സര്‍ക്കാര്‍ ഉദ്യോഗസ്ഥന്‍ ചമഞ്ഞ് കടകളില്‍ തട്ടിപ്പ് ; നെടുങ്കണ്ടം സ്വദേശിയെ ചങ്ങനാശ്ശേരി പോലീസ് പൊക്കി

കോട്ടയം: സര്‍ക്കാര്‍ ഉദ്യോഗസ്ഥനെന്ന വ്യാജേനെ കോട്ടയം ജില്ലയുടെ പലഭാഗങ്ങളില്‍ തട്ടിപ്പ് നടത്തി മുങ്ങിയ നെടുങ്കണ്ടം സ്വദേശിയെ പോലീസ് അറസ്റ്റ് ചെയ്തു. നെടുങ്കണ്ടം സ്വദേശിയായ മനു എന്നയാളെയാണ് മുളന്തുരുത്തിയില്‍ വെച്ച് പോലീസ് അറസ്റ്റ് ചെയ്തത്. ചങ്ങനാശ്ശേരിയിലെ ഒരു പലചരക്കുകടയില്‍ നിന്നും രണ്ടരലക്ഷം രൂപയുടെ സാധനങ്ങള്‍ തട്ടിയ കേസിലാണ് ഇയാളെ അറസ്റ്റ് ചെയ്തിരിക്കുന്നത്. പലചരക്ക് കടയ്ക്ക് പുറമേ മൊബൈല്‍ഷോപ്പിലും ഒരു ഫര്‍ണീച്ചര്‍ കടയിലും ഇയാള്‍ സമാന തട്ടിപ്പ് നടത്തിയതായി പോലീസ് കണ്ടെത്തിയിട്ടുണ്ട്.

സപ്‌ളൈക്കോ ഉദ്യോഗസ്ഥന്‍ എന്ന വ്യാജേനെ കുടുംബബ്രശീയുടെ പരിപാടിക്ക് വേണ്ടി എന്ന രീതിയില്‍ ചാക്കു കണക്കിന് അരിയും പഞ്ചസാരയും വാങ്ങിയശേഷം ചെക്ക് നല്‍കി മുങ്ങിയെന്നാണ് മാധ്യമങ്ങള്‍ പുറത്തുവിട്ടിരിക്കുന്ന വാര്‍ത്ത. ചെക്ക് ബാങ്കില്‍ കൊണ്ടുപോയപ്പോഴാണ് വ്യാജചെക്കാണെന്ന് തിരിച്ചറിഞ്ഞത്. ഇതോടെ കടക്കാരന്‍ പോലീസില്‍ നല്‍കിയ പരാതിയുടെ അടിസ്ഥാനത്തിലാണ് അറസ്റ്റ്. തട്ടിപ്പ് നടത്തിയ സാധനങ്ങള്‍ മറിച്ചുവില്‍പ്പന നടത്തുകയായിരുന്നുന്നെന്നും അങ്ങിനെയും പണം സമ്പാദിച്ചെന്നും പറയുന്നു.

ചങ്ങനാശ്ശേരി പലചരക്ക് കടയില്‍ നടത്തിയ തട്ടിപ്പിന് പുറമേ കറുകച്ചാലിലെ ഒരു മൊബൈല്‍ഷോപ്പിലും ഇയാള്‍ സമാന തട്ടിപ്പ് നടത്തി. വ്യാജ ചെക്ക് നല്‍കി വിലകൂടിയ മൊബൈല്‍ഫോണ്‍ വാങ്ങി മുങ്ങുകയായിരുന്നു. സപ്‌ളൈക്കോ ഉദ്യോഗസ്ഥന്‍ എന്ന വ്യാജേനെ ചങ്ങനാശ്ശേരിയിലും കറുകച്ചാലിലും നടത്തിയ തട്ടിപ്പിന് ശേഷം തിരുവല്ലയിലെ ഒരു ഫര്‍ണീച്ചര്‍ ഷോപ്പില്‍ നിന്നും ഒന്നരലക്ഷം രൂപയുടെ തട്ടിപ്പും ഇയാള്‍ നടത്തി. സംശയിക്കാതിരിക്കാന്‍ കഴുത്തില്‍ സര്‍ക്കാര്‍ ജീവനക്കാരുടെ ടാഗും ബോര്‍ഡ്‌വെച്ച കാറിലുമായി എത്തിയായിരുന്നു തട്ടിപ്പ്.

അതുകൊണ്ടു തന്നെ പ്രതിയെയോ ഇയാള്‍ നല്‍കിയിരുന്ന ചെക്കോ കടക്കാര്‍ സംശയിച്ചിരുന്നില്ല. എന്നാല്‍ കറുകച്ചാലിലെ മൊബൈല്‍ഷോപ്പില്‍ ഇയാളുടെ ദൃശ്യങ്ങള്‍ സിസിടിവിയില്‍ പതിഞ്ഞതാണ് പോലീസിന് പണിയെളുപ്പമാക്കിയത്. മുളന്തുരുത്തിയില്‍ ആള്‍ക്കാരുമായി പരിചയമൊക്കെ സ്ഥാപിച്ച് ഇന്‍കംടാക്‌സ് ഉദ്യോഗസ്ഥന്‍ ചമഞ്ഞ് പുതിയ തട്ടിപ്പിനൊരുങ്ങുമ്പോഴായിരുന്നു പിടിയിലായത്. ഇയാള്‍ക്കെതിരേ മുമ്പും തട്ടിപ്പ് കേസ് നിലവിലുണ്ടെന്നാണ് വിവരം. ഇയാള്‍ നടത്തിയ തട്ടിപ്പിന്റെ ആഴം പരിശോധിച്ചുവരികയാണ് പോലീസ്.