ഇന്ത്യന് മഹാസമുദ്രത്തിലെ അമേരിക്കന് ധാര്ഷ്ട്യം
ഇന്ത്യന് മഹാസമുദ്രത്തിന്റെ ശാന്തതയില് ടോര്പിഡോകള് തീര്ത്ത സ്ഫോടനം കേവലം ഒരു ഇറാനിയന് കപ്പലിനെ മാത്രമല്ല തകര്ത്തത്, മറിച്ച് രാജ്യാന്തര സമുദ്ര നിയമങ്ങളെയും നയതന്ത്ര മര്യാദകളെയുമാണ്. വിശാഖപട്ടണത്ത് നടന്ന 'മിലന് 2026' നാവികാഭ്യാസത്തില് പങ്കെടുത്തു മടങ്ങുകയായിരുന്ന ഇറാനിയന് യുദ്ധക്കപ്പലായ ഐ.ആര്.ഐ.എസ്. ദേനയെ ശ്രീലങ്കന് തീരത്ത് വച്ച് അമേരിക്കന് അന്തര്വാഹിനി ആക്രമിച്ചു മുക്കിയത് ആധുനിക ലോകം കണ്ട ഏറ്റവും വലിയ നയതന്ത്ര കുറ്റകൃത്യങ്ങളില് ഒന്നായി രേഖപ്പെടുത്തപ്പെടും.
ഇന്ത്യയുടെ അതിഥിയായി എത്തിയ ഒരു കപ്പലിനെയാണ് അതിന്റെ മടക്കയാത്രയില് അമേരിക്ക ലക്ഷ്യം വച്ചത് എന്നത് സംഭവത്തിന്റെ ഗൗരവം വര്ദ്ധിപ്പിക്കുന്നു. അന്പതോളം രാജ്യങ്ങള് പങ്കെടുത്ത മിലന് ഫ്ലീറ്റ് റിവ്യൂവില് അമേരിക്കയും ഇറാനും ഒരേപോലെ പങ്കാളികളായിരുന്നു. ഒരേ വേദിയില് സൗഹൃദം പങ്കിട്ട ശേഷം, സമാധാനപരമായ ഒരു ദൗത്യം കഴിഞ്ഞ് മടങ്ങുന്ന കപ്പലിനെ പിന്നില് നിന്ന് ആക്രമിക്കുന്നത് വഞ്ചനയാണ്. ഇന്ത്യയുടെ തൊട്ടടുത്ത കടല്ത്തീരത്ത് വച്ച് നടന്ന ഈ ആക്രമണം ഈ മേഖലയിലെ സുരക്ഷാ ക്രമീകരണങ്ങളെ വെല്ലുവിളിക്കുന്നതിനോടൊപ്പം ഇന്ത്യയുടെ പ്രാദേശിക സ്വാധീനത്തെക്കൂടി ചോദ്യം ചെയ്യുന്ന ഒന്നാണ്.
ഭാവിയില് ഉണ്ടായേക്കാവുന്ന ആക്രമണം തടയാന് മുന്കൂട്ടി ആക്രമിച്ചു എന്ന 'പ്രീ-എംപ്റ്റീവ് സെല്ഫ് ഡിഫന്സ്' വാദമാണ് അമേരിക്ക ഉയര്ത്തുന്നത്. ഇവിടെയാണ് ഇരട്ടത്താപ്പ് വെളിവാകുന്നത്. സമാനമായ ഒരു സാഹചര്യത്തില്, അമേരിക്കയുടെ ഒരു കപ്പല് ഇത്തരമൊരു 'പ്രീ-എംപ്റ്റീവ്' വാദമുയര്ത്തി മറ്റൊരു രാജ്യം ആക്രമിച്ചാല് വാഷിങ്ടണ് എങ്ങനെ പ്രതികരിക്കും? അത് ലോകമഹായുദ്ധത്തിന് കാരണമാകില്ലേ? ലോകപോലീസുകാരന് എന്ന ഭാവത്തില് സ്വന്തം നിയമങ്ങള് മാത്രം നടപ്പിലാക്കുന്ന അമേരിക്കയുടെ ഈ രീതി രാജ്യാന്തര നീതിന്യായ വ്യവസ്ഥയോടുള്ള വെല്ലുവിളിയാണ്.
ഈ വിഷയത്തില് ഇന്ത്യ തുടരുന്ന മൗനം ഗുണകരമല്ല. സ്വന്തം മണ്ണില് വിരുന്നുകാരനായി എത്തിയ ഒരു കപ്പല് ആക്രമിക്കപ്പെടുമ്പോള്, ആതിഥേയ രാജ്യമെന്ന നിലയില് ഇന്ത്യക്ക് ഇതില് ധാര്മിക ഉത്തരവാദിത്തമുണ്ട്. മിതത്വവും നയതന്ത്രവും ഇന്ത്യയുടെ മുഖമുദ്രയാണെങ്കിലും, രാജ്യാന്തര നിയമങ്ങളുടെ ലംഘനം നടക്കുമ്പോള് ശബ്ദമുയര്ത്താതിരിക്കുന്നത് തെറ്റായ സന്ദേശം നല്കും. മേഖലയിലെ സമാധാനം ആഗ്രഹിക്കുന്ന ഒരു ശക്തി എന്ന നിലയില്, ഇത്തരം ഏകപക്ഷീയമായ സൈനിക നടപടികളെ അപലപിക്കാന് ഇന്ത്യ തയാറാകണം.
യുദ്ധപ്രഖ്യാപനം പോലുമില്ലാത്ത ഒരു സാഹചര്യത്തില്, കോംബാറ്റില് അല്ലാതിരുന്ന ഒരു കപ്പലിനെ ടോര്പിഡോ ഉപയോഗിച്ച് തകര്ക്കുന്നത് വ്യക്തമായ യുദ്ധക്കുറ്റമാണ്. നൂറിനടുത്ത് നാവികരുടെ ജീവന് അപഹരിച്ച ഈ നടപടിക്ക് രാജ്യാന്തര സമൂഹം അമേരിക്കയെ പ്രതിക്കൂട്ടില് നിര്ത്തണം. യു.എന്. ചാര്ട്ടറും കടല് നിയമങ്ങളും വന്ശക്തികള്ക്ക് ലംഘിക്കാനുള്ളതല്ല, മറിച്ച് പാലിക്കാനുള്ളതാണെന്ന് ഉറപ്പുവരുത്തേണ്ട സമയം അതിക്രമിച്ചിരിക്കുന്നു. ഇന്ത്യന് മഹാസമുദ്രം വന്ശക്തികളുടെ പരീക്ഷണശാലയാകരുത്. അമേരിക്കയുടെ ഈ നടപടി മേഖലയില് വലിയ തോതിലുള്ള അസ്ഥിരതയ്ക്കും തിരിച്ചടികള്ക്കും വഴിവയ്ക്കും. നീതിയുടെയും നിയമത്തിന്റെയും പക്ഷത്തുനിന്നുകൊണ്ട് ഈ കടല്ക്കൊള്ളയെ അപലപിക്കാന് ലോകരാജ്യങ്ങള് ഒന്നിക്കണം. അല്ലാത്തപക്ഷം, സമുദ്രനീതി എന്നത് വന്ശക്തികളുടെ ഇഷ്ടാനിഷ്ടങ്ങള്ക്കനുസരിച്ച് മാറ്റിയെഴുതപ്പെടുന്ന വെറും കടലാസ് പുലിയായി മാറും.
