നൂതനാശയത്തിനും ഇന്ത്യയുടെ വളര്‍ച്ചയ്‌ക്കും ഇന്ധനമേകുന്ന സ്‌റ്റാര്‍ട്ടപ്പുകള്‍

സ്‌റ്റാര്‍ട്ടപ്പ്‌ ഇന്ത്യ സംരംഭം രാജ്യമെമ്പാടും സമഗ്രവും നൂതനവുമായ ഒരു ആവാസവ്യവസ്‌ഥയായി പരിണമിച്ചിരിക്കുന്നു. തൊഴിലവസരങ്ങള്‍ സൃഷ്‌ടിക്കുന്നതിനും സാമ്പത്തിക വളര്‍ച്ച ത്വരിതപ്പെടുത്തുന്നതിനും യുവ സംരംഭകത്വ ഊര്‍ജത്തെ നയിച്ച്‌ 2047ആകുമ്പോള്‍ വികസിത ഭാരതമെന്ന ദൗത്യം കൈവരിക്കുന്നതിന്‌ ഇത്‌ വഴിയൊരുക്കുന്നു.
2016 ജനുവരി 16-ന്‌ വ്യവസായ, ആഭ്യന്തര വ്യാപാര പ്രോത്സാഹന വകുപ്പ്‌ ആരംഭിച്ചതിനുശേഷം സ്‌റ്റാര്‍ട്ടപ്പ്‌ ഇന്ത്യ വളരെ ദൂരം പിന്നിട്ടിരിക്കുന്നു. സമ്പദ്‌വ്യവസ്‌ഥയിലെ ഏറ്റവും നിര്‍ണായകമായ ചില മേഖലകളെ സ്‌റ്റാര്‍ട്ടപ്പുകള്‍ ഊര്‍ജസ്വലമാക്കുന്നു. ഐടി സേവനങ്ങള്‍, ആരോഗ്യ സംരക്ഷണം, ലൈഫ്‌ സയന്‍സസ്‌, വിദ്യാഭ്യാസം, കൃഷി, നിര്‍മാണം എന്നിവയാണ്‌ സ്‌റ്റാര്‍ട്ടപ്പുകള്‍ ഏറ്റവും കൂടുതല്‍ കേന്ദ്രീകരിക്കുന്നത്‌.
കാലാവസ്‌ഥാ സാങ്കേതികവിദ്യ, അടിസ്‌ഥാന സൗകര്യങ്ങള്‍ എന്നിവയുള്‍പ്പെടെ 50-ലധികം മറ്റ്‌ വ്യവസായങ്ങളില്‍ പുതിയ സംരംഭങ്ങള്‍ ഉയര്‍ന്നുവന്നിട്ടുണ്ട്‌. ഈ വ്യാപ്‌തി വൈവിധ്യമാര്‍ന്ന വിഭാഗങ്ങളിലുടനീളം, പ്രത്യേകിച്ച്‌ ദേശീയ വികസന മുന്‍ഗണനകളില്‍ നിര്‍ണായകമായ മേഖലകളില്‍, നവീകരണത്തെയും കരുത്തിനെയും പ്രതിഫലിപ്പിക്കുന്നു.
കഴിഞ്ഞ ദശകത്തിലുണ്ടായ നിര്‍ണായകമായ മാറ്റമാണ്‌ നൂതനാശയത്തിലും സാങ്കേതികവിദ്യയിലും ശ്രദ്ധ കേന്ദ്രീകരിക്കപ്പെട്ടുവെന്നത്‌. ആഗോള നൂതനാശയ സൂചികയില്‍ ഇന്ത്യയുടെ റാങ്ക്‌ 2015-ല്‍ 81-ാം സ്‌ഥാനത്തായിരുന്നത്‌ കഴിഞ്ഞ വര്‍ഷം 38-ാം സ്‌ഥാനമായി. ഡീപ്‌ ടെക്‌ സംരംഭങ്ങള്‍ക്കുള്ള ഗവണ്‍മെന്റിന്റെ പിന്തുണയും ഇത്‌ കൂടുതല്‍ മെച്ചപ്പെടുത്തും. പ്രധാനമന്ത്രിയുടെ ഡിജിറ്റല്‍ ഇന്ത്യ സംരംഭത്തെ അടിസ്‌ഥാനമാക്കി എ ഐ സ്‌റ്റാര്‍ട്ടപ്പുകളുടെ എണ്ണം അതിവേഗം വര്‍ധിച്ചുകൊണ്ടിരിക്കുകയാണ്‌.
