4000 വര്‍ഷത്തിലധികം പഴക്കം: മധ്യ ഇറാനിലെ അത്ഭുതമരം

ചരിത്രം രേഖപ്പെടുത്തുന്നതിനും മുന്‍പേ മധ്യ ഇറാന്റെ മണ്ണില്‍ വേരുറപ്പിച്ച ഒരു ജീവിക്കുന്ന അത്ഭുതമുണ്ട്. അതാണ് 'സര്‍വ്ഇ അബര്‍കു' ലോകത്തിലെ ഏറ്റവും പ്രായം ചെന്ന മരങ്ങളിലൊന്നായ ഈ സൈപ്രസ് വൃക്ഷം, ഏഷ്യയിലെ തന്നെ ഏറ്റവും പഴയ സസ്യമായാണ് കണക്കാക്കപ്പെടുന്നത്. ഏകദേശം 4000 വര്‍ഷത്തിലധികം പഴക്കം കണക്കാക്കുന്ന ഈ മരം പേര്‍ഷ്യന്‍ സാമ്രാജ്യത്തിന്റെ ഉദയത്തിനും അസ്തമയത്തിനും ഒരുപോലെ സാക്ഷ്യം വഹിച്ചതാണ്.

സൊറോസ്ട്രിയന്‍ മതസ്ഥാപകനായ സാരതുസ്ട്രയാണ് ഈ മരം നട്ടതെന്നാണ് ഇറാനിയന്‍ ഐതിഹ്യങ്ങള്‍ പറയുന്നത്. മഹാനായ സൈറസ് ചക്രവര്‍ത്തി പേര്‍ഷ്യന്‍ സാമ്രാജ്യം സ്ഥാപിക്കുന്നതിന് നൂറ്റാണ്ടുകള്‍ക്ക് മുന്‍പേ ഈ മരം അവിടെയുണ്ടായിരുന്നു എന്നത് ആരെയും അമ്പരപ്പിക്കുന്ന വസ്തുതയാണ്.

കഠിനമായ വേനലും മഴ കുറഞ്ഞ മരുഭൂമി സമാനമായ കാലാവസ്ഥയുമുള്ള യാസ്ദ് പ്രവിശ്യയിലാണ് ഈ മരം വളരുന്നത്. 25 മീറ്ററോളം ഉയരവും 11 മീറ്ററിലധികം തടിവണ്ണവുമുള്ള ഈ നിത്യഹരിത വൃക്ഷം പ്രകൃതിയിലെ ഒരു വലിയ വിസ്മയമാണ്. ഭൂമിക്കടിയിലെ ജലസ്രോതസ്സുകളിലേക്ക് ആഴ്ന്നിറങ്ങിയ വേരുകളും പുരാതനമായ 'ഖനട്ട്' ജലസേചന രീതികളുമാകാം ഇത്രയും കാലം ഈ മരത്തെ നിലനിര്‍ത്തിയതെന്ന് ഗവേഷകര്‍ കരുതുന്നു.

ഇറാന്‍ ഈ വൃക്ഷത്തെ ഒരു ദേശീയ പ്രകൃതി സ്മാരകമായി പ്രഖ്യാപിച്ച് സംരക്ഷിച്ചു വരുന്നു. മരത്തിന് കേടുപാടുകള്‍ സംഭവിക്കാതിരിക്കാന്‍ ചുറ്റും വേലികള്‍ കെട്ടിയിട്ടുണ്ട്. ഇത്രയും കാലം കഴിഞ്ഞിട്ടും ഇപ്പോഴും ഈ മരത്തിന്റെ ശാഖകളില്‍ കായ്കള്‍ ഉണ്ടാകുന്നു എന്നതും തൊലിപ്പുറം വളരുന്നു എന്നതും പ്രകൃതി നല്‍കുന്ന അത്ഭുതമായി തുടരുന്നു.