴം കഴിച്ച് നോമ്പ് തുറക്കുന്നതിന് പിന്നില്‍ കൃത്യമായ കാരണമുണ്ട്. ഇതിലെ സ്വാഭാവിക മധുരം, ഫൈബര്‍, പൊട്ടാസ്യം, മഗ്‌നീഷ്യം തുടങ്ങിയ ധാതുക്കള്‍ ദീര്‍ഘനേരത്തെ നോമ്പിന് ശേഷം ശരീരത്തിന് പെട്ടെന്ന് ഊര്‍ജ്ജം നല്‍കുന്നു. തൈരോ അണ്ടിപ്പരിപ്പോ ഇതിനോടൊപ്പം കഴിക്കുന്നത് പഞ്ചസാരയുടെ അളവ് പെട്ടെന്ന് കൂടുന്നത് തടയാന്‍ സഹായിക്കും.

ഗ്രീക്ക് യോഗര്‍ട്ട് - ദഹനത്തിന് മികച്ചത്. സാധാരണ തൈരിനേക്കാള്‍ പ്രോട്ടീന്‍ കൂടുതലായതിനാല്‍ ഗ്രീക്ക് യോഗര്‍ട്ട് കൂടുതല്‍ സമയം വിശപ്പറിയാതെ ഇരിക്കാന്‍ സഹായിക്കുന്നു. അത്താഴ സമയത്ത് തേന്‍, അണ്ടിപ്പരിപ്പ്, പഴങ്ങള്‍ എന്നിവ ചേര്‍ത്ത് ഇത് കഴിക്കാവുന്നതാണ്.

അണ്ടിപ്പരിപ്പുകളും വിത്തുകളും - ലഘുവായതും എന്നാല്‍ ശക്തവും. ബദാം, വാള്‍നട്ട്, ചിയ വിത്തുകള്‍, ഫ്‌ളാക്‌സ് സീഡുകള്‍ എന്നിവയില്‍ ആരോഗ്യകരമായ കൊഴുപ്പും പ്രോട്ടീനും ഫൈബറും ധാരാളമുണ്ട്. ഇവ തൈരിലോ ഓട്സിലോ ചേര്‍ത്ത് കഴിക്കുന്നത് ദിവസം മുഴുവന്‍ ഉന്മേഷം നിലനിര്‍ത്താന്‍ സഹായിക്കും.

ധാന്യങ്ങള്‍ - കൃത്യമായ ഊര്‍ജ്ജ പ്രവാഹം. തവിടുള്ള അരി (Brown rice), ക്വിനോവ (Quinoa), ഹോള്‍ വീറ്റ് ബ്രെഡ് തുടങ്ങിയവ സാവധാനം മാത്രമേ ദഹിക്കുകയുള്ളൂ. ഇത് പെട്ടെന്നുള്ള വിശപ്പിനെ തടയുന്നു.