യുദ്ധഭീതി ഉണര്ത്തുന്ന ഉപരോധം
വെനസ്വേലയുടെ തീരങ്ങളില് യുദ്ധഭീതിയുടെ കരിനിഴല് വീഴ്ത്തിക്കൊണ്ടുള്ള അമേരിക്കയുടെ നീക്കം രാജ്യാന്തര ബന്ധങ്ങളില് വഴിത്തിരിവായി മാറിയിരിക്കുകയാണ്. സാമ്പത്തിക ഉപരോധങ്ങളില്നിന്ന് ഒരു പടികൂടി കടന്ന്, വെനസ്വേലന് എണ്ണ ടാങ്കറുകള്ക്ക് 'സമ്പൂര്ണ ഉപരോധം' പ്രഖ്യാപിക്കുകയും കരീബിയന് കടലില് യു.എസ്. സൈനിക സന്നാഹം വര്ധിപ്പിക്കുകയും ചെയ്ത ഡോണള്ഡ് ട്രംപിന്റെ തീരുമാനം, നിക്കോളാസ് മഡുറോ സര്ക്കാരിനെതിരായ സമ്മര്ദ തന്ത്രങ്ങളെ ഒരു സൈനിക ഭീഷണിയിലേക്ക് എത്തിച്ചിരിക്കുന്നു.
ഇതൊരു സാധാരണ ഉപരോധമല്ല, മറിച്ച് രാജ്യാന്തര നിയമമനുസരിച്ച് യുദ്ധസമാനമായി കണക്കാക്കാവുന്ന ഒരു നാവിക ഉപരോധമാണ് എന്നതാണ് സ്ഥിതിഗതികളെ അതീവ ഗുരുതരമാക്കുന്നത്. 'ചരിത്രത്തിലെ ഏറ്റവും വലിയ സൈനിക കപ്പല്വ്യൂഹം' വെനസ്വേലയെ വളഞ്ഞിരിക്കുന്നു എന്ന ട്രംപിന്റെ പ്രസ്താവന, സാമ്പത്തിക സമ്മര്ദം എന്നതിലുപരി ബലപ്രയോഗത്തിലൂടെ ഭരണമാറ്റം ലക്ഷ്യമിടുന്നു എന്നതിന്റെ വ്യക്തമായ സൂചനയാണ്.
ഈ വിഷയത്തില് ഐക്യരാഷ്ട്രസഭയുടെ അനുമതി അമേരിക്ക തേടിയിട്ടില്ല. അമേരിക്കയുടെ ഈ ഏകപക്ഷീയമായ നീക്കം ലോകക്രമത്തില് ഒരു അപകടകരമായ കീഴ്വഴക്കം സൃഷ്ടിക്കുന്നു.പ്രമുഖ ശക്തികള് രാജ്യാന്തര നിയമങ്ങളെ തങ്ങളുടെ താല്പര്യങ്ങള്ക്കുവേണ്ടി കാറ്റില്പ്പറത്തുമ്പോള്, ചെറുരാജ്യങ്ങളുടെ പരമാധികാരം ചോദ്യം ചെയ്യപ്പെടുന്നു. ഈ അപകടം മുന്കൂട്ടി കണ്ടാണ് റഷ്യ രംഗത്തുവന്നത്. 'പ്രവചനാതീതമായ പ്രത്യാഘാതങ്ങള്'ക്ക് വഴിവയ്ക്കുന്ന 'മാരകമായ തെറ്റ്' ചെയ്യരുത് എന്ന് റഷ്യന് വിദേശകാര്യ മന്ത്രാലയം അമേരിക്കയ്ക്ക് മുന്നറിയിപ്പ് നല്കിയത് ഈ പശ്ചാത്തലത്തിലാണ്.
വെനസ്വേല ഒരു പുതിയ
പ്രോക്സി പോര്ക്കളം
വെനസ്വേലന് പ്രതിസന്ധി കേവലം ഒരു പ്രാദേശിക പ്രശ്നമായി നിലനില്ക്കുന്നില്ല;അത് ഒരു അമേരിക്ക-റഷ്യന് പ്രോക്സി പോര്ക്കളമായി മാറിക്കഴിഞ്ഞിരിക്കുന്നു. റഷ്യന് പ്രസിഡന്റ് വ്ളാഡിമിര് പുടിന്റെ ഉറച്ച സഖ്യകക്ഷിയാണ് മഡുറോ. വെനസ്വേലയില് റഷ്യക്ക് തന്ത്രപരമായ എണ്ണ, ധനകാര്യ, സൈനിക താല്പര്യങ്ങളുണ്ട്. മഡുറോ സര്ക്കാരിനെ റഷ്യ സാമ്പത്തികമായും നയതന്ത്രപരമായും താങ്ങിനിര്ത്തുന്നത് അമേരിക്കയുടെ നീക്കങ്ങള്ക്കെതിരായുള്ള ശക്തമായ പ്രതിരോധമാണ്.
