വൃക്കകളുടെ ആരോഗ്യത്തെ ദോഷകരമായി ബാധിക്കുന്ന ഭക്ഷണങ്ങളാണ് ഇവ

ശരീരത്തിലെ പ്രധാന അവയവമായ വൃക്കകളുടെ ആരോഗ്യത്തെ ദോഷം ചെയ്യുന്ന ചില പ്രവര്‍ത്തികള്‍ നമ്മള്‍ ചെയ്യാറുണ്ട്. മാലിന്യം നീക്കം ചെയ്യാനും, ശരീരത്തിലെ ജലാംശം നിലനിര്‍ത്താനും, രക്തസമ്മര്‍ദ്ദം നിയന്ത്രിക്കാനും വൃക്കകള്‍ സഹായിക്കുന്നു. ഇത്രയും ജോലികള്‍ നമ്മുടെ ശരീരത്തില്‍ ചെയ്യുന്ന വൃക്കയെ സംരക്ഷിയ്ക്കുന്ന തരത്തിലുള്ള ഭക്ഷണങ്ങള്‍ ആവണം നമ്മള്‍ കഴിയ്‌ക്കേണ്ടത്. ദിവസവും കഴിക്കുന്ന ചില ഭക്ഷണങ്ങള്‍ വൃക്കകളുടെ ആരോഗ്യത്തെ ദോഷകരമായി ബാധിക്കും. ഇവ ഏതൊക്കെയാണെന്ന് അറിയാം......

* പാല്‍ - പാല്‍ കാല്‍സ്യത്തിന്റെ ഉറവിടമാണ്. എന്നാല്‍ അമിതമായി പാല്‍ കുടിക്കുന്നത് കാല്‍സ്യത്തിന്റെ അളവ് കൂട്ടുകയും, കിഡ്‌നി സ്റ്റോണ്‍ ഉണ്ടാകാന്‍ സാധ്യത കൂട്ടുകയും ചെയ്യുന്നു. ചിലതരം ചീസുകളില്‍ ഉപ്പും, പ്രിസര്‍വേറ്റീവുകളും അടങ്ങിയിട്ടുണ്ട്. കൊഴുപ്പ് കുറഞ്ഞ തൈര്, ടോണ്‍ഡ് മില്‍ക്ക്, ബദാം പാല്‍, ഓട്‌സ് പാല്‍ എന്നിവ കുടിക്കുന്നത് നല്ലതാണ്. കാല്‍സ്യത്തിന് ഇലക്കറികള്‍ കഴിക്കുക. ഉദാഹരണത്തിന്, ചീര, റാഗി എന്നിവ കഴിക്കാം.

* ഉപ്പ് - ഉയര്‍ന്ന അളവില്‍ സോഡിയം അടങ്ങിയ ഉപ്പ് കഴിക്കുന്നത് രക്തസമ്മര്‍ദ്ദം കൂട്ടും. ഇത് വൃക്കകളുടെ ആരോഗ്യത്തിന് ദോഷകരമാണ്. ലോകാരോഗ്യ സംഘടനയുടെ കണക്കനുസരിച്ച് ഒരു ദിവസം 5 ഗ്രാം ഉപ്പ് മതി. എന്നാല്‍ നമ്മളില്‍ പലരും ഇതില്‍ കൂടുതല്‍ ഉപ്പ് ഉപയോഗിക്കുന്നു. അച്ചാറുകള്‍, പപ്പടം, പാക്കറ്റ് സ്‌നാക്‌സുകള്‍, വീട്ടില്‍ ഉണ്ടാക്കുന്ന ഭക്ഷണങ്ങള്‍ എന്നിവയില്‍ ധാരാളം ഉപ്പ് അടങ്ങിയിട്ടുണ്ട്. ജീരകം, മല്ലിയില, ഇഞ്ചി, നാരങ്ങ നീര്, വെളുത്തുള്ളി, കല്ലുപ്പ് എന്നിവ മിതമായ അളവില്‍ ഉപയോഗിക്കുന്നത് ഉപ്പിന്റെ അളവ് കുറയ്ക്കാന്‍ സഹായിക്കും.

