കേസിന്റെ അന്തിമഫലം അഭിഭാഷകരും പണത്തിന്റെ സ്വാധീനവും അനുസരിച്ചായിരിക്കും; നിലപാട് വ്യക്തമാക്കി ജോയ് മാത്യു

നടി ആക്രമിക്കപ്പെട്ട കേസില്‍ നിലപാട് വ്യക്തമാക്കി നടനും സംവിധായകനുമായ ജോയ് മാത്യു. ‘പറയാനുളളത് നേരത്തെ പറഞ്ഞു പോയി ’എന്ന അടിക്കുറിപ്പോടെയാണ് ജോയ് മാത്യു വിഷയത്തില്‍ പ്രതികിരച്ചത്. 2017 ല്‍ ടൈംസ് ഓഫ് ഇന്ത്യയ്ക്ക് നല്‍കിയ അഭിമുഖത്തിന്റെ പത്ര കട്ടിങ്ങും അതിനൊപ്പം പങ്കുവെച്ചു.

കേസിന്റെ അന്തിമഫലം അഭിഭാഷകരെയും പണത്തിന്റെ സ്വാധീനവും അനുസരിച്ചായിരിക്കുമെന്നായിരുന്നു 2017 ല്‍ നല്‍കിയ അഭിമുഖത്തില്‍ ജോയ് മാത്യു പറഞ്ഞത്. അതു ശരിവയ്ക്കുന്ന വിധിയാണ് കേസില്‍ വന്നതെന്ന് അടിവരയിട്ടുകൊണ്ടാണ് ജോയ് മാത്യുവിന്റെ പ്രികരണം.

കേസില്‍ തിങ്കളാഴ്ചയാണ് വിധി വന്നത്. ഒന്നു മുതല്‍ ആറു വരെയുള്ള പ്രതികള്‍ കുറ്റക്കാരാണെന്നു കണ്ടെത്തിയ കോടതി ഏഴും എട്ടും പ്രതികളെ കുറ്റവിമുക്തരാക്കി. കേസില്‍ എട്ടാം പ്രതിയായിരുന്ന ദിലീപിനെ വെറുതെ വിട്ട കോടതി നടപടിക്കെതിരെ സമ്മിശ്രപ്രതികരണമാണ് ഉയരുന്നത്. ദിലീപിനെതിരെയുള്ള ഗൂഢാലോചനക്കുറ്റം തെളിഞ്ഞില്ലെന്ന് കണ്ടെത്തിയാണ് എറണാകുളം പ്രിന്‍സിപ്പല്‍ സെഷന്‍സ് കോടതി താരത്തെ കുറ്റവിമുക്തനാക്കിയത്.

കുറ്റക്കാര്‍ക്കുള്ള ശിക്ഷാവിധി 12ന് ഉണ്ടാകും. ബലാത്സംഗം, ഗൂഢാലോചന, സ്ത്രീത്വത്തെ അപമാനിക്കല്‍, അന്യായ തടങ്കല്‍, ബലപ്രയോഗം, തെളിവു നശിപ്പിക്കല്‍, അശ്ലീല ചിത്രമെടുക്കല്‍, പ്രചരിപ്പിക്കല്‍ തുടങ്ങിയ കുറ്റങ്ങളാണ് ചുമത്തിയത്.