ഇന്ത്യന്‍ സ്‌റ്റാര്‍ട്ടപ്പുകള്‍ 16,400-ലധികം പുതിയ പേറ്റന്റ്‌ അപേക്ഷകള്‍ ഫയല്‍ ചെയ്‌തിട്ടുണ്ട്‌, ഇത്‌ യഥാര്‍ത്ഥ നവീകരണത്തില്‍ ശക്‌തമായ ശ്രദ്ധ കേന്ദ്രീകരിക്കുന്നു. കൂടാതെ, ദീര്‍ഘകാല മൂല്യ സൃഷ്‌ടി, ആഗോള മത്സരക്ഷമത എന്നിവ പ്രതിഫലിപ്പിക്കുന്നു.
2016-ല്‍ നാല്‌ സംസ്‌ഥാനങ്ങളില്‍ മാത്രമാണ്‌ സ്‌റ്റാര്‍ട്ടപ്പ്‌ നയങ്ങളുണ്ടായിരുന്നതെങ്കില്‍, ഇന്ന്‌ ഇന്ത്യയില്‍ 30-ലധികം സംസ്‌ഥാനങ്ങളും കേന്ദ്രഭരണ പ്രദേശങ്ങളും സമര്‍പിത സ്‌റ്റാര്‍ട്ടപ്പ്‌ ചട്ടക്കൂടുകളുള്ളവയാണ്‌. ഇതുവരെ രണ്ടു ലക്ഷത്തിലധികം സ്‌റ്റാര്‍ട്ടപ്പുകള്‍ക്ക്‌ അംഗീകാരം ലഭിച്ചു, 2025-ല്‍ മാത്രം, 49,400-ലധികം സ്‌റ്റാര്‍ട്ടപ്പുകള്‍ അംഗീകരിക്കപ്പെട്ടു.
സ്‌ത്രീകള്‍ നയിക്കുന്ന സംരംഭകത്വം ഒരു പ്രധാന ശക്‌തിയായി ഉയര്‍ന്നുവന്നിട്ടുണ്ട്‌, അംഗീകൃത സ്‌റ്റാര്‍ട്ടപ്പുകളില്‍ 45 ശതമാനത്തിലധികത്തിലും കുറഞ്ഞത്‌ ഒരു വനിതാ ഡയറക്‌ടറെങ്കിലും ഉണ്ട്‌. കൂടാതെ, പകുതിയോളം സ്‌റ്റാര്‍ട്ടപ്പുകള്‍ മെട്രോ ഇതര നഗരങ്ങളിലാണ്‌ അധിഷ്‌ഠിതമായിരിക്കുന്നത്‌.
ഇന്ത്യന്‍ സ്‌റ്റാര്‍ട്ടപ്പുകള്‍ വളരുന്നതിനനുസരിച്ച്‌, ലോകം അവരുടെ വിപണിയായി മാറുന്നു. ഇരുപത്തിയൊന്ന്‌ രാജ്യാന്തര കണ്ണികളും രണ്ട്‌ തന്ത്രപരമായ സഖ്യങ്ങളും ഇപ്പോള്‍ യു.കെ, ജപ്പാന്‍, ദക്ഷിണ കൊറിയ, സ്വീഡന്‍, ഇസ്രയേല്‍ എന്നിവയുള്‍പ്പെടെ പ്രധാന സമ്പദ്‌വ്യവസ്‌ഥകളിലുടനീളം വിപണി പ്രവേശനം, സഹകരണം, വ്യാപനം എന്നിവ സുഗമമാക്കുന്നു. 850-ലധികം സ്‌റ്റാര്‍ട്ടപ്പുകള്‍ ഇതിനകം ഈ സംരംഭങ്ങളില്‍നിന്ന്‌ പ്രയോജനം നേടിയിട്ടുണ്ട്‌. സ്വീഡന്‍, സ്വിറ്റ്‌സര്‍ലന്‍ഡ്‌, ന്യൂസിലാന്‍ഡ്‌, ഇസ്രയേല്‍ എന്നിവിടങ്ങളിലേക്കുള്ള എന്റെ സമീപകാല സന്ദര്‍ശനങ്ങളില്‍, സ്‌റ്റാര്‍ട്ടപ്പുകള്‍ ഇന്ത്യയുടെ ബിസിനസ്‌ പ്രതിനിധികളുടെ അവിഭാജ്യ ഘടകമായിരുന്നു.