* എണ്ണ - ഒരേ എണ്ണ വീണ്ടും ചൂടാക്കി ഉപയോഗിക്കുന്നത് ട്രാന്‍സ് ഫാറ്റ് കൂട്ടുന്നു. ഇത് വീക്കം, പൊണ്ണത്തടി, രക്തസമ്മര്‍ദ്ദം തുടങ്ങിയ പ്രശ്‌നങ്ങള്‍ക്ക് കാരണമാകുന്നു. ഇത് കിഡ്നി രോഗങ്ങളിലേക്ക് നയിക്കുന്നു. പ്ലാസ്റ്റിക് കവറുകളില്‍ വില്‍ക്കുന്ന ഡീപ് ഫ്രൈ ചെയ്ത പലഹാരങ്ങള്‍ ആരോഗ്യത്തിന് വളരെ ദോഷകരമാണ്.

* ഇന്‍സ്റ്റന്റ് നൂഡില്‍സ് - ഇന്‍സ്റ്റന്റ് നൂഡില്‍സ്, ചിപ്‌സ്, ഫ്രോസണ്‍ സ്‌നാക്‌സ്, റെഡി ടു ഈറ്റ് കറികള്‍ എന്നിവയില്‍ സോഡിയം, പ്രിസര്‍വേറ്റീവുകള്‍, കൊഴുപ്പുകള്‍ എന്നിവ ധാരാളമായി അടങ്ങിയിട്ടുണ്ട്. ഇവ രക്തസമ്മര്‍ദ്ദം കൂട്ടുകയും, പതിവായി കഴിക്കുകയാണെങ്കില്‍ കിഡ്‌നി രോഗങ്ങള്‍ക്ക് കാരണമാകുകയും ചെയ്യും.
പകരം, വീട്ടില്‍ ഉണ്ടാക്കുന്ന പുതിയ ഭക്ഷണങ്ങള്‍ കഴിക്കുക. സീസണല്‍ പച്ചക്കറികള്‍, പയറുവര്‍ഗ്ഗങ്ങള്‍, ധാന്യങ്ങള്‍ എന്നിവ ഉപയോഗിച്ച് ഉണ്ടാക്കുന്ന ഭക്ഷണങ്ങള്‍ ആരോഗ്യത്തിന് നല്ലതാണ്. വറുത്ത കടല, പോഹ ചിവിട, ബേക്ക് ചെയ്ത മഖാന തുടങ്ങിയ ലഘുഭക്ഷണങ്ങള്‍ കഴിക്കുന്നതും നല്ലതാണ്.

* പഞ്ചസാര - അമിതമായി പഞ്ചസാര കഴിക്കുന്നത് പ്രമേഹത്തിന് കാരണമാകും. പ്രമേഹം പിന്നീട് കിഡ്‌നി രോഗങ്ങളിലേക്ക് നയിക്കുന്നു. ലഡ്ഡു, ഗുലാബ് ജാമുന്‍, ഹല്‍വ തുടങ്ങിയ മധുര പലഹാരങ്ങള്‍ അധികം കഴിക്കുന്നത് പഞ്ചസാരയുടെ അളവ് കൂട്ടുന്നു. ഈന്തപ്പഴം, ശര്‍ക്കര (മിതമായ അളവില്‍), മാങ്ങ, ചിക്കു, പഴം, വീട്ടില്‍ ഉണ്ടാക്കുന്ന മധുര പലഹാരങ്ങള്‍ എന്നിവ കഴിക്കുന്നത് നല്ലതാണ്. റാഗി, ബജ്‌റ തുടങ്ങിയ ധാന്യങ്ങള്‍ മധുരം കഴിക്കാനുള്ള ആഗ്രഹം കുറയ്ക്കുന്നു.