75-ാം വയസില്‍ ഹയര്‍ സെക്കണ്ടറി തുല്യതാ പരീക്ഷയെഴുതി നടി ലീനാ ആന്റണി

ആലപ്പുഴ: അച്ഛന്റെ മരണത്തെ തുടർന്ന് 63 വർഷം മുൻപ് പഠനം നിർത്തിയ നടി ലീനാ ആന്റണി 75-ാം വയസിൽ ഹയർസെക്കൻഡറി തുല്യതാ പരീക്ഷ എഴുതി. മൂന്ന് വർഷം മുൻപ് പത്താംതരം തുല്യതാ പരീക്ഷ ലീന പാസായിരുന്നു. കഴിഞ്ഞ ദിവസം ചേർത്തല ഗവ. ഗേൾസ് സ്കൂളിലാണ് ഹയർസെക്കൻഡറി രണ്ടാംവർഷ തുല്യതാ പരീക്ഷയെഴുതിയത്.

നാലുവർഷം മുൻപാണ് ലീന പഠനം പുനരാരംഭിച്ചത്. തുടര്‍ന്ന് 2022-ൽ പത്താംതരം തുല്യത ജയിച്ചിരുന്നു. തുടർന്നാണ് ഹയർസെക്കൻഡറി പഠനം തുടങ്ങിയത്. സൗകര്യമുള്ളപ്പോഴെല്ലാം തൃച്ചാറ്റുകുളം എൻഎസ്എസ് ഹയർസെക്കൻഡറി സ്കൂളിൽപ്പോയി പഠിച്ചു. പത്താംതരത്തിൽ ഒപ്പമുണ്ടായിരുന്ന കൂട്ടുകാർക്കൊപ്പമായിരുന്നു പഠനം. സെന്റർ കോഡിനേറ്റർ കെ കെ രമണി ക്ലാസുകൾക്ക്‌ നേതൃത്വം നൽകി.

അപ്പൻ മരിച്ചതിനെത്തുടർന്ന് പഠനം നിർത്തി 13-ാം വയസ്സിൽ നാടകവേദിയിലെത്തിയതാണ് ലീന. നടൻ കെ എൽ ആന്റണിയുടെ ജീവിതസഖിയായി. വൈകിയാണ് സിനിമയിലെത്തിയത്. മഹേഷിന്റെ പ്രതികാരം എന്ന ചിത്രത്തിലെ അമ്മവേഷത്തിലൂടെ ശ്രദ്ധനേടി. പിന്നീട്, ഏതാനും സിനിമകളിലും അഭിനയിച്ചു. ഭർത്താവിന്റെ മരണത്തിനുശേഷമുള്ള ഒറ്റപ്പെടലിനെ മറികടക്കാനാണ് മുടങ്ങിയ പഠനം പുനരാരംഭിച്ചത്.