നിങ്ങളുടെ ചുണ്ടുകളെ പരിഗണിയ്ക്കാറുണ്ടോ ? ; ചുണ്ടുകള്‍ക്ക് സൗന്ദര്യം നല്‍കാന്‍ ഇനി വളരെ എളുപ്പം

കാലാവസ്ഥാ മാറ്റം നിങ്ങളുടെ ചര്‍മ്മത്തെ ബാധിയ്ക്കുന്നത് പോലെ തന്നെ ചുണ്ടുകളെയും ബാധിയ്ക്കാറുണ്ട്. എന്നാല്‍ ചുണ്ടുകള്‍ക്ക് സൗന്ദര്യം നല്‍കാന്‍ ആരും മിനക്കെടാറില്ല. മുടിയ്ക്കും, ചര്‍മ്മത്തിനുമൊക്കെ കൊടുക്കുന്ന പരിഗണന പലരും തങ്ങളുടെ ചുണ്ടുകള്‍ക്ക് കൊടുക്കാറുണ്ടോ എന്ന് ചോദിച്ചാല്‍ സംശയം തന്നെയാണ്. തണുപ്പ്, കാറ്റ് എന്നിവയൊക്കെ ചുണ്ടിന്റെ ഭംഗിയെ നശിപ്പിച്ചു കളയും. ചുണ്ടുകളുടെ സൗന്ദര്യത്തില്‍ പ്രത്യേക ശ്രദ്ധ വേണം. എന്നാല്‍ ചെറിയ ചില വിദ്യകള്‍ കൊണ്ട് വളരെയെളുപ്പം നിങ്ങളുടെ ചുണ്ടുകള്‍ മനോഹരമാക്കാം...

* പഞ്ചസാര - നല്ല തരിതരിപ്പുള്ള പഞ്ചസാര നല്ലൊരു സ്‌ക്രബറാണ്. ഇത് ചുണ്ടിലെ മൃതകോശങ്ങളെ അകറ്റി ചുണ്ടിന് ഭംഗി നല്‍കാന്‍ സഹായിക്കുന്നു. ഒരു സ്പൂണ്‍ പഞ്ചസാരയെടുത്ത് അതില്‍ മൂന്നോ നാലോ തുള്ളി ഒലിവ് ഓയിലൊഴിച്ച് അരസ്പൂണ്‍ തേനും ചേര്‍ത്ത് ചുണ്ടില്‍ പുരട്ടുക. ഈ മിശ്രിതം ചുണ്ടില്‍ പുരട്ടിയ ശേഷം വിരലുകള്‍ കൊണ്ട് ചുണ്ടില്‍ മൃദുവായി ഉരസുക. അല്‍പ സമയത്തിനു ശേഷം വെള്ളമുപയോഗിച്ച് കഴുകുക. മികച്ച ഫലം ലഭിക്കാന്‍ ദിവസവും ഇത് ശീലമാക്കുക.

* ഫാറ്റി ആസിഡ് ധാരാളമടങ്ങിയിട്ടുള്ള വെര്‍ജിന്‍ കൊക്കനട്ട് ഓയില്‍ ഒരു ലൂബ്രിക്കന്റ് പോലെ പ്രവര്‍ത്തിച്ച് ചുണ്ടുകള്‍ക്ക് മൃദുത്വമേകുന്നു. കുറച്ച് വെര്‍ജിന്‍ കൊക്കനട്ട് ഓയിലെടുത്ത് ദിവസവും രണ്ടുനേരം ചുണ്ടില്‍ മസാജ് ചെയ്യണം. രണ്ടോ മൂന്നോ സെക്കന്‍ഡ് ഇതു തുടരാം. ഇത് പുരട്ടിയതിനു തൊട്ടുപുറകേ വെള്ളം കുടിക്കാനോ ഭക്ഷണം കഴിക്കാനോ പാടില്ല എന്ന കാര്യം പ്രത്യേകം ശ്രദ്ധിക്കണം.

* തേന്‍ - ചുമയും തൊണ്ടവേദനയും മാറ്റാന്‍ മാത്രമല്ല ചുണ്ടുകളുടെ ആരോഗ്യത്തിനും സൗന്ദര്യത്തിനും ഉത്തമമാണ് തേന്‍. ചുണ്ടുകള്‍ വിണ്ടുകീറുന്നതു തടയാന്‍ ഒരു മോയ്‌സ്ചറൈസര്‍ പോലെ പ്രവര്‍ത്തിക്കും. ഇതില്‍ നിറയെ ആന്റി ഓക്‌സിഡന്റ്‌സും ആന്റി ബാക്റ്റീരിയല്‍ ഘടകങ്ങളും അടങ്ങിയിട്ടുണ്ട്. അത് വരണ്ടു കീറിയ ചുണ്ടുകളില്‍ അണുബാധയുണ്ടാകാതെ സംരക്ഷിക്കും.

* കറ്റാര്‍വാഴ ജെല്‍ - കറ്റാര്‍വാഴ ഇലകള്‍ക്കുള്ളിലെ ജെല്ലില്‍ നിറയെ വിറ്റാമിനുകള്‍, മിനറല്‍സ്, ആന്റി ഇന്‍ഫ്‌ലമേറ്ററി ഘടകങ്ങള്‍ എന്നിവ അടങ്ങിയിരിക്കുന്നു. ഇത് ചുണ്ടുകളില്‍ ഈര്‍പ്പം നിലനിര്‍ത്തി മൃദുത്വമേകാന്‍ സഹായിക്കുന്നു. ഇവ ചുണ്ടില്‍ പരീക്ഷിക്കുന്നതിന് മുന്‍പ് സ്വയം ഒരു അലര്‍ജി ടെസ്റ്റ് നടത്തുന്നത് നന്നായിരിക്കും. കറ്റാര്‍വാഴ ജെല്ലില്‍ കുറച്ചെടുത്ത് കൈമുട്ടില്‍ പുരട്ടി ഒരു ദിവസം കാത്തിരിക്കണം. എന്തെങ്കിലും അലര്‍ജിയുണ്ടോയെന്ന് ഉറപ്പാക്കാനാണിത്. കറ്റാര്‍വാഴയിലയ്ക്കുള്ളില്‍ നിന്നെടുക്കുന്ന ജെല്‍ ഉപയോഗ ശേഷം കാറ്റുകയറാത്ത ഒരു പാത്രത്തില്‍ അടച്ചു വച്ചാല്‍ പിന്നീടും ഉപയോഗിക്കാം. അലര്‍ജിയില്ലെന്ന് ഉറപ്പായാല്‍ ഉറങ്ങാന്‍ പോകുന്നതിന് മുന്‍പ് കറ്റാര്‍വാഴ ജെല്‍ ചുണ്ടുകളില്‍ പുരട്ടാം. രാവിലെ ഉണര്‍ന്നാലുടന്‍ കഴുകിക്കളയാം.