യോഗ്യതയുള്ള സ്‌റ്റാര്‍ട്ടപ്പുകള്‍ക്ക്‌ അവരുടെ ആദ്യ ദശകത്തിനുള്ളില്‍ തുടര്‍ച്ചയായി മൂന്ന്‌ വര്‍ഷത്തേക്ക്‌ നികുതി ഇളവ്‌ ലഭിക്കും. 4,100-ലധികം സ്‌റ്റാര്‍ട്ടപ്പുകള്‍ക്ക്‌ ഇതിനകം യോഗ്യതാ സര്‍ട്ടിഫിക്കറ്റുകള്‍ ലഭിച്ചു. അറുപതിലധികം റെഗുലേറ്ററി പരിഷ്‌കാരങ്ങള്‍ നികുതി പാലന ബാധ്യതകള്‍ കുറയ്‌ക്കുകയും മൂലധന സമാഹരണം സുഗമമാക്കുകയും ആഭ്യന്തര സ്‌ഥാപന നിക്ഷേപം ശക്‌തിപ്പെടുത്തുകയും ചെയ്‌തിട്ടുണ്ട്‌. ഏഞ്ചല്‍ ടാക്‌സ്‌ നിര്‍ത്തലാക്കലും ദീര്‍ഘകാല മൂലധന പൂളുകള്‍ ആള്‍ട്ടര്‍നേറ്റീവ്‌ ഇന്‍വെസ്‌റ്റ്‌മെന്റ്‌ ഫണ്ടുകളിലേക്ക്‌ തുറന്നുകൊടുത്തതും സ്‌റ്റാര്‍ട്ടപ്പ്‌ ഫണ്ടിങ്‌ ആവാസവ്യവസ്‌ഥയെ കൂടുതല്‍ ശക്‌തിപ്പെടുത്തി.
വിപണികളിലേക്കുള്ള പ്രവേശനത്തിന്‌ മുന്‍ഗണന നല്‍കിയിട്ടുണ്ട്‌. ഗവണ്‍മെന്റ്‌ ഇ-മാര്‍ക്കറ്റ്‌പ്ലേസ്‌ വഴി, 35,700-ലധികം സ്‌റ്റാര്‍ട്ടപ്പുകളെ ഉള്‍പ്പെടുത്തി, 51,200 കോടി രൂപയിലധികം മൂല്യമുള്ള അഞ്ച്‌ ലക്ഷത്തിലധികം ഓര്‍ഡറുകള്‍ നേടി.
ഇന്ത്യന്‍ സ്‌റ്റാര്‍ട്ടപ്പുകള്‍ രാജ്യത്ത്‌ ഒരു പ്രധാന സാംസ്‌കാരിക മാറ്റത്തിന്‌ തുടക്കമിട്ടു, ഇന്ന്‌, നിരവധി യുവ ഇന്ത്യക്കാര്‍ തൊഴിലന്വേഷകരല്ല, തൊഴില്‍ സ്രഷ്‌ടാക്കളാകാന്‍ ആഗ്രഹിക്കുന്നു.
ഇന്ത്യയുടെ സ്‌റ്റാര്‍ട്ടപ്പ്‌ യാത്ര ആത്യന്തികമായി നമ്മുടെ യുവ സംരംഭകരിലും, നയങ്ങള്‍ നയിക്കുന്ന വളര്‍ച്ചയിലും, ലോകത്തിനായി നവീകരിക്കാനുള്ള ഇന്ത്യയുടെ ശേഷിയിലും ആത്മവിശ്വാസം പകരുന്ന ഒരു കഥയാണ്‌. സമ്പന്നവും, എല്ലാവരെയും ഉള്‍ക്കൊള്ളുന്നതും, ആഗോളതലത്തില്‍ മത്സരാധിഷ്‌ഠിതവുമായ ഒരു ഇന്ത്യ കെട്ടിപ്പടുക്കുന്നതില്‍ സ്‌റ്റാര്‍ട്ടപ്പുകള്‍ കേന്ദ്രബിന്ദുവായി തുടരും.

പിയൂഷ്‌ ഗോയല്‍
(കേന്ദ്ര വാണിജ്യ വ്യവസായ
മന്ത്രിയാണ്‌ ലേഖകന്‍.)