കഴിഞ്ഞ കുറേ വര്ഷങ്ങളായി റഷ്യ വെനസ്വേലക്ക് നല്കിയ സഹായങ്ങള് അമേരിക്കന് ആധിപത്യത്തിനുള്ള റഷ്യയുടെ മറുപടിയായി കണക്കാക്കാം. അതുകൊണ്ടുതന്നെ വെനസ്വേലയെ ലക്ഷ്യമിട്ടുള്ള ഒരു സൈനിക നീക്കം കരീബിയന് മേഖലയില് ഒരു വന്ശക്തി പോരിന് തിരികൊളുത്താന് സാധ്യതയുണ്ട്.
വെനസ്വേലയുടെ വരുമാനത്തിന്റെ 90 ശതമാനത്തിലധികവും എണ്ണ കയറ്റുമതിയില്നിന്നാണ്. ഈ ടാങ്കറുകള് തടയുന്നതോടെ രാജ്യത്തിന്റെ സാമ്പത്തിക അടിത്തറ തകരും. എന്നാല്, ഉപരോധങ്ങളുടെ ചരിത്രം പരിശോധിച്ചാല് മനസിലാകുന്ന ഒരു കാര്യമുണ്ട്: ഇത്തരം നടപടികള് സാധാരണയായി ഭരണകൂടങ്ങളെ അട്ടിമറിക്കുന്നതിനു പകരം ഭരണകൂടങ്ങളെ കൂടുതല് കടുപ്പിക്കുകയും സാധാരണ ജനങ്ങളെ ദുരിതത്തിലാഴ്ത്തുകയുമാണ് പതിവ്.
ഈ ഉപരോധം വഴി വെനസ്വേലന് ജനത കടുത്ത ദാരിദ്ര്യത്തിലേക്കും മാനുഷിക പ്രതിസന്ധിയിലേക്കും എടുത്തെറിയപ്പെടും. 'ഭീകരവാദത്തിനെതിരായ നീക്കം' എന്ന് അമേരിക്ക ഇതിന് ലേബല് നല്കുന്നുണ്ടെങ്കിലും, ലക്ഷ്യം മഡുറോയെ വീഴ്ത്തുക മാത്രമാണ്. ഈ നീക്കം കൂട്ടായ ശിക്ഷാ നടപടിയായി മാറുകയാണ്.
ഒരു രാജ്യത്തിന്റെ നിലവിലുള്ള സര്ക്കാരിനെ 'വിദേശ ഭീകര സംഘടന' എന്ന് പ്രഖ്യാപിക്കുന്നത് ഒരു നയതന്ത്രപരമായ നീക്കുപോക്കിനുള്ള എല്ലാ വാതിലുകളും അടയ്ക്കുന്നതിന് തുല്യമാണ്. ഈ ലേബല് സൈനിക നടപടികള്ക്ക് സാധ്യത വര്ധിപ്പിക്കുകയും മധ്യസ്ഥ ശ്രമങ്ങളെ അസാധ്യമാക്കുകയും ചെയ്യും. ചര്ച്ചകള്ക്കും കൂടിയാലോചനകള്ക്കും പകരം, 'ലേബലുകള്' ഉപയോഗിച്ച് ഒരു രാജ്യത്തെ ഒറ്റപ്പെടുത്തുന്നത് സന്ധിയില്ലാത്ത ഒരു സംഘര്ഷത്തിലേക്ക് ലോകത്തെ കൊണ്ടെത്തിക്കും.
ലാറ്റിനമേരിക്കന് രാജ്യങ്ങള് ഈ സംഘര്ഷത്തില് ആശങ്കാകുലരാണ്. തങ്ങളുടെ മേഖല വീണ്ടും വന്ശക്തികളുടെ പോര്ക്കളമായി മാറുമോ എന്ന ഭയം അവര്ക്കുണ്ട്.
ഉപരോധങ്ങള് നിലവില് വന്നതോടെ, വെനസ്വേലന് എണ്ണയുടെ പ്രധാന ഉപയോക്താക്കളായിരുന്ന ചൈനയും ഇന്ത്യയും ഉള്പ്പെടെയുള്ള രാജ്യങ്ങള് പിന്മാറാന് നിര്ബന്ധിതരാകുന്നു. ടാങ്കറുകള് തടയുന്നതോടെ, രാജ്യാന്തര ഷിപ്പിങ് കമ്പനികള് വെനസ്വേലന് തുറമുഖങ്ങളില് എത്താന് മടിക്കും. എണ്ണ കൈകാര്യം ചെയ്യുന്ന ഷിപ്പിങ്, ഇന്ഷുറന്സ്, ധനകാര്യ സ്ഥാപനങ്ങളെല്ലാം അമേരിക്കന് ഉപരോധങ്ങള് ഭയന്ന് പിന്വലിയുമ്പോള്, എണ്ണ ടാങ്കറുകള്ക്ക് കിലോമീറ്ററുകളോളം ചുറ്റി സഞ്ചരിക്കേണ്ടിവരും.
മഡുറോ ഭരണകൂടം ഈ സാമ്പത്തിക പ്രതിസന്ധിയെ മറികടക്കാന് റഷ്യ, ചൈന, ഇറാന് തുടങ്ങിയ സഖ്യകക്ഷികളെ കൂടുതല് ആശ്രയിക്കേണ്ടിവരും. കപ്പലുകളുടെ വിവരങ്ങള് മറച്ചുവച്ചുകൊണ്ടുള്ള 'നിഴല് ഷിപ്പിങ്' വഴിയായിരിക്കും പ്രധാനമായും എണ്ണ നീക്കം നടത്തുക. എന്നാല്, ഇത് പൂര്ണമായ തോതില് എണ്ണ കയറ്റുമതിക്ക് പകരമാവില്ല. സാമ്പത്തിക വരുമാനം കുത്തനെ ഇടിയുന്നത് ഭരണകൂടത്തെ ഉടനടി തകര്ത്തില്ലെങ്കില് പോലും, ജനങ്ങള്ക്ക് ലഭ്യമാകുന്ന അവശ്യവസ്തുക്കളുടെ ഇറക്കുമതിയെ അത് ഗുരുതരമായി ബാധിക്കും. ജനങ്ങളുടെ ദുരിതം പതിന്മടങ്ങ് വര്ധിക്കുകയും മാനുഷിക ദുരന്തത്തിന്റെ ആഴം കൂടുകയും ചെയ്യും. അമേരിക്കയുടെ ഉപരോധം ലാറ്റിനമേരിക്കന് മേഖലയില് കടുത്ത ആശങ്കയാണ് ഉയര്ത്തുന്നത്. ട്രംപിന്റെ പ്രഖ്യാപനത്തില് 'കരീബിയന് കടലിലെ ഏറ്റവും വലിയ സൈനിക കപ്പല്വ്യൂഹം' എന്ന പരാമര്ശം, അയല്രാജ്യങ്ങളെ ഭയപ്പെടുത്തുന്നു.
വെനസ്വേലയുടെ അയല്രാജ്യങ്ങളായ കൊളംബിയയും ബ്രസീലും ഉള്പ്പെടെയുള്ളവ സംഘര്ഷം അതിര്ത്തികളിലേക്ക് വ്യാപിക്കുമോ എന്ന് ഭയക്കുന്നു. കരീബിയന് കപ്പല് പാതകളിലെ അസ്ഥിരത പ്രാദേശിക വ്യാപാരത്തെയും മത്സ്യബന്ധന മേഖലയെയും തകര്ക്കും. വെനസ്വേലയിലെ സാമ്പത്തിക തകര്ച്ച വര്ധിക്കുന്നത് നിലവിലുള്ള അഭയാര്ത്ഥി പ്രവാഹത്തിന്റെ വേഗത കൂട്ടും. ഇത് ലാറ്റിനമേരിക്കന് രാജ്യങ്ങളുടെമേലുള്ള സാമൂഹികവും സാമ്പത്തികവുമായ സമ്മര്ദം വര്ധിപ്പിക്കും.
ഈ സാഹചര്യത്തില്, മേഖലയിലെ പല രാജ്യങ്ങള്ക്കും ശക്തമായി പ്രതികരിക്കാന് കഴിയുന്നില്ല. മഡുറോ സര്ക്കാരിനോടുള്ള വിയോജിപ്പ് നിലനിര്ത്തിക്കൊണ്ടുതന്നെ, അമേരിക്കയുടെ ഏകപക്ഷീയമായ സൈനിക ഭീഷണിയെ അവര് ഭയക്കുന്നു. തങ്ങളുടെമേല് ആധിപത്യം സ്ഥാപിക്കാനുള്ള വന്ശക്തികളുടെ നീക്കങ്ങള്ക്കെതിരേ സംസാരിക്കാന് അവര്ക്ക് പരിമിതികളുണ്ട്.
വെനസ്വേലയുടെ എണ്ണ ഉത്പാദനം തടസ്സപ്പെടുന്നത് ആഗോള എണ്ണവിപണിയെയും ബാധിക്കാം. അമേരിക്കയുടെ നീക്കം രാജ്യാന്തര തലത്തില് എണ്ണ വിലയെ എങ്ങനെ സ്വാധീനിക്കുമെന്നത് ലോക രാജ്യങ്ങള് ഉറ്റുനോക്കുന്നു. എണ്ണ വിപണിയിലെ ഈ അനിശ്ചിതത്വം നിലനില്ക്കുമ്പോള്, ഈ പ്രതിസന്ധിയെ സ്വന്തം രാഷ്ട്രീയ ലാഭത്തിനായി ഉപയോഗിക്കാന് ട്രംപ് ഭരണകൂടം ശ്രമിക്കാനുള്ള സാധ്യതയുണ്ട്.
ഡോ. എന്. വിശ്വനാഥന് നായര്
